Kolesaga Koneai Bidigo Pusali Po Elalubo Buku 1:13 - Godigo dwagi yai po buku

¹³ Eno te e tǫde pedelali nai tigidalide homu kolesaga koneabo homu mu yali, tama eno te page hania mu bugagia dagala sigi da homu kone palali. Tiali goli, te sę Godigo dabolo mani te genuai sęgę mu elalubo dao.

Kolesaga Koneai Bidigo Pusali Po Elalubo Buku 1:13 Iomraidhean Croise

Tigidali Nai Gagalama Nigali Side 3:19

Te nage sę dene eyu, posolo pedelama, tama te tǫde nai pedelaibao. Tama nage sę dene sesemane sogo iduama, tama nago isabo sogo usu nigi pelama, tama nage te tǫba ma paibao. Magi baso meni, eno te tǫgo nage nigali, tama nage te tǫba ma paibao,” Godigo te po wai.

Jopgo Po Asęani Elalubo Buku 28:3

Augwaligo tǫ dedage tomoba mu dogobo dao, te ain dabe elalubo masigi dabe sainu tibo dao. Augwaligo lam sole domanama, te tǫ tomoba dogobo dao. Tama te lamgo te tǫ dedagede ula ilama, tama augwaligo te masigi dabe bugagia suyu, tama augwaligo sabo dao.

Godigo Nogi Ugwaba Sabo Tęąbi Po Wabo Buku Dabe 111:2

Genuai Bidigo te polalubo sę dabe mu ebo dao. Te we bidi dabego te Genuai Bidigo ebo sę te wei mu yali, augwaligo te sę dabe te bugagia koneainu homu yalio.

Bugagia Bidibo Kolesagade Po Asęai Buku 18:1

Te abagi homu isiąbo bidigo, agai homu te agade digi naga elaluaibao. Te gasa bidi dabego te wiegi yai homu elalubo te tagalu, te bidigo te augwaligo ebo homuba wei eyu godolo me egobeo.

Bugagia Bidibo Kolesagade Po Asęai Buku 18:15

Te wiegi yai homu kolesaga elalubo bidigo, agai te haniani nai dabede homu konea sabo sę bomo ebo dao. Agai olo te aga ola mawainu ebo bidiba bugagia mubo dao.

Bugagia Bidibo Kolesagade Po Asęai Buku 23:26

Ogwao, nago eno po bugagia odolama, tama eno kolesaga suyu, wiegi yai pemene yao.

Bugagia Bidibo Kolesagade Po Asęai Buku 25:2

God Genuai Bidi aga homude digi te nai hauwa geme dualaluai. Tama tiyu, dago genuai nogi agaba mayu yali. Tiali goli, kingo te dade geme dualalubo homu kolesaga page hauwa te page hanilainu gegebo sę ebo dao. Tama tiyu, dago genuai nogi agaba mabo dao.

Bugagia Bidibo Kolesagade Po Asęai Buku 4:7

Te polasa nago sabo nai, te wiegi yai homu ebo kolesaga. Mu tama, te nago gasa nai hauwa sainu ebadi, tiali goli wiegi yai homu kolesaga da, te polalubo hasia nai mu dao.

Kolesaga Koneai Bidigo Pusali Po Elalubo Buku 1:17

Eno te wiegi yai homu kolesaga hanilabo sę bomo yali, te kolesaga umuna pabo tobage sę page me gegabo sę bomo yalio. Tiali goli, ena odolali sę dene yali, te bidi me deligo te wali tola sainu pobebo tiwai yalio.

Kolesaga Koneai Bidigo Pusali Po Elalubo Buku 11:5

Godigo tigidali nai nigali. Tialima, te waligo wali pabo tų menadewe, te dago konebe. Ma, magi elama te gesi wai bǫų te idago haliga tomode bidibo ula elaluali, te me dago konebeo. Te tiwai naga te Godigo ebo sę dabe te dago koneabo usu meni ebo dao.

Kolesaga Koneai Bidigo Pusali Po Elalubo Buku 12:12

Eno waio, eno po me deli mu ma nagebolo wabo homu ebao. Te buku asębo bidi dabego te buku hauwa mu asębo dao, tama te tobage sę silabo me elalubeo. Te nago te buku sesemane sogo nedebo sę ebaso da, teda nago tigi hagela yaibao. Tibaso, nage te kolesaga ebode dua dao.

