Efestieb 1:18 - Yiesu Lɑbɑmɑnn Muɑl Ni

¹⁸ N biɑ mei’ɔ mɑɑ wun yent i pɑlɑ ni ɑ yin bɑnn dindɑnn nbɑ pɑɑk k u yiin’i nɑ, k biɑ bɑnn nɑn bonɑ nbɑ k u tɑn sɑɑ tul u niib nɑ nbɑ yɑb k biɑ ŋɑn bonciɑnn biɑnŋ nbɑ,

Efestieb 1:18 Iomraidhean Croise

Mɑɑtieo 13:15

K mɑɑn niib nɑ yɑn dɔkn, b nyɑl b tubɑ, k biɑ mun b ninbinɑ e, k mɑɑn b k luon bin lɑ siɑl, k biɑ k luon bin gbɑt, k biɑ k luon ɑ b yɑn n dɔkt, k biɑ k luon bin ŋmɑt bɑɑl n buol ni, k min Yennu n tul’b lɑɑfiɑ.›

Mɑɑlk 10:17

Yiesu nbɑ din nyii lenŋ k sɑɑ mɑnŋ, k jɑsuɑ tin k cet’ɔ k tɑn gbɑɑn u tuɑnn, ŋɑɑn boi’ɔ ɑ: «Wɑntɔŋɑnɔ, n sɑɑ tien nlee k tɑn lɑ mɑnfuol nbɑ kɑɑ gbennu?»

Lɑbɑmɑnn nbɑ k Luk diɑn 24:45

Ŋɑnn e k u ji yent b nunm ɑ bin bɑnn lin nbɑ diɑn Yennu lolkpel kɑdɑɑɔk ni nɑ pɑɑk,

Tuonɑ 16:14

Puob nbɑ din gbɑt t mɑɑn mɑnŋ, b yenɔ sɑnn din tie Liidi. U din nyii Tiɑtiil e k din tie cincenmunŋ nbɑ k l dɑɑɔk pɑɑl nɑ kuɑt-tuɑ, k biɑ din jiɑntl Yennu. K Yonmdɑɑnɔ din luot u pɑl ni ɑ wun gbiint Pɔul mɑɑn nbɑ k u piɑk nɑ fɑnu.

Tuonɑ 26:18

Fin e tie wun nbɑ sɑɑ yent b nunm po, k bin nyi bunbɔnn ni k kuɑ yentu ni, k biɑ nyinn’b *Sɑɑtɑn yiikuo ni k bin kuɑ Yennu yiikuo ni, ɑ bin lɑ nyikcɑbu k biɑ lɑ yiɑl bin nbɑ tie Yennu niib b yɑdɑ pɑɑk nɑ sinsuuk ni.› »

Luonmtieb 11:29

k mɑɑn Yennu k gɑɑn lin nbɑ k u tul k biɑ k lebtl u dudukt bin nbɑ k u yiin’m nɑ pɑɑk.

Luonmtieb 2:4

Ami ɑ sɑlkt lonciɑɔnŋ nɑn suklu bonciɑnn nbɑ k Yennu mɔk nɑn’t nɑ ɑmi nlee? A k mi nɑn Yennu mɔk bulcint nɑn’ɑ ɑ wun te k ɑ mɔ kuɑŋɑɑn k lebt binbenŋ ee?

2 Kuolent-tieb 4:4

k te k b k tien *Klistu yɑdɑ, k yennu nbɑ tie yenbiiuk tingbounŋ nɑ ni nɑ, te k b subni nɑ k lɑɑt. Ŋɑnn e te k b k lɑɑt yentu nbɑ nyi Yiesu lɑbɑmɑnn nɑ ni nɑ. L yentu tie Klistu *yudɑnt yentu e, ŋuɑ nbɑ tie Yennu nɑɑɔnŋ nɑ.

2 Kuolent-tieb 4:6

Yennu nbɑ din yet ɑ: «Yentu n yent bunbɔnn ni,» ŋuɑ e te k u yentu nɑ yentl t pɑlɑ ni, ɑ tin bɑnn u yudɑnt nbɑ tie bɑnnu nbɑ, l yudɑnt e yien Yiesu Klistu nunpo nɑ.

Gɑɑlɑɑt-tieb 5:5

Ŋɑɑn tinm ŋɑnin i e, Foŋɑnm nbɑ be t ni tien tinm yɑdɑ. T mɔk dindɑnn k guu yuo nbɑ k Yennu tɑn sɑɑ yet, ɑ t tie niŋɑnm.

Efestieb 1:11

Yennu tun siɑl kul u dudukt nɑn u lolɑ ni e. Nnɑ e mun k u din lukt tinm, wɑɑ ponŋ din senn lin nbɑ nɑ pɑɑk nɑ.

