Amos 1:2 - Godigo dwagi yai po buku

² Te Amosgo e bukude wabo po page e tiwai dao, Genuai Bidi te Saion bulu dude bidiyu, te agai i hai genuagia mu udubao. Awe, aga tede te Jerusalem moni taunde bidiyu, sębę ebaso, te agai dogonigo hwą bomonama obao. Tama tibaso, te sipsipgo tuabo wiegi yai nosai dabe sasia pobao, me te Karmel bulu dude elalubo ni yabe dabe, tigidali wa pobao.

Amos 1:2 Iomraidhean Croise

Godigo Nogi Ugwaba Sabo Tęąbi Po Wabo Buku Dabe 29:4

Te Genuai Bidigo i wabo bomo te genuai elalubao. Tigidali bidigo Godigo i wabo odolama, tama augwali agade wi ebo dao.

Godigo Nogi Ugwaba Sabo Tęąbi Po Wabo Buku Dabe 46:6

Te haniani tǫ pedai kantri we bidi hani dabe augwali dwai midigi selama, tama hwįyu dali yai, tama te king dabe dali, te augwa we bidi dabe me, te augwali dolaibao. Godigo genuai po dągą mu obaso, tama tǫ te olo wę tiwai pedelaibao.

Bugagia Bidibo Kolesagade Po Asęai Buku 20:2

Te kingo wado eyu, te haliga sębę ebogo te bidi wi ilaibao, te laiongo genuai gaa wabo tiwai yaibao. Nago te king haliga sębę yabo sę ebaso da, teda nago bidibo ula te hagawaibao.

Aisaia 33:9

Te tǫ hobedai gela weyu, tama aga bomo sia sali. Tama te Lebanon genuai busi hale yali. Magi baso meni. Agai ni dabe sasiyu, ela pobaso. Te Sarongo odogo malu bulu wiegi yai te tǫ wa pelama, tama wę meni yai kemi nai elalubo bulu tiwai yaibao. Tama me, te ni yabe dabe te Basan distrikde holali, me te bulu du Karmelde holali dabe, augwali bogwa pelama, telega peyu yali.

Aisaia 35:2

Te wa pai bulu tǫ tonobo te sawi wiegi yai mu yaibao. Te aga genuai i hai dali weyu, genuai pemene yaibao. Te wiegi yai sawi yai nai hauwa mu pedaliyu, te bulu tonobo wiegi yai sawi me tedali eyu, te Lebanon genuai busi tonobo tiwai eyu, te Saron bulu odogo tonobo tiwai yaibao. Te we bidi dabego bomonama tonoyu, te genuai nogi, me te dago Genuai Bidi Godigo wiegi yai au dali elalueibao.

Aisaia 42:13

Genuai Bidi te bomai ami bidi tiwai elalu, te megi agai hwįgi painu paibao. Agai te po dagą genuai olama, i weyu, te ami dabego ebo kolesaga tiwai te aga haliga sębę hodolama, te hwįabo sisi elalubo tiwai yaibao. Te agai aga boi bidi dabe dali hwįnama, te augwali aiyaba mu elaluaibao.

Jeremaia 12:4

Genuai Bidi, nago dago tǫba genuai sęgę muani, te tigidali nosai sasia pali. Nisu sogo te sia selama, te tǫ wiegi yai ma pedalugowe? Te hasa me, ba dabe me, isila pobao, magi baso meni, te tǫde we bidi dabego dwai kolesaga me idubo sę ebao. Tama me, te we bidi dabego te po obao, “Jeremaiago daba te pedalubo sę dabe me suagasogobe dao,” po wabo dao.

Jeremaia 14:2

“Juda kantri tǫde te genuai sęgę elalu gela udali. Te aga hanu dabe dwai mu elalubao. Te aga we bidi dabe tǫ bulu pila munana peyu, te dwai gela mu udubao. Tama te Jerusalem dabe umagia gela u waibao.

Jeremaia 25:30

“Jeremaia, nago eno nagebolo te mani po tigidali pusao. Nago te we bidi dabeba te tama po walao, ‘Genuai Bidi aga bulu dagalude digi bidama, tama aga we bidi dabeba genuai po dagą mu waibao. Awe, aga gasagi yai tedali bulude bidiyu, tama agai i wabogo dogoni te be kulukulu wabo tiwai yaibao. Agai te tigidali tǫde we bidi i bomonama weyu, te bidigo te wain wai agawaide i wabo tiwai yaibao.

