Aisaia 26:3 - Godigo dwagi yai po buku

³ Genuai Bidi, augwali nage dologode naga bidibo dao, tama augwaligo homu nage delide naga dąų olama, elalubo dao. Tama tibaso, nago augwali dali homu nagame ebo kolesaga augwali mu pągąmainu ebo dao.

Aisaia 26:3 Iomraidhean Croise

Tuni Bidi Dabego Po Elalubo Buku Deli 5:20

Te boi hwįgi pabo sogo te Israel dabe augwaligo Godiba gedu haluasa po weyu hanalu te augwali tau somainu yali. Tama Godigo augwali tau mu selama, tama augwaligo te boi bidi dabe aiyaba elaluali. Te Israel dabego homu kolesaga bomo elama, te Godigo augwali tau somainu ebaso, tialima agai augwali tau salio.

Tuni Bidi Dabego Po Elalubo Buku Si 13:18

Te Juda dabe augwaligo koneani, te Genuai Bidi augwa wąį dabego God agai augwali hwįbode tau saibao homugo koneani. Tama tibaso augwaligo homu dąų mu olama, bomo elama, augwaligo Israel dabe aiyaba elaluama, tama augwali mu dolali.

Tuni Bidi Dabego Po Elalubo Buku Si 16:8

Nago koneani, polobadu te kantri Sudan me kantri Libia ami sigo nage dali boi hwįagasai dao. Augwaligo ami sibi hauwa mu elaluyu, me augwaligo karis hauwa elaluyu, me augwaligo ami hani hauwa te hosde dualama boi hwįyu yai dao. Tiali goli te sogo nago Genuai Bidiba homu dąų olama, tama nago agabolo nage tau sao po hanalu wai dao. Tama Genuai Bidigo nagebolo bomo menama, tama nago augwali aiyaba elaluai dao.

Godigo Nogi Ugwaba Sabo Tęąbi Po Wabo Buku Dabe 119:165

Te we bidi augwaligo nago bomo yai po godolo mu eyu, tama augwali bugagia mu bidibao, te magi nai me deligo augwali tulaluabo sę me ilibeo.

Godigo Nogi Ugwaba Sabo Tęąbi Po Wabo Buku Dabe 125:1

Te Genuai Bidiba homu kęą pali we bidi dabe, augwali te Saion bulu du tiwai dao. Te bulu du mumunu me isiąma, tama aga page dąų mu elalubao.

Godigo Nogi Ugwaba Sabo Tęąbi Po Wabo Buku Dabe 9:10

God, te nageba asobo we bidi te nago augwali tudiba munu me mugobeo. Tama tibaso, te nage koneani bidi dabego da, te nageba konealubo homu dąų mu wabo dao.

Aisaia 12:2

Mu tama, Godigo ena ma oda sai dao. Tama megi da, eno agaba homu dąų ola saibao. Tama ena wi me egobeo. God, Genuai Bidigo ena bomo ilibo dao, tama tibaso, eno balia po obao, te agai nogi ugwaba sainogo. Magi baso meni. Agai ena ma oda salio.”

Aisaia 26:12

Genuai Bidi, nago da tomode wiegi yai homu nagamea pai ebo sogo pedalomainu ilibo dao. Nago dago tigidali sę dabe dodolama, tama wiegi yai pedalumainu ilibo dao.

Aisaia 27:5

Tiali goli, te boi bidi dabe augwaligo homugo augwali enaba aselama, augwali eno tonalumainu homu eyu da, teda augwaligo ena dali bugagia bidainu po deli dąų olama, asomainao. Awe, augwaligo te boi pimainao homu eyu, po deli dąų olama, ena dali bidagasomainao,” wali.

