Kolesaga Koneai Bidigo Pusali Po Elalubo Buku 6:12 - Godigo dwagi yai po buku

¹² Da bidi te pęwadage sogo naga te tǫde bidibao, te ni noma elaluali te pǫgo giliga ge sesela sąbo si te polo menia sabo tiwai ebao. Te dago bidibo ulago page meni yai elalubao. Tialima, mena wiegi yai kolesaga dago wali pabo usu yabo te dego koneaibawe? Te da isai madigi, te magi nai mu e tǫde pedelabo dego mu koneaibawe?

Kolesaga Koneai Bidigo Pusali Po Elalubo Buku 6:12 Iomraidhean Croise

Tuni Bidi Dabego Po Elalubo Buku Deli 29:15

Te nago gedude da te bulu wau bilibo bidi tiwai ebao. Te dago dena wąį nǫų hani dabego yali sę tiwai gilama yalio. Te dago e tǫde dena bidibo ula dago dąų obaso usu egobeo. Da te plaua dabe pedalubo tiwai elama, te pęwadage sogo bidama, te isibo dao.

Jopgo Po Asęani Elalubo Buku 14:2

Da te plauwa tiwai kigamu pedalama, pio ma sasia pabo tiwai dao. Tama me e tiwai dao. Giliga noma pedalobo tiwai, tama pǫgo giliga polo halua sabo tiwai dao.

Jopgo Po Asęani Elalubo Buku 14:21

Tama nosali da, te we bidi dabe augwaligo augwa ogomanibolo genuai nogi mabode, o ma augwaligo nogi aiyaba elaluama, augwali hale ilibo si da, teda te isila pali bidi dabego te sę koneyu, suyu me egobeo. Mu meni.

Jopgo Po Asęani Elalubo Buku 8:9

“Magi baso meni. Da tǫde pęwadage sogo bidibo dao, te bidigo tigi noma te tǫde osogo elalubo tiwai bidibo dao. Tama polo tama hagawaibao. Dago dwasianu kolesaga naga elalubo.

Godigo Nogi Ugwaba Sabo Tęąbi Po Wabo Buku Dabe 102:11

Eno bidibo ula te pęwadage sogo naga bidibao, te giliga pio dega sabo tiwai yali. Ena te nosa wa pai tiwai yai dao.

Godigo Nogi Ugwaba Sabo Tęąbi Po Wabo Buku Dabe 109:23

Ena te pabo tiwai eyu, te eno noma te giligade subo tiwai elama, tama te giliga dega sigilubo sogo, te pio ebode silaibao. Ena te tǫde bidalubo nai tiwai te waligo selasa pabo tiwai ebo dao.

Godigo Nogi Ugwaba Sabo Tęąbi Po Wabo Buku Dabe 144:4

Da te pedauwalide mobo deli sogo naga te pedalubo tiwai ebao. Da te pęwadage sogo naga bidibao, te giligade noma pedelama, tama te polo hagabo tiwai ebao.

Godigo Nogi Ugwaba Sabo Tęąbi Po Wabo Buku Dabe 16:5

God, nage deli eno God mu, tama eno gasa nai me menio. Tama nago eno sǫą pali nai tigidali ena mawai. Eno bidibo ula nago tolalubo dao.

Godigo Nogi Ugwaba Sabo Tęąbi Po Wabo Buku Dabe 17:15

Tialima, ena da, eno augwalide dwai sę me deli isąma, tama nosali eno nage mu sueibao. Nosali ena piali tagalama, ena hodaluama, tama nage ena dali bidibo sulama, ena dwagi yai homu mu yaibao.

Godigo Nogi Ugwaba Sabo Tęąbi Po Wabo Buku Dabe 4:6

Bidi hauwago te tama po wabo dao, “Dago te wiegi yai nai dabe sobaso da, teda dago homu pemene wiegi yai yaibao,” wabo. God, nago te olo mu tau sabo wiegi yai kolesagago te da tau sao.

Godigo Nogi Ugwaba Sabo Tęąbi Po Wabo Buku Dabe 47:4

Godigo digi te tǫ me deli dąį ilama, tama dabolo mawai dao. Da te Jekopgo hani da, Godigo da godolo mu eyu, tama dago te dena tǫde wiegi yai pemene ebo dao.

Godigo Nogi Ugwaba Sabo Tęąbi Po Wabo Buku Dabe 89:47

Genuai Bidi, iya, nago te pęwadage sogo naga bidabo bidiba homu kone palao. Nago da nigali, tiali goli da te isaibao. Nago odolali da nigali da, agawe?

