Jems 3:1 - Godigo dwagi yai po buku

¹ Eno ama dedeo, dage tomode Godigo po ola mabo bidi hauwago te po ola magio, bidi si sela naga usu yaibao. Dago konebo dao, nosali Godigo agai we bidi dagalobo sogode, agai da te po ola mabo bidi dabe agai da bugagia dagalama, osola sueibao. Tama dago dena sę bugagia esiąyu da, teda agai dabolo sęgę mawaibao. Tiali goli te sogo agai po odali gasa we bidi te agai dua digi augwali bugagia dagalama osola sueibao.

Jems 3:1 Iomraidhean Croise

Pris Sę Ebo Bomai Po 10:3

Tama Mosesgo Aronbolo te po wai, “Polobadu Genuai Bidigo te tiwai po wali, ‘Te eno sę eyu pąba asobo bidi dabe, ena te olo bidi tiwai meni augwaligo te tiwai koneabo elalubao, ena God mu dao. Augwaligo te tama homu bugagia konebaso da, teda eno genuai bomo me ula te we bidi augwaliba ola mawaibao.’ Agai te tama po wai, tiali goli te bidi sigo te po wali me pisąbaso, tama Genuai Bidigo augwali si dolali,” Mosesgo te po wai. Tama Arongo te tiali po odama, agai po me wabeo.

Malakai 2:12

Te Genuai Bidigo te kolesaga ebo bidi dabe te sela sąyu, te da Israel hani tomode bidimainu me elamuo wali. Tama tiyu, augwaligo te Tigidali Bomo Elalubo Genuai Bidiba te ofa sela pigio wai dao.

Matyu 10:24

“Augwaligo ena dali yali dwai kolesaga, te kolesaga naga augwaligo dage dali me yaibao. Te skul ogomani agai aga po ola mabo tisa bidi te aiyaba me elalugobeo, tama te sę ebo bidi te aga ugwadu elaluyu te sę tonalubo bidi aga aiyaba elalugobeo.

Matyu 23:13

“Dage te bomai po page ola mabo bidi dabe me, dage Farisi dabe me, hobede ya. Dageba te dwai sogo mu pedelaibao, dage tibo po wabo bage. Te Godigo we bidi tonalubo kolesaga tomoba pabo tų te dagego te we bidi augwaligo gesabidiba te tų palibo dao. Duga digi te tomoba me pabo meni, tama te we bidi augwali te tomoba painogo ebadi, te dagego augwali pabo tų palibo dao.

Matyu 23:14

[Dage bomai po page ola mabo bidi me, dage Farisi dabe dali, hobede ya. Dageba te dwai sogo mu te pedelaibao, dage tibo po wabo bage. Dage te augwa bidi isai we dabe pageba pelama, tama dagego te ugwadu homugo naga po augwali dali olama, tama augwaligo be me doado bage wi sabo dao. Tama dagego gedu haluasa po bobobage weyu, duga te dwai sę yali po geme dualiyu tebo dao. Tama tibaso, te dwai sę wei ponabo sogode te dageba asabo sęgę te dwasianu menio.]” Jisasgo te po wai.

Matyu 9:11

Tama te Farisi hani bidi dabe meba augwaligo sulama, tama augwaligo aga dali wali pabo bidi dabebolo te po wali, “Magi baso duga po ola mabo bidi agai te takis sabo bidi dabe dali, me te dwai sęgę sai bidi dabe dali hodobo nai tubo dawe?” te po wai.

Dwagi Yai Gesi Po Lukgo Asęani 16:2

Tama te po odama, te genuai bidigo te doado bage tonalubo bidi i olama, agabolo te po wali, ‘Te nago sęde bugagia ebo menio po eno odalio. Nago te bidigo wei ponabo po asęani buku tigidali dodolama, ena mao, eno sueio. Nago te sę ma egobeo, eno nage sela sąwaibao,’ te po wali.”

Dwagi Yai Gesi Po Lukgo Asęani 6:37

Jisasgo po ma wadolama weyu, te po wali, “Dagego gasa bidi dabe dagalama, augwali dwai bidi dabe da po weyu, posobo po wagimio. Tama tiyu da, Godigo dage dagalama posogobeo. Sęgę yai po dagego dobagio. God agai dagebolo sęgę yai po dobaidali weyu, dagego gasa bidibolo sęgę yai po wagimio. Gasa bidigo dagebolo dwai sę yali te sela sąnama, kegeda paliąo. Tama tiyu da, teda Godigo dagego dwai sę yali kegeda palaibao.

Dwagi Yai Gesi Po Jongo Asęani 3:10

Jisasgo Nikodemusbolo te po wei ponoyu, te po wai, “Magi yaliwe? Nage te Israel bidi dabe te bomai po page ola mabo bidi dao. Tama magi baso nago te nai konebewe?

Godigo Sęba Tagala Palai Bidigo Po 13:1

Te Antiok bulude, te Jisasgo po wali pabo bidi tomode, te Godigo po pusa mabo bidi profetgo pusubo po tiwai po wabo tiwai bidi me badu te bulude bidali, te Godigo po te we bidi augwaliba ola mabo bidi dabe me badu me bidali. Te bidi dabe augwaligo nogi me Barnabas, me Simeon, agai nogi me Husugo Bidi, me bidi Lusius, agai page bulu Sairini, me bidi Manain, te moni gavman bidi Herot aga age, tama me bidi nogi Sol.