Aisaia 31:1

Dage te Isip buluba pelama, tama augwaligo dage tau somainu hanalugi pabo bage, hobede ya, dage dene saibao. Dage te Isip dabego hwįbo hos kibu hauwa elaluyu, me karis dabe me hauwa, me te ami bidi dabe hosde dualama hwįbo ami bidi dabe hauwa elalubo sulama, tama dagego homugo Isip dabego dage tau somaina homu ebao. Tiali goli, dagego Israel dabego Genuai Bidiba tonalubeo. Aga te Wiegi Yai Doloba Pai Kolesaga Naga Ebo God dao. Tama dagego agai tau sao po hanalubeo

Aisaia 32:17

Tama te doloba pai kolesagago te bidi hasi godolo ebo kolesaga ilaibao. Tama te we bidi wi me isąma elama, tama augwali tigidali sogo bugagia dili elama, dolaluaibao.

Aisaia 32:18

Tama Genuai Bidigo e tama po wali, agai we bidi dabe augwali bugagia bidiyu, augwali augwa bulude bugagia homu tegaluama, toma tuaibao. Tama augwali magi naide wi me egobeo.

Aisaia 42:19

Dage eno sę bidi tiwai bidimainu elama, tama eno dage sa muyu, dąį ilama, te dagego eno po sela pomainu yali. Tiali goli, dage te olo degelama, te gedu mu widali, tama te olo degeyu, gedu widiyu yai bidi dabe, te augwali aiyaba mu elalualio.

Aisaia 42:6

“Ena Genuai Bidigo digi, eno nage i olama, te eno doloba pai kolesaga ola momainu yai. Te nage eno ugwaba pogalu bugagia tonalueibao. Te nagede naga, te eno te Israel hani we bidi dali bomai po dąų walaibao. Tama nage eno te Israel hani isąwai hani dabego ula tiwai ilama, bidaibao.

Aisaia 48:2

Tama duga digi duga nogi ugwaba siyu, te po weyu, dage te God aga digi sa muyu, aga da wali, te taungo hani we bidi da, po wabo dao. Tama dage te Israelgo Godide tau mabo sainu tonalubo dao. Aga nogi da, te Tigidali Bomo Elalubo Genuai Bidi dao.

Aisaia 49:8

Genuai Bidigo aga sę bidiba te tiwai po wali, “Eno digi eno nage ma selama, te nage wiegi yai ilabo sogo bodolu muani, te sogo mu dolo eno nago i wabo odolama, nage tau saibao. Te nage eno bugagia tonaluaibao, te nagede naga eno te tǫde we bidi tigidali dali bomo yai po dąų waibao. Tama eno te Israel tǫ kantri wiegi yai ma pedalumainu ilaibao, tama te Israel hani augwa te megi olo elalubo tǫde ma bidaibao.

Aisaia 50:1

Genuai Bidigo te Israel we bidi dabeba te tiwai po wali, “Taun Jerusalem te duga ida tiwai elalubao. Dagego homugo eno aga tudiba mubao homu eyu, te bidigo we sabo kolesaga bolama, te sai we mu sela sąbo tiwai homu eba, agawe? Te dagego tama homu ebaso da, teda te tama po wali pepa mena elalubawe, eno aga mu sela sąwaniwe? Tama me, te eno bidi me delide negeli sali me elalubeo. Te tama homu dagego magi baso ebawe, eno wai dabe eno dage te gasa bidi dabeba te olo sę ebo bidi tiwai ilama, tagala paliyu, eno te negeli sali dodolabo mone saliwe? Mu menio. Te dagego dwai sę hauwa ena haliga sębę ilibaso, eno te Jerusalem tudiba munama, tama eno dage te gasa bidi dabego nogoba muai dao.”

Aisaia 50:10

Dage te Genuai Bidi dologoba pelama, te agai sę bidigo po wali pabo hani dabe, dage wi me igimio. Te dage hulide biliyu, te dage ula meni yai, te dage konealubo homu Godiba dąų wao, te Genuai Bidigo dage tonalu, agai dage tau saibao.

Aisaia 66:12

Genuai Bidigo te tiwai po wali, “Magi baso meni. Eno te Jerusalem bugagia mu elalumainu yaibao, te sesemane sogo agai te gasa tǫ kantrigo wiegi yai nai dabe hauwa saibao. Te aga magi deli me sǫą pisąma, te wę sesemane sogo asudu, te sula sisąbo tiwai yaibao. Te dagego te nai dabe siyu, wiegi yai pemene mu yaibao, te waigo idago ame tuyu, pemene ebo tiwai yaibao, te waigo aga idago sabilibaso, pemene ebo tiwai eyu, te idago aga telede pilama, aga dali gagali ebo tiwai ebo dao.