Efestieb 1:7

Yennu nyinn’t biit dɑɑbs ni u Bilonkɑk mɑnŋ sɔn pɑɑk e, k nyik cɑb t biit u ninkpɑbɑɔnŋ nbɑ yɑb nɑ pɑɑk.

Efestieb 2:12

L yuo nɑ i din fɔk nɑn Klistu. I din tie sɑɑnm e k b k kɑɑn’i k puki’i Yennu nigɑnnkɑb ni. I din k pukn mɔsonn nbɑ k Yennu din senn k tul u niib nɑ ni. I din k mɔk dindɑnn k biɑ din k mɔk Yennu.

Efestieb 3:16

N mei’ɔ ɑ u dontl nbɑ yɑb bonciɑnn nɑ, ɑ wun nuɑb u yiikuo Foŋɑnm ni k pukn’i pɑnŋ i pɑlɑ ni,

Efestieb 3:8

Yennu niib sinsuuk ni, min e tɑn juont wun nbɑ k be kɑnn ni, ŋɑɑn u ninkpɑbɑɔnŋ pɑɑk, k Yennu cɑb’n ɑ n muɑnt muɑnti k tul bin nbɑ k tie Suifnbɑ k wɑnn’b bɑnnu nbɑ k Klistu luon wun tul’t bonŋɑnɑ nbɑ kɑɑ pɑɑk,

Efestieb 4:1

Min nbɑ be dɑnsɑlk tuonɑ nbɑ k n tuun k tien Yonmdɑɑnɔ pɑɑk, n bɑln’mi e ɑ i ŋɑɑn k i binbenŋ i tie fɑnu nɑn Yennu nbɑ din luon k lii tie biɑnŋ nbɑ nɑ yuo nbɑ k u din yiin’i nɑ.

Efestieb 4:4

Gbɑnɑn-yent kuɑ e be, k Foŋɑn-yenɔ kuɑ mun be, nnɑ e k dindɑn-yenn kuɑ mun be k Yennu yiin’i l ni.

Efestieb 5:8

I din be bunbɔnn ni e, ŋɑɑn yɑɑ be Klistu ni mɔtɑɑnɑ nɑ, i ji be yentu ni e. L pɑɑk, i ji kii be kii nɑɑn bin nbɑ tie yentu yɑb nɑ,

Fiiliiptieb 3:14

N tiin nɑn pɑnŋ mɑɑ n gɑɑl nyuɑt nbɑ be sɑnpɑɑpo k Yennu yiin’t ɑ tin gɑɑl Klistu ni.

Kuoluostieb 1:12

T biɑ mei Yennu ɑ yin fit k tul’ɔ niipuouk, k mɑɑn u te k i mun biɑ lɑ bonɑ nbɑ k ŋuɑ Yennu din senn mɔsonn, ɑ u sɑɑ tul u niib u yentu nɑɑn ni nɑ.

Kuoluostieb 1:23

L sii tie nnɑ e l i tie k i biɑl i yɑdɑ ni k sie cib, k k fɔli nyi dindɑnn nbɑ k i lɑ lɑbɑmɑnn nbɑ k i din gbɑt nɑ ni. B din muɑntl lɑbɑmɑnn mɑnŋ k tien niib kul nbɑ be tingbounŋ nɑ ni e. Min Pɔul, n tie l tuontunnɔ e.

Kuoluostieb 1:27

Yennu din tun nnɑ, k mɑɑn u lol, ɑ wun wɑnn u niib nɑ, bɑnnu nbɑ k l wuol ni mɑɑn nɑ mɔktuk nbɑ yɑb bonciɑnn k tul niib kul ɑ. L wuol ni mɑɑn tie ɑ Klistu be i ni k i mun mɔk dindɑnn nɑn i sɑɑ lɑ Yennu *yudɑnt nɑ.

Kuoluostieb 1:5

Yuo nbɑ k bɑlmɔni nbɑ tie lɑbɑmɑnn din sint k bɑɑl i buol nɑ, i din gbɑt dindɑnn nbɑ be l lɑbɑmɑnn ni wɑɑ. I din jii i yɑdɑ nɑn i lonm k tien l dindɑnn ni. Yennu bekl l dindɑnn *Yendɔunŋ ni k guun’i.

Kuoluostieb 2:2

N yɑɑ i pɑlɑ n cie e, k yin lɑkn tɑɑn lieb nɑn lonm, kii mɔk dindɑnn kul nbɑ bɑɑt nɑn bɑlmɔni minu. Nnɑ e kii sii mi Yennu wuol ni lɑbɑɑl nbɑ tie *Klistu tiɑɔnŋ nɑ.

Kuoluostieb 3:15

I ŋɑɑn k Klistu mɑnu ii diɑ i pɑlɑ kii ŋmɑktl’i. Yennu lɑkn yiin’i gbɑnɑn-yent kuɑ ni ɑ yii mