Jems 1:12 - Godigo dwagi yai po buku

¹² Niwai bidi me aga dali te dwai sę yanama sinayu bomo ebadi tama te bidigo dwai sę emainogo te bidi me deligo te dwai sę yao po weyu da, te bidigo te sę isiąma, te bidi aga bomo elama te dwai sę aiyaba elalubaso, te tiwai bidi aga dwagi yai homu eyu bidaibao. Magi baso meni. Agai te dwai sę usu sabo sogo aiyaba elaluama, tama Godigo aga bidabo ula mawaibao. Godigo te po polobadu wai dao, “Niwai bidi agai ena dali dwagi yai homu eyu, godolo mu ebo bidi agabolo te bidabo ula eno mawaibao,” te po wai dao.

Jems 1:12 Iomraidhean Croise

Tigidali Nai Gagalama Nigali Side 22:1

Nosali Godigo Abraham usu sali. Agai Abraham agabolo i olama, te tiwai po wai, “Abraham o!” Tama Abrahamgo te po wai, “Ena e bidibao.”

Nehemia 1:5

Eno e tiwai gedu haluasa po wali, “God, Genuai Bidi, nage te dagalu tonalubo bomai bidi da, tama da Israel dabe nage dologoba pelama bidibao. Nago te dąų wali bomai po te kontrak me deli da dali yali elalubao, tama dago nage godolo mu elama, tama nago po bugagia mu wali pobaso da, teda nago te dąų walali bomai po kontrak te me tagalisiąma, tama nago da godolo mu ebo dao.

Jopgo Po Asęani Elalubo Buku 2:10

Tiali goli, Jopgo wei ponoyu, te po wali, “Nago po te dwai kolesaga yai wego wabo ąǫ te ebao. Ma, dago dwagi yai te Godigo da dwagi yai nai dabe mabode dwagi yai homu ebo dao. Te magi baso dago Godigo dabolo te dwai sęgę mabode dwagi yai homu egobewe?” te po aga webolo hanalu wali. Mu tama, te dwai sęgęgo Jop pedelali goli, agai Godibolo dwai po me deli wabeo.

Jopgo Po Asęani Elalubo Buku 5:17

“Ma, te Tigidali Bomo Elalubo God agai bidi me deli kolesaga dodolobaso da, teda te bidigo dwagi yai homu yao. Tama megi da, agai nage dodolaiba, tiyu nago aga tudi ola maidali weyu.

Godigo Nogi Ugwaba Sabo Tęąbi Po Wabo Buku Dabe 11:5

Genuai Bidigo dwagi yai bidi dali, dwai bidi dali osola subo dao. Agai bomo yai po sela sąbo te bidi agai hagela mu ebo dao. Te bagego gasa we bidi elebo kolesaga ebo dao.

Godigo Nogi Ugwaba Sabo Tęąbi Po Wabo Buku Dabe 119:67

Nago dene me enaba wasiąbadi digi, te eno nago sunumi wali asobeo. Tiali goli, megi da, eno nago po wali pabo dao.

Godigo Nogi Ugwaba Sabo Tęąbi Po Wabo Buku Dabe 119:71

Te wiegi yai mu da, te nago dene mabo sę enabolo yali. Te tiali sęgo nago bomo yai po wali pomainogo ena bugagia ola mawai dao.

Godigo Nogi Ugwaba Sabo Tęąbi Po Wabo Buku Dabe 119:75

Genuai Bidio, eno koneani, nago bomo yai po tigidali te dolo naga mu elalubao. Nago eno ebo kolesaga deli naga dodolabo homu eyu, tama nago enabolo sęgę mawai dao.

Godigo Nogi Ugwaba Sabo Tęąbi Po Wabo Buku Dabe 5:11

Tiali goli, te nago tonalubo we bidi augwali tigidali, augwa wiegi yai homu pemene yao. Augwa te bugai homu mu elama, tama te wiegi yai homu pemene ebo balia sesemane waiyąo. Nago augwali bugagia sesela sao. Tama tiyu, te nage wei mu ebo we bidi dabego nago nogi ugwaba saibao.

