Hosea 10:8 - Godigo dwagi yai po buku

⁸ Te Israel dabego te tibo godiba lotu weyu, te bulu du ugwadu bagede te lotu wabo pesage elaluali, tama Godigo te pesage dabe dolaibao. Tama nosai me te sesane yai bono dabe pedelama, te alta dabe mesegelaibao. Tama te sogo te boi bidi dabede geme duala sainu yali we bidi dabe, tama augwaligo te bulu du dabeba hanalu, te augwali mesega sao po waibao.

Hosea 10:8 Iomraidhean Croise

Tigidali Nai Gagalama Nigali Side 3:8

Te be kedau ebo sogo pio ebode, augwali sigo odali, te Yawe God te gide bilibo odama, tama augwali si te ni dabe elalubo madi tomoba duala sigi pai.

Te Israel me Juda Hani Sigo Tuni Bidigo Po Elalubo Buku Deli 13:2

Tama te Genuai Bidigo homugo te alta po elalubaso, tama te profet bidibolo te e tama po pusa mao po agabolo ola mani, “Alta sai, ena Genuai Bidi God da, eno nage dali po elalubao. Ogwa me deli, agai nogi e dao, Josaia, te ogwa aga te Devitgo hanidu pedelaibao,” wali. “Tama aga king bidi nigilama, bidibo sogo da, tama agai naga ugwadu te ofa nai ulubo pris bidi dabe selama, tama agai augwaligo augwa tigi te nage baude ugwadu daiba munama, tama augwali elama, isilaibao. Tama agai te isali bidi dabe dili selama, tama te ugwadu nage baude uluyu, tama nage tigidali meda mu ilaibao,” te po wali.

Te Israel me Juda Hani Sigo Tuni Bidigo Po Elalubo Buku Deli 13:34

Te king Jeroboam dali, te aga hani dali, augwaligo te tama sęgę sabo dwai meda yai kolesaga me eyu gęani, tama augwaligo augwa te dwai kolesagago sęgę me sę edu gęani. Tama te tiali bagego da, Genuai Bidigo te king Jeroboamgo hani tigidali nosali mu dolali.

Te Israel me Juda Hani Sigo Tuni Bidigo Po Elalubo Buku Deli 14:16

Tama te king Jeroboam agai me te sęgę sabo sę me eduali, tama agai te Israel hani augwali me kegelama, tama sęgę sabo kolesaga eyu sęgę sali. Tama te Genuai Bidi Godigo te augwaligo te sęgę sabo kolesaga homu kone palama, tama agai te Israel hani dabe augwaliba agai tudi ola mani,” Ahiyago te po wai.

Te Israel me Juda Hani Sigo Tuni Bidigo Po Elalubo Buku Si 23:15

Polobadu te king Jeroboamgo, te Nebatgo ogwa da, tama agai te ofa nai muabo alta sai me deli nigali, tama te lotu po wabo bulu du pesage me deli te taun Betelde nigali. Jeroboam aga te king te polobadu Israel hani kegelama, tama te Genuai Bidi gedude dwai kolesaga haniani elama, sęgę sali. Tialima, megi te king Josaia aga te taun Betel buluba pelama, tama te bidi dabe augwalibolo e tama po ola mani, tama augwaligo te lotu po wabo pesage me dolama, tama te alta sai me hųginama, sąyani. Tama augwaligo te lotu po wabo pesagede te sia dogonama, tama nosali augwaligo te sisi dabe selama, tama augwaligo te haluama, tama te pauda gagawai mu pedalali. Tama me te augwaligo tibo god we Asera noma piksa elalubo pos ni selama, tama augwaligo siaba ulali.

Tuni Bidi Dabego Po Elalubo Buku Si 31:1

Tama nosali te genuai lotu po wabo sogo silibo si, teda te Jerusalemba sisinagasali we bidi sese augwali te Juda dabego taunba dabe pepelayali, tama augwaligo te tibo god piksa elaluali masigi pos aluama tagalali. Tama me augwaligo te tibo god we Asera piksa elalubo ni pos gelebadi elama dolama, tama augwaligo te tibo godiba lotu wabo pesage me alta dabe dolama tagalali. Tama me augwali te Juda hanigo tǫba, me Benjamin hanigo tǫba, me Manase hanigo tǫba, me Efraim hanigo tǫba pelama, augwaligo te tibo god dabego nai dabe dolama tagalali. Tama augwaligo te meba nai dabe sulama me tagalobeo. Tama nosali augwali augwa buluba ma pali.

