Tuni Bidi Dabego Po Elalubo Buku Deli 16:4 - Godigo dwagi yai po buku

⁴ Tama nosali Devitgo te Livai meba dąį ilali, te Dąų Wali Bomai Po Munalubo Halobage pąba pelama, Godiba lotu wabo bidi meba dąį ilali, te Israelgo Genuai Bidi da. Augwa te Godiba buba hwi olama, gedu haluasa po weyu, usu da po olama, te agai nogi ugwaba somainao wali.

Tuni Bidi Dabego Po Elalubo Buku Deli 16:4 Iomraidhean Croise

Tigidali Nai Gagalama Nigali Side 17:7

Te eno nage dali me, te augwali nosali pedalubo hani dabe dali me, te eno dwagi yai tau sabo bomai po dąų walobao. Ena da, nago God me, te ena nago nosali pedelabo hani wai dabe augwaligo God me dao. Te dąų wali bomai po da, te sesemane bidada pabo sogo elalua piduaibao.

Tigidali Nai Gagalama Nigali Side 32:28

Tialima, te bidigo te po wai, “Megi da, nago nogi te Jekop ma wagobeo. Nago te God dali hwįani, tama bidi dali me hwįai, tama nago nogi ugwaba sali. Tialima, nago gesi nogi te Israel dao.”

Tigidali Nai Gagalama Nigali Side 33:20

Tama agai te alta me deli tede dodolali. Tama agai te alta nogi te tiwai poali, “Te Israelgo God da, te bomo yai God mu dao,” te nogi poali.

Te Israel me Juda Hani Sigo Tuni Bidigo Po Elalubo Buku Deli 8:15

Tialima, agai te tama po wali, “Te Godigo nogi ugwaba sao,” wali, “te Israel dabe dago Genuai Bidi dao. Magi baso meni. Aga digi agai te eno aya Devit dali dąų wali po te bugagia wali pali. Devitgo homugo te we bidi God pąba sisinagasabo be me deli sę emainu homu yai, te dago Genuai Bidi, te agaba lotu po omainu yali. Tiali goli, Genuai Bidigo agabolo te tama po wai, ‘Te eno ena we bidi te Isipde gagalasa sela asali, te megi sogoba usu nagasu, eno te Israel dabe augwaligo enaba lotu omainu ebo be sę yabo te hani me deligo hanu me deli te eno sa me musiąwai dao. Tiali goli, Devit, eno nage sa muani, te eno we bidi nago tonalumainu yali. Nago te eno genuai be me deli sę yabo homu ebo, tama nago te ebo homu te wiegi yai homu dao.

Tuni Bidi Dabego Po Elalubo Buku Deli 15:16

Tama Devitgo te Livai hani tobolu bidi dabeba walama, te tęąbi weyu musik te halobage sela asobo sogo wabo Livai hani bidi meba dąį ilao po wali. Augwaligo te gita dabe me te brasgo nigai plet pou dabe me te elibo sę eyu, te musik hwą genuai u omainu ilama, te augwaligo wiegi yai homu pemene ebo sę hania ola mao wai.

Tuni Bidi Dabego Po Elalubo Buku Deli 16:3

Devitgo te tigidali we bidiba nai mani. Tigidali we bidi deli delibolo te bret deli selama, te augwa te iside ulali bulmakau kibu mi dali mena mena pelama, te olali wit meba dali mawai dao.

Tuni Bidi Dabego Po Elalubo Buku Deli 16:5

Devitgo te hanigo tobolu bidi te Asap dąį ilali, te Sekaraia te Asap tudi badu daganalubo si wali bidi da. Te gasa bidi meba nogi e tama da, Jeiel, me Semiramot, me Jehiel, me Matitia, me Eliap, me Benaia, me Obetidom, me gasa Jeiel da. Te bidi dabego sę da te gita elebo sę elaluali. Te Asapgo te brasgo nigali pou pletba elebo sę yai dao.

Tuni Bidi Dabego Po Elalubo Buku Deli 16:8

Te Asapgo hani augwaligo te tęąbi yalio, “Dago Genuai Bidi nogi olama, agaba i weyu te agabolo usu da po wao. Te dago po hanilama pusao, te tigidali we bidi haniba te agai yali genuai sę dabe po pusao.

