Zozuwe 5:6 - WẼNNAAM SEBRE 2014

⁶ Sɩd me, Israyɛll nebã rag n kẽna yʋʋm pis-naas weoogã pʋga, hal tɩ raop nins fãa sẽn tõe n kẽng zabrã sẽn dag n yi Ezɩpt n yaool n ka sak Sẽn-Ka-Saab noorã fãa ki. Bala, Sẽn-Ka-Saab wẽena ne bãmb n yeel tɩ bãmb ka na n kɩt tɩ b yãnd tẽng ning bãmb sẽn kãab b yaab-rãmbã tɩ b na n kõ-d lame wã ye. Yaa tẽng sẽn pid ne bĩisim la sɩɩdo.

SEBR SÕNGO

⁶ Yaa yʋʋm pis-naas tõre la a Israyɛl ra kẽn we-raoogẽ la neb niyns sẽn da tõe n tak zabra fãa ra kiime. B sẽn ki wã, yaa b sẽn pa kelg Soaala-Wẽnd koɛɛga. Dẽ la Soaala-Wẽnd kãab-b tɩ b nif kõn teeg tẽng ninga b sẽn da kãab b ba-rãmbã, tẽng sẽn bund bĩisim la sɩɩdo.

Zozuwe 5:6 Iomraidhean Croise

Yɩɩn‑sõamyã 107:4

Bãmb dag n yeebda we-raoogẽ wã, n pãrgd zĩ-peen-daagã, la b rag n ka ne sor sẽn dabd tẽng b sẽn tõe n tɩ kẽ ye.

Yikri 3:17

Mam yeelame tɩ m na n yiisa yãmb namsg ning b sẽn namsd yãmb Ezɩpt tẽngã pʋgẽ wã pʋga, n tall yãmb n kẽng Kana nebã ne Hɛt-dãmbã la Amoor-dãmbã ne Ferɛɛz-rãmbã la Hevi-rãmbã ne Zebuus-rãmbã tẽngẽ. Yaa tẽng sẽn pid ne bĩisim la sɩɩd wʋsgo.»

Yikri 3:8

Mam sigame n na n fãag bãmb Ezɩpt nebã nusẽ, la m yiis bãmb soolem-kãng pʋgẽ n tall bãmb n kẽng tẽn-sõng sẽn yaa bedr pʋgẽ. Yaa tẽng sẽn pid ne bĩisim la sɩɩd wʋsgo. Yaa tẽng ning Kana-rãmbã ne Hɛt-dãmbã la Amoor-dãmbã ne Ferɛɛz-rãmbã la Hevi-rãmbã ne Zebuus-rãmbã sẽn be wã.

Zeremi 2:2

«Kẽng n tɩ zẽk f koɛɛg n gom ne Zeruzalɛm nebã n yeel-b tɩ Sẽn-Ka-Saab yetame: ‹Mam tẽra yãmb bi-bɩɩlem wakatẽ pʋ-peelmã yelle. Yãmb dag n nonga maam wa pʋg-paal sẽn nong a sɩda, n tũ maam we-raoogẽ wã, zĩig ning bũmb sẽn ka tõe n yiẽ wã.

Ezekiyɛl 20:15

La we-raoogã pʋgẽ, mam zẽka m nug n wẽen tɩ m ka na n leb n tall bãmb n taas tẽng ning mam sẽn dag n kãab bãmbã ye. Yaa tẽng sẽn tar bĩisim ne sɩɩd wʋsgo, n yaa neer n yɩɩd tẽms a taabã fãa.

Ezekiyɛl 20:6

Badaare, mam zẽka m nug n wẽen ne bãmb n yeel tɩ m na n yiisa bãmb Ezɩpt tẽng n tall n kẽng tẽng mam sẽn zoe n yãk n bĩng-ba, tẽng sẽn tar bĩisim ne sɩɩd wʋsgo, tẽng sẽn yaa neer n yɩɩd tẽmsã fãa.

Sõadga 26:63

Israyɛll nebã a Moyiis ne maan-kʋʋd a Eleyazaar sẽn sõdã yɩɩ woto. Yaa Moaab weoogã sẽn be Zʋrdẽ kʋɩlgã noor sẽn tees Zeeriko tẽngã la b maan sõd-kãnga.

Yaoolem 1:3

Yaa yʋʋm pis-naas yʋʋmdã, kiuug piig la a yembr soabã pipi daarã, la a Moyiis togs nebã bũmb nins Sẽn-Ka-Saab sẽn dag n wilg yẽnda t'a togs Israyɛll nebã.

Yaoolem 2:14

Tõnd sẽn yi Kadɛɛs-Barneya wã, maana yʋʋm pis-tã la a nii tɩ tõnd yaool n dʋʋg Zerɛɛd kʋɩlgã, tɩ zamaan-kãng raop nins sẽn dag n tõe n kẽng zabrã fãa ki wa Sẽn-Ka-Saab sẽn dag n wẽen ne bãmbã.

Yaoolem 2:7

Bala, Sẽn-Ka-Saab sẽn yaa yãmb Wẽnnaamã ninga bũmb ning fãa yãmb sẽn maandã barka. B yãnda y kẽnã fãa we-raoogã pʋgẽ ka. Yʋʋm pis-naas la woto, Sẽn-Ka-Saab sẽn yaa yãmb Wẽnnaamã sẽn be ne yãmba, la bũmb ka paoog yãmb ye.»

Yaoolem 8:4

Yãmb sẽn dag n yer fut ninsã ka ki ye, la y naoã ka mod yʋʋm pis-naasã pʋgẽ me ye.

Ebre rãmba 3:11

La m sũ-puugrã pʋgẽ, mam wẽename n yeele: «Hakɩɩka, b ka na n paam vʋʋsg ning mam sẽn na n kõ-bã ye.»

Zozuwe 1:6

Keng f meng n paam daoodo. Bala, yaa foom n na n kɩt tɩ m nebã soog tẽng ning mam sẽn wẽen n yeel b yaab-rãmbã tɩ m na n kõ-b lame wã.

Zozuwe 24:7

La yãmb yaab-rãmbã kelmame n bool Sẽn-Ka-Saabo. Dẽ, Sẽn-Ka-Saab kɩtame tɩ lik zĩnd yãmb yaab-rãmbã ne Ezɩpt nebã sʋka. Bãmb kɩtame tɩ ko-kãsengã lebg n lim bãmba, n dɩ bãmba. Yãmb nin yãnda bũmb ning mam sẽn maan Ezɩpt nebã. Yãmb zĩnda weoogã pʋg n kaoos wʋsgo.

Zozuwe 5:5

Raop nins fãa sẽn dag n yi Ezɩpt tẽngã rag n kẽe bãongo, la neb nins sẽn dog weoogẽ wã wakat ning b sẽn be sorã zug n kẽndã ned ba a yembr ka kẽ bãong ye.

Zozuwe 5:7

Wẽnnaam kɩtame tɩ bãmb kom-dibli wã led bãmb zĩigẽ n kẽ tẽngẽ wã, la yaa kom-dibl-kãens la a Zozoe sẽn kẽes bãongã. Bala, b rag n nan ka kẽ bãong ye, b sẽn ka tõog n kẽes-b bãongã wakat ning b sẽn be sorã zugã yĩnga.