Jems 1:5 - Godigo dwagi yai po buku

⁵ Tialima, dage tomode te bidi me deli aga te sę yabo kolesaga habuge ebaso da, te agai God hanalu wao, dwagi yai kolesaga momainogo hanalu wao. Tama Godigo agabolo mawaibao. Wado po wagobeo, God agai tigidali bidibolo augwaligo hanalu wali nai mabo dao. Agai dwagi yai homu eyu augwalibolo nai olo mabo dao.

Jems 1:5 Iomraidhean Croise

Tuni Bidi Dabego Po Elalubo Buku Deli 22:12

Te eno homugo Genuai Bidigo te wiegi yai homu konebo homu kolesaga nagebolo menama, tama nago te dago Genuai Bidi te Godigo bomai po tigidali wali paibao, te agai nage te Israel king pedalumainu ilibo sogo te tama tiaibao.

Tuni Bidi Dabego Po Elalubo Buku Si 1:10

Tama eno homugo nago enabolo wiegi yai hobolu du dali, wiegi yai kolesaga dali momainao homu ebao. Te tama tilama da, eno te we bidi bugagia tonaluabo usu yaibao. Tialima meni eyu da, teda nago te genuai we bidi hani tonaluabo bidi meni yaibao. Eno deligo eno usu munu me egobeo,” Solomongo te po wai.

Godigo Nogi Ugwaba Sabo Tęąbi Po Wabo Buku Dabe 51:6

Nago homugo te eno nage dolo naga wali asiyu, tibo kolesaga igio homu ebao. Tama tibaso, nago ena dwagi yai homu kolesaga ola mao.

Ma Dobola Sali 31:3

tama agabolo eno homu kolesaga te bomo mawai. Tama eno agabolo te wiegi wiegi yai nai gol, me silva, me bras nigabo wiegi yai homu kolesaga mawai dao.

Ma Dobola Sali 31:6

Tama me te Oholiap te eno sa muani, te Ahisamakgo ogwa, tama te Dango hani, tama aga te Besalel dali te sę emainogo yaibao. Tama eno genuai wiegi yai homu kolesaga te gasa bidi dabe mebabolo menama, tama augwaligo eno te po weyu nigao wali nai nigimainogo te usu yaibao.

Bugagia Bidibo Kolesagade Po Asęai Buku 8:17

Tama mena we bidi dabego ena gegebo sę bomo eyu da, teda augwaligo ena sueibao. Mena we bidigo ena wei yali da, eno me te eno augwali wei mu yaibao.

Matyu 11:20

Te Galili tǫde Jisasgo te hanu mebade te bomai sę hauwa mu yali goli, te hanude bidibo hani augwaligo augwa dwai kolesaga yalide ge neyu, homu begelama dwai kolesaga yali tagalasiąbaso, te Jisasgo augwali sesanobo po weyu te po wali,

Dwagi Yai Gesi Po Makgo Asęani 16:14

Nosali badu te wali pali bidi dabe nogo si olama sągągo deli te augwali dugulama nai tubadi, tama Jisas te augwaliba pedalai. Te augwaligo agai wali poba augwa homu dąų me wasiąbaso, tama agai augwaliba wado ilali. Magi baso meni, augwaligo olo te palialu, tama te we bidi augwaligo suali, aga te ma hodaloai yali po wabo te augwaligo homu teba dąų me wabeo.

Dwagi Yai Gesi Po Jongo Asęani 14:13

Tama dagego magi nai po hanalu obaso da, Godigo aga Ogwade moni nogi somainogo, te eno dage tau saibao.

Dwagi Yai Gesi Po Jongo Asęani 15:7

Dage ena dali wadolama bidiyu, tama eno wali po dage dali bidiyu da, tiali dagego magi naide hanalu obaso da, tama te eno dagebolo mawaibao. Dagego homu koneani gilama, dagebolo tama pedelaibao.

Dwagi Yai Gesi Po Jongo Asęani 4:10

Jisasgo te webolo po wei ponoyu, te po wai, “Nago te God agai te we bidibolo olo mabo nai konegi sogo da, tama ena mena bidigo nagebolo ‘Aį ena mao, ena tueio’ obao konegi sogo da, te si nago konegi sogo da, teda nago ena hanalu olama, eno nagebolo te bidabo bomo elalubo ąį mao wagi da,” Jisasgo te po wai.

2 Korin 2:16

Te bidi dolabo tų tomode bidibo hanigo te odobo denami te isabo denami odobo dao, tama augwali te isabo madi pedalaibao. Tama te Godigo augwali ma sabo tų tomode bidibo hanigo te odobo denami te bidibo ula sabo denami odobo dao, tama agai te bidibo ula augwaliba pedalomainogo yaibao. Te sęde Godigo da tau sisąyu tama dago te sę ebo usu egowe? Mu menio. Tialima aga da tau mu sabo dao.

Jems 3:17

Tiali goli niwai bidi augwaligo te God pagedu asobo te wiegi yai homu kolesaga sabo bidi dabe augwaligo ebo kolesaga e dao: polasa mu, te augwaligo meda isiąwai wiegi yai homu kolesaga wali pabo dao. Tama te kolesaga me, te augwaligo gasa bidi dabe dali wiegi yai kolesaga eyu deli homu elama bidiyu, tama augwali dali homu nagame eyu, tama tiyu augwaligo gasa bidi dabego po wabo odobo dao. Tama augwaligo homu dene eyu, we bidi tau sabo wiegi yai kolesaga ebo dao. Tama tiyu, augwaligo deli homu tiwai naga tigidali we bidi dali ebo dao. Tama augwaligo ugwadu homugo naga augwaligo po wabo menio.

Jems 5:16

Tama tibaso, dagego duga dwai sę yali te duga ama dabebolo pusao, te duga hasi tau somainogo Godibolo te po hanalu wao, te God agai dage dwagi yai ma usu ilimainogo yao. Tama tiyu, te doloba pai bidigo gedu haluasa po wabode bomo elaluyu, tama agai te gedu haluasa po wabogo te we bidi tau sabo sę ebo usu yaibao.

1 Jon 3:22

Tama tiyu, tama dago magi nai me sainogo gedu haluasa po obaso da, te agai dabolo mabo dao. Magi basowe? Dago agai bomo yai po wali peyu, tama agai godolo ebo kolesaga dago ebo dao.