Godigo Nogi Ugwaba Sabo Tęąbi Po Wabo Buku Dabe 94:12

Genuai Bidi, nago te bidi me deli dodolomainu eyu, nago bomo yai po te bidi ola mayu da, te bidi aga dwagi yai homu emainao.

Ma Dobola Sali 20:6

Tiali goli, ena godolo homu elama, tama eno bomai po tigidali wali pabo we bidi bidibaso, teda eno augwali me godolo eyu, te augwaligo wai dabe hauwa 1,000 mu nosali pedalobo hani me, te eno augwali dali wiegi yai homu eyu, augwali eno godolo mu yaibao, tama te kolesaga ebo siligobeo.”

Bugagia Bidibo Kolesagade Po Asęai Buku 17:3

Genuai Bidigo te tiwai sulama koneainu yai, da te wiegi yai bidi ma dwai bidi, tama agai te dago haliga usu sula soyu, te gol me silva te siade usu sela subo tiwai ebo dao.

Aisaia 64:4

Polobadu te bidi mego te god me deli tobage bomai sę yali po odobeo, te we bidi tau siyu, te konealu tonaluabo sę. Ma, bidigo aga gedugo te god me deligo te tobage bomai sę ebo subeo. Menio. Genuai Bidi, nago naga te tiwai bomai sę ebo dao.

Sekaraia 13:9

Tama te me badu bugai elalubo te dwagi yai pedalabo sę usu sabo sę ilaibao, te bidi mebago te gol me silva te dwai hogomu sela sąmainogo te isiba ulubo tiwai yaibao. Tama augwaligo gedu haluasa po enaba obaso da, teda eno augwaligo gedu haluasa po wabo odaibao. Tama eno te tama po augwaliba walaibao, ‘Dage da, eno we bidi dabe da’ obaso, teda augwaligo te tama po waibao, ‘Nage God, dago Genuai Bidi dao,’ po waibao,” Genuai Bidigo te po wai dao.

Matyu 10:22

Tama tigidali we bidigo dwai homu mu dage dali yaibao. Magi basowe, dage eno hani bidi mu bidibaso tiaibao. Tiali goli, te bodolu muani sogo tonaluyu bomonama bidibo bidi, teda te bidi aga te Godigo ma dobola siyu, tama te dwagi yai madiba muaibao.

Matyu 25:34

Tama te tuni bidigo aga dolo nogo badu bidibo bidi dabebolo po weyu, te po waibao, ‘Dage da, te eno Ayago dage dali wiegi yai sę mu yai dao. Polobadu mu agai te tǫ nigali sogode agai we bidi tonalubo kolesaga sisi ilama, tama tede dage bidabo madi sisi ilali elalubo. Dage aselama, te bulu tomoba dage asiąo.

Dwagi Yai Gesi Po Lukgo Asęani 6:22

Megi dagego ena te Godigo Bidi Mu wali pobaso gasa bidigo dage dali sesanobo po weyu, dage buluba gudula palu, dage bidasabo po dwai weyu, dage dwai bidi dao obaso da, teda dage bugai homu pemene yao.

Polgo Po Pas Rom Dabeba Asęani 5:4

Tama dago te sęgę tolabo bomo te tiwai dali me bidibaso da, teda da te usu sabo kolesagade dolalubo usu yaibao. Tama da dolalubo si da, teda Godigo da dali dwagi yai homu ebo dao. Tama agai da dali dwagi yai homu ebaso da, teda Godigo nosali da selama tama dabolo aga genuai nogi tiwai genuai nogi me maiabo sogo asobo te dago wiegi yai homu eyu tonaluyu bidibo dao.