1 Korin 12:28

Tama te Godigo po odobo we bidi hani tomode Godigo aga digi te sę dodolama, tama tigidali bidi te haniani sęba muani. Te hasia te po sela pabo bidi dabe nigilali, te si wali te Godigo po pusabo bidi dabe, te sela wali te agai po ola mabo tisa bidi dabe muani. Te dabe tudi badu nosali te bomo menama, te bomai sę ebo bidi dabe nigilali. Tama nosali ma te gasi yai bidi dabe usu ilibo bidi dabe elalubo, tama te we bidi dabe tau sabo bidi me, tama te haniani sę dabe tonaluabo bidi dabe muani, tama haniani homugo konesiąbo pogo po wabo bidi nigilai.

2 Korin 5:10

Magi baso meni. Dago koneani, da tigidali te Kraisgo po tųde hania hanilama pedalaibao. Tama da megi e bidibo tigi dali bidiyu tama wiegi yai kolesaga ebaso, ma dago dwai kolesaga eyu me yali da, teda da tigidali deli deli te dena yali kolesagade usu nama tama dago te tiwai saibao.

Efesus 4:11

Tama aga digi agai naga agai te wiegi yai nai dabe bidi dabebolo e tiwai olo mawai: te agai meba bidi augwalibolo Godigo po sela pelama pusigi pabo sę yabo bidi nigilai. Bidi me badubolo agai wabo po ola mabo bidi te sęba muai. Bidi meba augwaligo Godigo wiegi yai po pusa mabo sę yabo bidi nigilai. Tama me badu bidibolo te Godigo we bidi hani tonalubo sę dali te Godigo po ola mabo sę dali emainu agai te sę augwalibolo mawai dao.

2 Timoti 1:7

Augwali te Godigo bomai pode te po ola mabo tisa bidi bidabo godolo homu ebo dao. Tiali goli augwa digi augwa wabo po page me konebe, tama augwaligo bomonama tama “Awe, dago gisiga koneani, te dago ola mabo po te mu po naga dao” wali goli, augwaligo te ola mabo po page me konebeo.

2 Timoti 2:7

Tama tede Godigo ena te agai po sela pabo sę bidi mubaso, tama eno agai po pusubo sę elalubao. Eno mu po naga obao, eno tibo po me wabeo, te Israel hani isiąwai bidi dabebolo po ola mabo tisa bidi agai ena nigilali, te eno augwalibolo te Godigo mu po dali te Kraisde konealubo po augwa homugo dąų wabo kolesaga me eno ola momainogo yali.

Polgo Si Wali Pas Timotiba Asęani - 2TI 1:11

Godigo te wiegi yai gesi po pusubo sęba ena mubaso, tama ena te po pusubo bidi bidiyu, tama ena te Godigo sęba tagala palali sę ebo po ola mabo tisa bidi dao.

Hibru 13:17

Te duga tobolu bidi dabe augwaligo dage tau sabo homu elama, tama augwaligo dage sesemane sogo tonalubo dao. Magi baso meni, nosali augwaligo digi yali sę po tigidali te Godibolo pusaibao. Tama dagego augwaligo ola mabo po wali pelama, tama augwali dologode bidao. Te dagego tama tibaso da, teda augwali wiegi yai homu pemene elama, tama augwa sę tulama sę eyu, tama augwali homu sęgę me egobeo. Tialima augwaligo dage tonaluabo te homu sęgę ebaso da, teda te tebogo te dage tau me sogobeo.

Jems 1:16

Eno dwagi yai ama dedeo, dagego homu te dwai sę ebode geda mugimio. God agai we bidi dwai sę yao olama sinabaso, te dwai sę ebo menio. God agai te dwai sę egobeo. Te menio. Te Godigo tigidali dwagi yai olo mabo kolesaga me, te tigidali agai da mabo nai te dwagi yai mu dao, tama te dwagi yai sę tigidali dagaludu asobo dao. God agai naga te dagalude ula ebo nai tigidali nigali bidi, agai te dabolo dwagi yai sę naga tǫba mabo dao. Tama God Aya agai te kolesaga subigila hasegelebo menio. Aga te magi nai me giligade noma pedalobo tiwai eyu, tama te noma bobobage elama, pęwadage ma eyu ebo, God agai te tiwai egobeo.

Jems 1:19

Eno dwagi yai ama dedeo, dagego e po pagede bugagia kone palama, koneao. Dagego te po odabo homu sisi elama, wabo po odao. Te dagego polo asesa te po weyu, tama dagego polo wado po wabo homu olamu dao. Dua yao, sębę polo egimio.

1 Pita 5:3

Tama kolesaga hagoma elama, tama dwai homu eyu te Godigo dagego nogoba muani we bidi tama tonalugio. Woo, te dage te dwagi yai sę ebo tųdu polasa pao, te augwali dage wali asomainu, te kibu sipsip augwali te augwali tonalubo bidi wali pomainogo aga polasa pabo tiwai gilama yao.