Kolesaga Koneai Bidigo Pusali Po Elalubo Buku 10:14

Te wiegi yai homu kolesaga elalusiąbo bidigo po oda pidu gebo dao. Te magi sę nosali pedelabo dago konebeo. Te da isai madigi, magi sę e tǫde pedelabo dago konebe dao.

Kolesaga Koneai Bidigo Pusali Po Elalubo Buku 12:13

Te tigidali po siminagasu, eno te tiwai po obao, te da bidigo bidibo ulade polalubo sę te tiwai elalubao. Dago God naga dologode bidiyu, tama agai bomai po dabe wali pao.

Kolesaga Koneai Bidigo Pusali Po Elalubo Buku 2:24

Dago nai me ąį me tuyu, te dago yali sęde wiegi yai homu pemene eyu bidibaso da, teda usu dao. Po meni. Te sę da bidigo naga me ebeo. Menio. God agade digi te page elalubao.

Kolesaga Koneai Bidigo Pusali Po Elalubo Buku 2:3

Eno te wiegi yai homu kolesaga page gegelama, suainu ebo sę yali, eno te wain ąį tubo kolesaga usu siyu, te tobage pemene homu ebo kolesaga dabe yali. Eno te gegelama koneainu yali, te mena sę mu te we bidi augwali te dwasianu pęwadage sogo e tǫde wiegi yai bidabo te koneainogo yai dao.

Kolesaga Koneai Bidigo Pusali Po Elalubo Buku 3:22

Tama tibaso, eno te tama sęde homu kone palama, eno koneani, te kolesaga me deligo uganu igulai mu elalubao. Te kolesaga e tiwai elalubao. Te da isibo si, te nosali e tǫde pedalubo sę te dago konegobeo. Tama tibaso, dago megi ebo sę tigidalide wiegi yai homu pemene inao. Magi baso meni, Godigo dago te sę emainu bodolu muai dao.

Kolesaga Koneai Bidigo Pusali Po Elalubo Buku 6:11

Dago bobobage po wabosi, te tagalao, te usugobeo, dago aga aiyaba elalugobeo. Dago po olo tama waibao, tama tebogo da tau mu sogobeo.

Kolesaga Koneai Bidigo Pusali Po Elalubo Buku 7:15

Eno bidibo ula te olo nai tiwai elalubao, tialima ena te tǫde bidibo sogo eno te haniani kolesaga ebo suali. Eno suali, bidi mebago doloba pai kolesaga wali pali, tiali goli te bidi dabe augwali isalio. Te bidi mebago dwai kolesaga ebo eno suali, tiali goli augwali bobage sogo sesabi elama, bidibo dao.

Kolesaga Koneai Bidigo Pusali Po Elalubo Buku 8:13

“Te dwai kolesaga ebo bidi da, te aga bugagia me bidigobeo. Te aga pęwadage sogo naga te tǫde bidaibao, magi baso meni, aga te God dologoba pelama bidibeo.”

Kolesaga Koneai Bidigo Pusali Po Elalubo Buku 8:7

Te mena sę nosali pedelabo dago konebeo. Te sę dabe yaibao po mena bidigo dabolo me wagobeo.

Kolesaga Koneai Bidigo Pusali Po Elalubo Buku 9:6

Te we bidi augwali isibo sogo, te mena nai godolo yali, me te wado homu yali, me te augwaligo mena nai pesą yali, te tigidali silalio, tama te we bidi dabe augwaligo magi sę deli munu me te tǫde me egobeo.

Kolesaga Koneai Bidigo Pusali Po Elalubo Buku 9:9

Dago bidibo ula te olo nai tiwai ebao, te aga page meni yai elalubao. Tialima, nago te we deli godolo homu mu ebaso da, teda tigidali side te Godigo nage da olama, dąį ilali te tǫde bidibao, nago te we dali wiegi yai homu pemene yao. Godigo te kolesaga yabo sę nageba dąį ilali, te nage tǫde bidibo sogo nago te sę emainogo yali.

Maika 6:8

Genuai Bidigo dabolo te wiegi yai kolesaga yabo po walio. Tama agai homugo dago te tiwai kolesaga naga emainu yai. Dago te doloba pai kolesaga wali pao, te gasa bidi dabe homu dene eyu, tau sao, te dena homu kolesaga digi tegaluama, te dena God dali deli haliga elama bidiyu, tama aga wali pabo usu dao.

Jems 4:14

Dagebolo magi nai te do pedalabo te dagego konebeo. Tama dagego bidibo ula te mena tiwai dawe? Te dagego bidibo ula e tiwai elalubao te kigamu pǫ holama, tama te giliga asobode te po polo hagabo tiwai, te da bidigo bidibo ula te tiwai osogo naga ebo dao.