Polgo Po Pas Rom Dabeba Asęani 8:28

Tama dago koneani, te augwaligo aga dali dwagi yai homu eyu godolo mu ebo we bidi, te we bidibolo pedalabo sę tigidali te Godigo digi dodolama, tama te sę tigidali te we bidi dabeba pedaluyu augwali tau sabo dao. Te we bidi augwali te Godigo ma saiba po wali we bidi augwali tama agai augwali sa munama i wai dao.

1 Korin 2:9

Tiali goli dago te sę dabe po wabo te Godigo po bukude wali po gilama yali, “Te we bidigo gedugo susiąwani nai, tama odogo me odobe, tama bidigo homuba me pedalisiąwai, te nai digi Godigo sisi ilali te we bidi dabe augwaligo aga godolo mu ebo bage augwalibolo momainogo yai.”

1 Korin 8:3

Tiali goli, te bidi me deligo aga God dali dwagi yai homu eyu godolo ebaso da, teda Godigo koneama, te bidi te Godigo bidi dao.

1 Korin 9:25

Tama tigidali bidigo te nai sainogo homu eyu udabo da, te augwaligo homu dali, te augwaligo tigigo ebo kolesaga dali, te tigidali augwaligo aiyaba elaluyu bugagia tonalubo dao. Te bidi dabego tama tiyu te geanani bidigo sabo dwagi yai nai sainogo tebo dao. Tiali goli te nai polo dolobo nai naga dao. Me ma, dago Godigo po wali peyu te me dolisąbo nai sabo sę ebo dao.

Bomai Po 13:3

Dagego agai po me odamuo. Dago God Genuai Bidigo dage agai pode tulalubowe olama usu somainogo tiaibao. Dagego dago Genuai Bidi dagego homudu, me dagego kolesagadu sese tama aga mu godolo ebowe weyu, ma meniwe olama, tama tiaibao.

Bomai Po 7:9

Dagego te tiali sę wiegila koneiąwe, God dago Genuai Bidi aga deli naga te God mu dao. Tigidali sogo agai aga po dolo wali peyu ebo dao. Tede aga munu me tulalubeo. Tama tialima, agai aga dąų wali po wali peyu yaibao, tama agai te we bidi augwaligo aga godolo eyu, agai bomai po wali pabo we bidi, augwali hani te nosali nosali pedalua pabo bage, augwali 1,000 solo usu siyu, tama agai augwali godolo mu eyu ebo dao.

Bomai Po 8:2

Dagego bugagia mu kone paliąo, God dago Genuai Bidi aga polasa peyu, tama agai dage te bobobage sunumidu asali tau sai dao. Dage te nai meni yai kemi sane bulude dage te kibu be bidi sese si 40, te tama te bulude bilai dao. Tama Godigo haniani sęgę taga palai dao, te dage usu sela suyu, te dagego te tigidali bomai po wali pogowe ma meniwe elama suainogo tiai dao.

Polgo Si Wali Pas Timotiba Asęani - 2TI 2:15

Tialima, te genuai pabo tų bugagia dolo mu nigibo bidi tiwai gilama eyu, tama nago te Godigo mu po dolo augwalibolo ola mao. Tama tiyu, nago naga sęde hale idali weyu, te Godigo nago ebo sęde “Te usu mu dao,” omainogo eyu, tama nago bomo elama, nago sę bugagia yao.

Polgo Si Wali Pas Timotiba Asęani - 2TI 4:8

Megi da te udabo dąį ilaliba pedalali bidigo genuai nogi yai namba te sisi elama ena tonalubao. Te genuai nogi sabo namba te tiwai yaibao: te Genuai Bidigo ena te doloba pai bidi nogi poaibao. Genuai Bidi aga te doloba pai po tų ebo bidi jas, tama te genuai sogo pedalubode agai te doloba pai bidi nogi enabolo mawaibao. Tama agai enaduba delibolo naga te me magobeo. Menio. Te aga hania pedalubo suainu godolo homu ebo bidi dabe tigidalibolo te doloba pai bidi nogi mawaibao.