Kolesaga Koneai Bidigo Pusali Po Elalubo Buku 2:23

Da e tǫde bidibo sogo, tigidali naigo da homu kone tųą palama, mone homu sęgę hauwa ilaibao. Te hulide dago homu kone palubo sę hauwa dogia pidubadi, te dago toma me tusiąwaibao. Te tebo kolesaga me page meni yai elalubao.

Kolesaga Koneai Bidigo Pusali Po Elalubo Buku 2:26

Te we bidi mebago te Godigo homu wali pobaso, tama agai augwali dali dwagi yai homu ebo dao. Agai augwaliba te wiegi yai homu kolesaga menama, te augwali pemene ilibo dao. Tiali goli, te tobage kolesaga isąwai bage, te dwai sę ebo bage yaibaso da, teda agai augwaliba te sę dene menama, te sali nai hauwa te sisinama, te Godigo dwagi yai homu ilibo we bidi augwaliba momainu ebo dao. Te sę dene eyu, doado bage hauwa sabo kolesaga me te page meni yai elalubao, te bidi udayu, te wali nogogo tola sainu ebo tiwai ebo dao.

Kolesaga Koneai Bidigo Pusali Po Elalubo Buku 3:10

Te tobage sęgę tigidali Godigo dabolo mubo eno mu konea palio.

Kolesaga Koneai Bidigo Pusali Po Elalubo Buku 3:11

Godigo digi te tigidali nai pedelabo sogo bodolu muani, tama augwali te wiegi yai sogo bodolu muanide mu pedelaibao. Tama me agai dago homu hodolama, tama dago te polobadu pedelali nai dabe konemai da homu eyu, tama te nosali pedelabo nai me konemainu homu eyu tama tiali. Tiali goli, Godigo aga polobadu digi ela pali sę tigidali te nosaliba mu usu nama, te dago mu konemainu ebo sę ebeo.

Kolesaga Koneai Bidigo Pusali Po Elalubo Buku 4:4

Tama me eno gasa kolesaga sualio. Te bidi dabe augwali sę dene mu elama, te tobage wiegi yai nai dabe nigibao. Tialima, te page e tiwai elalubao. Augwaligo homude te augwa abagi dabego genuai nogi elalu, te nai hauwa elaluba homu yali. Tama tibaso, augwaligo me te sę dene hauwa eyu, te abagi dabe augwali genuai nogi elalubo tiwai augwali me bidabo homu yali. Te wabo pabo homu kolesaga tiwai mu ebao, te bidigo wali nogogo tola sainu udabo tiwai gilama ebo dao.

Kolesaga Koneai Bidigo Pusali Po Elalubo Buku 4:8

Te yǫya pai bidi deli bidali. Aga wai me, aga ama me meni yai, tiali goli, sesemane sogo agai sę naga ela pidubadi geani, te aga dwasianu toma me nabeo. Agai doado bage hauwa elaluali, tialima te nai dabe aga usu meni homu yali. Agai te tiwai homu ebeo, “Magi baso ena odolali sę dene eyu, te eno pemene meni ebawe?” te homu ebeo. Te tobage bidigo kolesaga te hobedagia mu elalu, te aga page meni yai elalubao.

Kolesaga Koneai Bidigo Pusali Po Elalubo Buku 7:25

Tialima, eno sągą dili bomo mu selama dolalu, te eno sę bomo eyu, te tobage wiegi yai homu kolesaga tigidali sabo sę bomo yali. Tama eno te tobage dwai kolesaga page me gegelama, koneabo sę bomo eyu, te wabo pabo bidigo homu kolesaga tiwai ebo gegebo sę bomo ebo dao.

Kolesaga Koneai Bidigo Pusali Po Elalubo Buku 8:9

Te we bidi augwaligo te tobage sę tigidali te tǫde ebo sogo eno sulama, te sogo eno homu kone palobo sę yai. Te sogo eno suali, te genuai bidi dabego te gasa we bidi dabe aiyaba elalubo sę ebo suali. Tama te dwai sę ebogo augwa digi aiyaba elaluali, te me eno suai dao.

2 Timoti 4:15

Tigidali bidigo nago ebo te pua pai holobo ni tiwai sę sumainogo eyu, tama sesemane sogo nago te Godigo we bidi tonalubo sę bomo elama bugagia yao.