Jeremaia 39:18

Eno nage bugagia tonalubaso, te nage augwaligo me eligobeo. Nago homu enaba dąų obaso, te nage me isigobeo. Ena Genuai Bidi eno te po wai dao,’” wali.

Daniel 3:17

Dago lotu po te God muba wabo dao. Dago te God agai da tau sabo usu elalu, te nago bomo, me te siago bomo geda mubaso da, teda te Godigo sę dao,” wali.

Daniel 3:28

Tama kingo te po wai, “Da tigidaligo te Satrak, me Mesak, me Abetnego, te augwaligo God nogi ugwaba sinao,” wali. “Agai te aga mobo bidi ensel tagala palama, tama te agaba lotu weyu, te konealubo homu dąų wabo bidi sela tau sali. Augwaligo te eno bomo yai po sela sąyu, te augwali isabo wi me ebeo. Tama augwaligo gasa godiba lotu me wabeo. Menio. Augwaligo te augwa Godiba digi naga lotu wai dao.

Daniel 6:23

King te wiegi yai homu pemene umabo mu eyu, tama te bidi dabeba weyu, te Daniel te tǫ dedagedu ugwaba kegao po wali. Augwaligo aga kegelama da, tama augwaligo te tiwai suali, te aga tigi me dolisiąwai elaluali, magi baso meni, agai konealubo po te Godiba dąų mu wai dao.

Maika 5:5

Tama aga digi te nagame yai haliga ebo homu te tigidali we bidiba mayu, tama te boi bidi homu ebo kolesaga te munu ma me pedalugobeo. Te Asiria dabe dago tǫba asobo sogo, te dago taun bagulali masigi obo dabe aluama, dago te ami dabe tonaluabo bomai polalubo bidi dabe hauwa tagala palama, augwaligo te boi bidi dabe dali hwįmainu yaibao.

Dwagi Yai Gesi Po Jongo Asęani 14:27

“Eno dage taga pabo sogo pąde dao. Tama dage wi idali weyu, tama eno dage homu nagame elama, dua bidimainogo eno dagebolo bomo mobao. Eno te dwagi yai homu nagame ebo kolesaga eno dagebolo mobao. Tǫde we bidigo nagame yai mabo homu kolesaga tiwai eno dagebolo mabeo. Dagego homu kolesaga polo midigi siyu, tama dage wi egio.

Dwagi Yai Gesi Po Jongo Asęani 16:33

Eno homugo dage ena dali wadoloyu, tama dwagi yai homu nagame elama bidimainogo eyu, eno e po tamadi tama dage dali wai dao. Dage tǫde bidibadi te tǫde we bidi augwaligo dwai sę dage dali yaibao. Tialima, dagego homu bomo elama, bidao. Eno e tǫde kolesaga aiyaba elaluai dao,” Jisasgo te po aga sę bidi dabe dali wai.

Polgo Po Pas Rom Dabeba Asęani 5:1

Te dago konealubo po Godide dąų waibaso tama Godigo da doloba pai we bidi nogi polaligo da, teda dago Genuai Bidi Jisas Kraisgo da God dali deli homu ilama pedalalio.

Filipai 4:7

Dagego tama tiyu da, teda dage Krais Jisas dali wadolama, tama aga dali hodobo bidiyu, tama Godigo dage nagamea pai homu ilibo kolesagago dage bugagia tonaluaibao, tama dage wi egobeo. Te nagamea pai homu ilibo kolesaga page te da tǫde bidibo we bidigo kuna munu me konegobeo, te agai kolesagago dago homu kolesaga aiyaba mu elalubo dao. Awe, tede dago homu kolesagago dęą sabo dao, tiali goli agai te nagamea pai homu ilibo kolesaga page me hauwa elalubao.