Hibru 10:32

Tiali goli te dageba polobadu pedalali sę te dagego homugo ma kone palao, te sogo dagego Godigo po odama tama tede te ula sai. Te sogo gasa bidi dabe augwaligo genuai sę dene dagebolo mani, tama dagego dene hauwa tolai. Tiali goli dage bomonama bugagia dolaluai dao.

Hibru 11:17

Polobadu Godigo Abraham usu sai. Hasia bolo Godigo agabolo te po wai, “Te eno nagebolo te bulai wai dabe umabo mawaibao, te po wai dao. Tama megi eno e po obao, te nago ogwa Aisak, te agade te augwali nosali pedalaibao,” te po wai. Tama nosali Godigo Abrahamgo agade konealubo po dąų wabo kolesaga osola suainogo eyu, tama agabolo te po wai, “Nago naga ogwa Aisak digi selama, tama aga ela munama, enabolo te ofa tiwai mao,” te po wai. Abrahamgo koneani, te Aisak da, te aga nosali pedalabo hani we bidi page mu dao. Tiali goli agai te Godide konealubo po dąų weyu, tama agade mu tią pobaso, tama agai te ofa tiwai eyu tamadi tama aga Aisak elama Godibolo mawainogo yai.

Hibru 12:5

Te Godigo dagego homu bugagia dąų walomainogo bomo mayu wali po te dagego homugo gegeda pai dawe? Agai dage te aga wai da olama nogi ilama, tama agai te po wai, augwaligo te bukude asęani, “Te eno waio, te eno nage dodolobo kolesaga me deli nagebolo ebaso da, nago homugo te olo nai tiwai da me wagio. Nago geda muani kolesagade bugagia kone palao. Te eno sęgę nagebolo mayu te nage dodolobaso da, teda nago homu me dolamu dao.

Hibru 6:15

Tama Abrahamgo hauwa sogo bugagia tonaluyu, tama aga hagela polo me isąwai, tama nosali agaba te tigidali sę mu pedalali, te tiwai polobadu te Godigo agabolo te wąį hauwa mawaibao po wai dao.

Jems 2:5

Eno ama dedeo, eno dagebolo dwagi yai homu eyu, godolo mu ebaso, eno dagebolo te po obao. Bugagia odao. Te tǫde tigidali bidi gedude magi nai meni yai bage, te Godigo te tiwai bidi sa munama, tama augwaligo te Godigo po dąų waligo te augwaligo te homu kolesagade te masigi me walu hauwa munalubo bidi tiwai yaibao. Te polobadu Godigo tama po wai, “Niwai bidi agai homu enaba muyu godolo ebo bidi, te aga eno we bidi bugagia tonalubo madi tomoba asagameo,” te po wai. Tama tiyu, agai te magi nai meni yai bidi augwali sa muyu, augwaligo te Godigo po mu dąų waligo da, te augwali te dąį ilali madi te pesage saibao.

Jems 5:11

Tama te tiwai augwaligo te sęgę polobadu bugagia tolai baso, megi dago tama po wabo dao: “Te homu kolesaga dąų olama te sęgę tolali bidi dabe, te bidi megi augwaligo homu wiegi yai eyu bidibao.” Tama gasagi yai bidi me agai nogi Jop, agai yali sę po dagego odai. Te genuai sęgę hauwa te agabolo pedalali digi te agai bomo eyu dolalu, te sęgę te aiyaba elaluai. Tama nosali Genuai Bidigo dwagi yai kolesaga aga dali yai, te me dagego koneai. Tama te bidi Jopde yali sę po odama, tama dago koneani, Genuai Bidi agai da hobede mu eyu, tama sesemane sogo agai da homu dene elama, da agai dwagi yai homu eyu, da olo mu tau sabo dao.