Aisaia 2:19

Tama te sogo Genuai Bidigo te tǫ mali iliyu, tama e tǫde nai dabe wi mu ilaibao. Tama te we bidi dabe me wi mu elama, tama masigi dudulaweba me, tǫ dudulaweba me, wi duala sigi paibao. Te augwaligo Genuai Bidi aga bomo dali, genuai ula dali, asobo augwaligo suidali weyu.

Aisaia 2:21

Tama te sogo da, Genuai Bidigo te tǫ mali iliyu, tama tǫde wi mu yabo sę dabe yaibao. Tama te we bidi dabe me wi mu elama, te masigi ola beba me, bulu du dologode elalubo masigi dedageba dabe wi duala sigi paibao. Te augwaligo te Genuai Bidi aga ula dali, bomo dali, asobo augwaligo suidali weyu.

Aisaia 32:13

Tama dagego eno we bidigo tǫ hagede dage hobedai gela waiagameo. Magi baso meni. Te dwai sesane bono me dwai nosai dabe te bulu tǫde koliaibao. Awe, dagego duga te gana peyu ebo te be dabe homu kone elama, tama dage hobedai gela waiąo. Tama me, dage te duga te gawelama bidibo te hanu dabede me hobeda gela waiąo.

Aisaia 34:13

Te sesane yai bono me nosai dabego te kingo be, me gasa be dabe mesegelaibao. Te bulu uni yowi dabe bidagaselama, te badu i wagasobaso, te uni ba dabe te beba piagasaibao wali.

Hosea 10:2

Augwali te tibo po naga wabo bidi tiwai yali, tialima megi da, te augwa yali dwai sęde te dwai dene saibao. Godigo te augwaligo alta ela besela sąnama, tama agai te augwaligo bulu hǫą bidi noma nigali pos ni te dolaibao.

Hosea 10:5

Te bulmakau gol Betelde elaluali te dolaibao, tama te taun Samariade bidali we bidi te augwali wi elama, te bulmakaude homu dene yaibao. Te tibo godide sę ebo we bidi, me pris dabe, augwali agade te homu dene eyu, gela waibao, magi baso meni, te Asiria dabego aga au dobage hųgia sąnama, te aga dolaibao.

Hosea 10:9

Tialima, Genuai Bidigo te po wali, “Polobadu te Israel dabego te Gibeade enaba dwai sę yali, tama augwaligo te kolesaga tagalobeo. Tialima, te boi bidi dabego te Israelba hwįagaselama, tama te hwį hwį pali, te Gibeaba usu nigi paibao.

Hosea 2:6

Tama te homu ebaso, te eno ni sesane dabe selama, te we bidibo pesage bagulama elalueibao. Te eno aga soabo sunumide obogo togwa palama, tama aga te bidi dabeba ma pobaso, te usu me egobeo.

Hosea 4:13

Augwali te bulu duba holama, te tibo god dabeba ofa eyu, tama te wiegi yai denami ebo ofa me, te habu selali pesage te genuai ni page dologode te ofa ebo dao, magi baso meni, te ni dologode te wiegi yai tiwąi madi elalubaso yai.” “Tama tiyu, duga wegi dabe te sunumide bilalubo we dabe tiwai ebao,” wai. “Tama duga wąį we dabe me te penani ela bilibo dao.

Hosea 4:15

“Dage Israel we bidi te penani we tiwai elama, tama dagego ena tagalalio. Tiali goli, tiyu dage te Juda we bidigo te tobage kolesaga tiwai igimio. Dage munu me te tibo lotu te Gilgalba ma te Betelba me wagi pelamuo. Dagego te tebo kolesagago te Betel te dwai pesage pedalubo tiwai ebao. Tama teyu, te eno be tiwai ąǫ me egobeo. Tama te bulu pesage side, dagego te po dąų walobo po te eno nogide me wagio, ‘Genuai Bidi te sesemane bidada pabo dao.’

Hosea 5:8

“Dage Gibea, dage Rama, dage Betel, dage Benjamin, te bu wabo nai biugel bu waiąo. Bomonama i wao. Udada peyu, te boi hwiąo.

Hosea 8:5

“Eno te bulmakau gol te Samaria dabego nigali te lotu wabo eno hagela mu yai. Eno wado po dwai mu augwaliba wali. Eno homu augwa te dwai kolesaga polo tagalomainu yai. Tiali goli, te me tebeo.

