Luonmtieb 3:27 - Yiesu Lɑbɑmɑnn Muɑl Ni

²⁷ L pɑɑk, siɑl be k t mɔk pɑlbifɑɑnt nɑn’n ii? Aɑi, siɑl kɑɑ. Bee pɑɑk e? L tie bɑɑ wɑɑ senni nbɑ wɑnn lin nbɑ nɑ pɑɑk ee? Aɑi, ŋɑɑn bɑɑ tien yɑdɑ nɑ pɑɑk e k pɑlbifɑɑnt kɑɑ.

Luonmtieb 3:27 Iomraidhean Croise

Mɑɑlk 16:16

Wun nbɑ kul tien yɑdɑ, k b wul’ɔ Yennu nyunwulu, u sɑɑ lɑ fielu, ŋɑɑn wun nbɑ kul k tien yɑdɑ, Yennu sɑɑ bu u buut k biil’ɔ wɑɑ.

Lɑbɑmɑnn nbɑ k Sɑn diɑn 3:36

Dɑɑnɔ nbɑ tien Bijɑ mɑnŋ yɑdɑ mɔk mɑnfuol nbɑ kɑɑ gbennu, ŋɑɑn dɑɑnɔ nbɑ yet Bijɑ mɑnŋ, Yennu wutuol be u pɑɑk k u kɑn lɑ mɑnfuol mɑnŋ.

Luonmtieb 10:5

Muois din diɑn k jiin bɑnnu nbɑ k nilɔ sii tie niŋɑnɔ senni weiu ni ɑ: «Wun nbɑ tuun lin nbɑ k senni nɑ senn nɑ, u sɑɑ lɑ mɑnfuol l pɑɑk ɑ.»

Luonmtieb 11:6

Yennu i lukt niib, u ninkpɑbɑɔnŋ pɑɑk e, k u lukt’b, k l k tie b tuonɑ pɑɑk kɑɑ. Yennu i bo i lukt niib b tuonɑ pɑɑk i e, u ninkpɑbɑɔnŋ nɑ bo kii tie bɑlmɔni ninkpɑbɑɔnŋ kɑɑ.

Luonmtieb 2:17

Gotl, ɑ yi ɑ mɔnŋ Suif e k mɔk pɑlbifɑɑnu fɑɑ mɔk senni nɑ pɑɑk k yi ɑ mɔnŋ Yennu yuɑ.

Luonmtieb 2:23

Fin nbɑ fuɑ bɑlɑ senni mɑnŋ pɑɑk nɑ, ɑ yien senni mɑnŋ k dint Yennu fei,

Luonmtieb 3:19

Tɔn, t mi nɑn Yennu *senni i yet lin nbɑ, l yien k tien bin nbɑ be l yiikuo ni. L pɑɑk e k niib kul sii muu b mɔi, k tingbounŋ nɑ tieb kul be Yennu buut ni, k u tuɑnn suɑ kɑɑ k mɔk mɔni.

Luonmtieb 3:26

Ŋɑɑn mɔtɑɑnɑ u wɑnn bɑnnu nbɑ k u te k nisɑɑli tie niŋɑnm u tuɑnn k mɑɑn u luon wuu tie bɑlmɔni dɑɑnɔ kii biɑ kii te k nisɑɑli i tie niŋɑnm u tuɑnn bɑɑ tien Yiesu yɑdɑ nɑ pɑɑk.

Luonmtieb 4:2

Wɑɑ din wɑɑ *senni nɑ ii dinŋ ii te k Yennu yet ɑ u tie niŋɑnɔ u tuɑnn, u bo sii mɔk pɑlbifɑɑnt, ŋɑɑn u kii mɔk pɑlbifɑɑnt Yennu tuɑnn.

Luonmtieb 7:21

N lɑ k sennsiɑl be n ni yuo kul ɑ. Mi i yɑɑ n tun lin nbɑ ŋɑn, ŋɑɑn bonbiil biɑ lek tuu be nɑn’n.