1 Pita 3:14

Tialima dagego te doloba pai sę yai goli te gasa bidi dabe augwaligo dage dene me sogo mayu da, teda God agai dage dali dwagi yai homu eyu dwagi yai kolesaga dage dali yaibao. Tama tibaso, dage augwalide wi egio, te augwaligo dage dali ebo sęde me dage moni homu egimio.

1 Pita 4:13

Dagego te Krais aga dene sali tiwai te dagede me te dene tolobo sę meba megi tama siyu ebaso, tama dage dwagi yai homu yao. Tama nosali aga ma asobo si, aga bomo yai ula te sogo hanilibo si, te dagego aga dene meba ede sobaso tama dage te sogo me te didibili eyu moni dwagi yai homu yaibao.

1 Pita 4:14

Tama dage Krais wali pobaso augwaligo dage dali te nogi posobo dwai po weyu da, teda dage dwagi yai homu yao, God aga moni ula yai Mobo Bidi aga dage dali bugagia bidibaso.

1 Pita 5:10

Tama dagego te sęgę osogo tolama, tama God aga digi agai dage sese bugagia ma ilama, tama dage bomo menama, bugagia mu dąų waibao. Te God aga da te tigidali wiegi yai olo tau sabo kolesaga page bidi dao, tama agai dage i wali, te dage Krais wali peyu, te Godigo bomo yai gamonabo ula meba dagego somainogo yali.

1 Pita 5:4

Tama dage te kibu sipsip tonalubo bidi dabe tiwai bidiyu, tama Krais aga te sipsip tonalubo bidi dabego tuni bidi mu tiwai dao. Tama aga ma asiyu hanilibo si, te sogo dagego te bomo yai ula saibao, te bomonama udayu nai sabo bidi agai te wiegi yai tobolu au yabo nai sabo tiwai. Tama agai au yabo nai osogo elaluyu dolai goli, te dagego sabo bomo yai ula te dolisiąbo nai mu dao.

1 Jon 4:19

Te dago God dali, dena hasi abagi dali te dwagi yai homu eyu godolo ebo kolesaga page e dao: hasia bolo God agai da dali te godolo ebo kolesaga yali.

Kraisgo Geme Dualali Sę Pedelabo Po Jonbolo Ola Mani 2:10

Tama nosali gana gasa bagego dagebolo dene mawaibao. Tiali goli dage te dene sabo sęde wi egio. E po odao. Satango dage meba kalabus iliyu, te dage agai poba asobowe suainogo usu siyu tiaibao. Tama dage te dwai sę ebogo sęgę me dene dali te nogo si sogo usu nama saibao. Gasa bidi augwaligo dage dali te dwai sę eyu, tama augwaligo dage ela mubo sę me eyu da, teda dage enade homu kęą pai bidi dabe bidiyu da, eno dagebolo wiegi yai nai mu mawaibao, te bidada peyu, bidada pabo ula dagebolo mu mawaibao.”

Kraisgo Geme Dualali Sę Pedelabo Po Jonbolo Ola Mani 3:19

Te eno bidi meba wei eyu da, te eno augwali dali wado po weyu, te augwaligo kolesaga eno dodolobo dao. Tama tibaso, nago bomo elama, tama homu hodolama, nago yali dwai kolesagade ge neyu, tama nage homu begelao.

Kraisgo Geme Dualali Sę Pedelabo Po Jonbolo Ola Mani 3:21

Niwai bidigo te dwai kolesaga ebo aiyaba elalubo bidi, te aga dali eno usu da weyu, aga te ena pąde duawaibao, te ena eno tuni bidigo duayabo madide duabo sogo. Te polobadu ena me te dwai kolesaga ebo aiyaba elaluama, tama ena Aya dali agai duabo sia sai te naide dugulalu bidibo dao. Te tiwai te bidi ena dali bidaibao.”