Hosea 9:6

Nosali te genuai sęgę yai sę, te dage dolabo sę te pedalubaso da, teda dage wi tedela paibao. Tama te Isip dabego dage suyu da, te dage selasa peyu, te Isipba kalabus iligi paibao. Tama tede dage bidaludubadi, te dage isibo siba usu nama, te augwaligo dage te Mempisde pubulaibao, te augwa genuai taun dao. Dage te duga pesage buluba ma asogobeo. Menio. Tama te duga be dabe, me mone silva, me te wiegi yai doado bage te olo bulu tomode elalubadi, te genuai bus holama, te tigidali mesegelaibao.

Amos 1:5

Eno te Damaskus genuai taun te genuai sunumi dąų walobo ain ba dabe te togolama, mimia sąwaibao. Tama eno te Odogo Bulu Avende bidali we bidi tigidali sela sąnama, ela gudulubadi, tama eno te tǫ kantri Beteden king bidi me ela gudulaibao. Tama te Siria hani bage te tǫ kantri Kirba kalabus paibao, te giliga pedalubo badu elalubao.” Te po da, Genuai Bidigo po dao.

Amos 3:14

Eno te Israel dabeba augwa yali dwai sę wei ponobo sogo, teda eno te taun Betelgo alta sai dabe dolaibao. Tama eno te tigidali altade elalubo gąų yai nai kom dabe alueibao, tama te kom gąų dabe te tǫba tutula palaibao.

Amos 7:9

Te bulu te Israel dabe, te augwali Aisakgo wąį nǫų hani dabe, te augwaligo lotu wabo pesage dabe te mu dolaibao. Tama eno te king Jeroboamgo hani dabe mu silimainu ilaibao,” te po wai dao.

Amos 8:14

We bidi mebago te Samaria dabego tibo god dabego nogide po dąų walobo dao. Augwa nogo guni sisu muyu, augwaligo te tiwai po wabo, ‘Mu da, te taun Dango tibo god nogide,’ wabo, ma, ‘Te Berseba taungo tibo god nogide mu da,’ po tiwai wabo dao. Tialima, te we bidi augwali da isama, te augwali ma hodalugobe dao,” Genuai Bidigo te po wai dao.

Maika 1:13

Dage te Lakis taun we bidi dabe, dagego te karis dabe selama, te udabo mu koneai hos dabeba gebelama, te wi pomainao. Magi baso meni, dagego te Israel dabego dwai kolesaga ebo wali pali, tialima dagego te Jerusalem tulalumainu yali dao.

Maika 1:5

Te tigidali sę pedelaibao, magi baso meni, te Israel dabego dwai sę eyu, te Godigo po sela sąwani. Te hagoma ebo kolesaga te Israelde elaluali, te sę page dego dawe? Te Samaria dabede naga dao. Te Juda tibo godiba lotu po wali kolesaga, te sę page dego dolai dawe? Te page Jerusalem dabede naga elaluai dao.

Nahum 3:11

Dage Ninive dabe, dage me te Isip dabe yali tiwai pedelaibao. Dage te bomai ąį tulama gęo page ebo bidi tiwai eyu, te dagego homu kolesaga te umuna pelama, te dage tulalueibao. Te dage duga boi bidi dabede wi painu yaibao.

Dwagi Yai Gesi Po Lukgo Asęani 23:30

Tama tebo sogo da, augwaligo te bulu dubolo te po waibao, ‘Te bulu du, dage daba degasa dulao.’ Tama te dwasianu bulu dubolo me te po waibao, ‘Dagego da mesega sao,’ te po waibao.

Bomai Po 9:21

Dagego te kau kibu wai geselama, tama dage sęgę sali. Tama tibaso, eno te kau kibu selama, tama eno isiba sąwani, tama eno tigidali miminama, tama tigidali tama hogomu tiwai gagawali, tama eno te hogomu te bulu dude gomo elalubo węba aiyaba gea palali,” Mosesgo te po wali.

Kraisgo Geme Dualali Sę Pedelabo Po Jonbolo Ola Mani 6:16

Tama augwaligo te bulu du dali masigi dabe sibolo i weyu te po wai, “Dagego da mesega sigulao, te genuai tuni bidi duabo naide dulalubo bidigo da suidali weyu, tama te kibu sipsip waigo sębę elalubo te aga gesabidide da duala saio, agai da suidali.

Kraisgo Geme Dualali Sę Pedelabo Po Jonbolo Ola Mani 9:6

Te tama tebo sogo, polua a naga sogo, te bidi dabe augwali te isabo tų gegebo sę ebadi, tiali goli augwaligo sugobeo. Awe, te augwaligo homugo te isabo homu godolo yai, tiali goli te isibo augwali suyu wi paibao.