Luonmtieb 7:23

ŋɑɑn k n lɑɑt sennsiɑl nbɑ tuun n gbɑnɑnt ni, k l kɔn nɑn senni nbɑ k n yɑn luon nɑ. Sennliel nbɑ bɑɑt nɑn biit nɑ tuun n gbɑnɑnt ni k lol’n nɑn dɑnsɑlk nɑ.

Luonmtieb 7:25

Yennu yien niipuouk t Yonmdɑɑnɔ Yiesu Klistu ni. L pɑɑk, n mɔnŋ wɑɑ Yennu senni nɑ n yɑn ni, ŋɑɑn k n nifosɑɑlk binbenŋ ni n tie sennliel nbɑ bɑɑt nɑn biit nɑ dɑɑbl e.

Luonmtieb 8:2

k mɑɑn mɑɑ tɑɑn nɑn Yiesu Klistu nɑ, Foŋɑnm *senni nbɑ tien mɑnfuol nɑ, fɑt’n biit nɑn kuun senni ni wɑɑ.

Luonmtieb 9:11

Yuo nbɑ k b dɑɑ din k mɑl’b k b k tun lin nbɑ ŋɑn ɑmi lin nbɑ b nɑ, k Yennu din yet ɑ bikpelk nɑ tɑn sii tie wɑɑlɔ po nɑ jiɑmɔ. Yennu din yet nnɑ ɑ wɑɑ lol lin nbɑ nɑ n sɑɑn tuɑnn. Wɑɑ lol lin nbɑ tie wun lukt niib e, k l pɑɑk, l k tie b tuonɑ pɑɑk kɑɑ k b tie u niib, ŋɑɑn l tie wɑɑ lol bɑnnu nbɑ k lukt’b nɑ e.

Luonmtieb 9:31

ŋɑɑn Islɑɑeltieb nbɑ din kol ɑ bin lɑ senni nbɑ sɑɑ te k Yennu yet ɑ b tie niŋɑnm u tuɑnn nɑ, k b ji kɔnŋ’l.

Luonmtieb 9:32

Bee k b din kɔnŋ i? B din k kol ɑ Yennu n yet ɑ b tie niŋɑnm u tuɑnn b yɑdɑ pɑɑk, ŋɑɑn b din kol ɑ wun yet ɑ b tie niŋɑnm u tuɑnn b tuonɑ pɑɑk e. B gbiɑt tɑngbiɑtkɑl e k bɑɑ,

1 Kuolent-tieb 4:7

Ŋmee tul’ɑ sɑɑkɑt ɑ lieb ni? Yennu kɑɑ tul’ɑ lin nbɑ kul k ɑ mɔk nɑ ɑɑ? Tɔn, lɑɑ tie bɑnnu nbɑ, bee tien k ɑ dont ɑ mɔnŋ, k l tie nɑn lin nbɑ k ɑ mɔk mɑnŋ k tie piini kɑɑ nɑ?

Gɑɑlɑɑt-tieb 2:16

k t mi nɑn sie k nilɔ n tien Yiesu Klistu yɑdɑ, ŋɑnn e sɑɑ te k Yennu n yet ɑ u tie niŋɑnɔ u buol. L k tie tɑɑ tuun senni nbɑ yɑɑ tii tuun lin nbɑ pɑɑk kɑɑ. L pɑɑk, t mɔnŋ mun tien Yiesu Klistu yɑdɑ, ɑ Yennu n yet ɑ t tie niŋɑnm u buol yɑdɑ mɑnŋ pɑɑk e, ŋɑɑn l k tie senni tuonɑ tumu pɑɑk kɑɑ. K mɑɑn Yennu kɑn yet ɑ suɑ tie niŋɑnɔ u buol senni mɑnŋ tuonɑ tumu pɑɑk.

Gɑɑlɑɑt-tieb 3:22

Ŋɑɑn l diɑn Yennu lolkpel kɑdɑɑɔk ni ɑ tingbounŋ kul sɑɑk be biit yiikuo ni e, ɑ Yennu n tul bin nbɑ tien yɑdɑ nɑ piini nbɑ k u din senn mɔsonn ɑ u sɑɑ tul’b nɑ. B yɑdɑ nɑn Yiesu Klistu nɑ pɑɑk e k u sɑɑ tul’b.