Tuni Bidi Dabego Po Elalubo Buku Deli 24:3

Tama Devit te king bidali sogo, agai homugo te pris dabego sę bugagia emainu homu elama, tama agai te pris hani dabe deli deliba te sę sabo dąį ilali. Tama Sadok de Ahimelek sigo te agai te pris dabeba sę dobabo tau salio. Sadok te Eleasargo hani wai da, tama Ahimelek te Itamar hanigo wai dao.

Tuni Bidi Dabego Po Elalubo Buku Deli 25:1

Te Devit dali te Genuai Bidigo be tonalubo bidi dabego dali te Asapgo hani ogwa dabe, me Heman me Jedutun, te sela bidi hanigo ogwa dabe te Genuai Bidigo be tomode lotu wabo sę yabo hani dabe dąį ilali. Augwaligo te we bidi dabeba te Genuai Bidigo po pusubo sę elaluali. Augwaligo te gita haniani badi te plet bras badi eleyu, te po dali pusali. Te e da te hani dabego nogi dali te augwaligo yali sę po dali elalubao.

Tuni Bidi Dabego Po Elalubo Buku Deli 6:31

Te ede nogi elalubo bidi dabe te king Devitgo te Genuai Bidigo bede wiegi yai po wabo nai musik elabo bidi dabe sa muai dao. Te Dąų Wali Bomo Yai Po Muani Halobage te Genuai Bidigo sel ugwa beba muagaselama nosali badu Devitgo te hani dąį ilai dao.

Esra 3:10

Te sę bidi dabego te genuai masigi dabe te Godigo be daga pagede mubo sogo da, teda te pris dabego te prisgo ugwa gudulama, tama te biugel selama, tama te sę ebo pesageba dolagasalio. Tama te Livai te Asap hani me aselama, augwali dali dolagasali. Tama tigidali bidi deli deligo te kapa pou si te musik ebode elainu tola sesa pali. Tama augwa te king Devitgo asęani po wali pelama, tama augwa te Genuai Bidigo nogi ugwaba sai dao.

Nehemia 12:24

Te Israel dabego lotu po odubadi, te God nogi ugwaba siyu, te agaba buba hwi wabo sogo, te Livai dabego te king Devitgo wali po tiwai gilama yali. Devit aga te Godigo po pusubo bidi da. Te Livai hani nani si dolugulama, tama te hani me deligo te balia po ola simanobo si da, teda te gasa hanigo te gasa balia po dage me wei ponoyu wali. Tama Hasabia, me Serebia, me Jesua, te Katmielgo ogwago, te sę tonaluai.

Godigo Nogi Ugwaba Sabo Tęąbi Po Wabo Buku Dabe 103:2

Eno Genuai Bidigo nogi ugwaba siyu, tama agai dwagi yai sę ena dali ebo te eno homugo tagalogobeo.

Godigo Nogi Ugwaba Sabo Tęąbi Po Wabo Buku Dabe 105:5

Dage Abrahamgo wąį dabe, aga Genuai Bidigo sę bidi, dage Jekop agai wąį dabe nosali pedelai, te bidi Godigo dąį muani bidi, dagego homugo agai polobadu gasagi yai bomo yai genuai sę yali koneyu, tama agai te dwai sę ebo bidi dabe augwali dene mabo, te kolesaga dagego homugo koneao.

Godigo Nogi Ugwaba Sabo Tęąbi Po Wabo Buku Dabe 106:48

Dago te Genuai Bidigo nogi ugwaba sao, te da Israel dabego God, megi, me tigidali sogo nosali. Tama tigidali we bidigo te po waiyąo, “Mu dao,” wao. Genuai Bidi nogi ugwaba sao po wao.

Godigo Nogi Ugwaba Sabo Tęąbi Po Wabo Buku Dabe 37:1

Abagi, nago te dwai sę ebo bidi dabego te wiegi yai nai dabe sabode te nago homugo pesa me elamuo. Nago te dwai kolesaga ebo bidi dabego naide haliga dwai me elamuo.

Godigo Nogi Ugwaba Sabo Tęąbi Po Wabo Buku Dabe 70:1

God, nago ena ma sao. Genuai Bidi, nage polo aselama, ena tau sagasao.

Godigo Nogi Ugwaba Sabo Tęąbi Po Wabo Buku Dabe 72:18

Te God nogi ugwaba sao, te Israel dabe augwa Genuai Bidi dao. Agaduba deligo naga te wiegi yai sę dabe ebo dao.