Jeremaia 28:8

Te polobadu digi gagalasa, te megi e sogoba usu nagasobao, te da i badu elalubadi, te polasa pedelali profet dabe, augwaligo te tiwai po wai, te hwįnama dolobo sę genuai me, dwai gasi me, te we bidi hani hauwaba pedelama, te genuai tǫ kantri dabeba me pedelaibao wali.

Jeremaia 50:19

“Eno te sipsip Israel te aga page buluba ma odasa asaibao, aga te bulu du Karmel, me te tǫ pedai Basan, me te Efraim bulu du pesage, me te tǫ Gileat pedai, te bulu dabede wiegi yai nosai tumainogo yaibao,” wai.

Hosea 11:10

“Te eno ena we bidi dabego boi bidi te i bomonama weyu, te hasa laiongo ga weyu, i wabo tiwai eyu, te eno augwali wi ilaibao. Tama eno we bidi dabego te giliga dega sigulubo badu tagalama, tama didibili ebo dali te polo asesa, ena wali asaibao.

Hosea 13:8

“Te ena samonama, posoga palu, te dage hagawia aluaibao, te hasa beago te aga wai hagawaide sębę eyu, gasa hasa dali ebo tiwai gilama yaibao,” wali. “Tama eno dage subigila miminama, tama dage te polo dalaibao, te laion me gasa uni hasa dabego augwa tubo hasade ebo tiwai yaibao,” wai dao.

Joel 1:19

Genuai Bidio, eno gedu haluasa po bomonama obao, magi baso meni, te tigidali nosai me, ni me, te sasia pelama, te augwali isigo ulali tiwai yali dao.

Joel 2:11

Genuai Bidigo te aga ami bidi dabeba i bomonama wali, te agai pedauwalide te dagalu kulukulu wabo tiwai yali. Te agai po wali pabo bomai ami hauwa elaluali. Idaya, tegobao! Te Genuai Bidigo bodolu side te dwai mu dao. Tialima, de aga te bugagia bidiyu, te aga me dologobe dawe?

Joel 3:16

Genuai Bidi te Jerusalem te Saion bulu dude bidiyu, te po dagą genuai mu waibao. Agai i wabo te dagalu kulukulu wabo tiwai obaso, te tǫ dali dagalu si mumunu yaibao. Tiali goli, Genuai Bidigo te aga we bidi tigidali tonalu, te augwali me dologobeo.

Amos 9:3

Te augwali pelama, te Karmel bulu duba geme duala sigi pobaso da, teda eno augwali gegelama, te pageabi yaibao. Te augwali tamu wę page dologoba mu geme duala sigi pobaso da, teda eno te tamu ąįde bidibo dobo dwai hasamani kauwabidibolo walama, te augwali ela tueibao.

Nahum 1:4

Te agai tamu ąįba wado ilibaso da, teda te tamu ąį sula saibao. Tama agai te wę dabe me sula somainu ilaibao. Te agai tama po obaso, te wiegi yai nosai me gi me te nai yabe dabe sasia paibao. Te Basan badu gi dabe me, te Karmel bulu dude te nedu du walobo ni dabe me, te Lebanon bulu du dabede elalubo plauwa dabe me, te tagalao, tigidali te sasia pabo dao.

1 Samuel 25:2

Te Maon taun bidi me deli, te aga nogi Nabal bidali. Aga te Kalep hani bidi. Tama agai tǫ pedai me deli te Karmel taun elaluali. Aga te mone hauwa elalubo bidi mu, tama agai sipsip te 3,000 elaluai, me 1,000 meme dali elaluali. Aga we, te Abigel, aga te wiegi yai sawi yai we mu, tama aga wiegi yai homu kolesaga hauwa koneai elaluali. Tiali goli, Nabal te wado po wabo bidi, tama aga kolesaga te wiegi yai elalusiąwai. Te sogo Nabal te Karmel taunde bidiyu, tama augwaligo te agai sipsip nisi dabe togobo sę iduai.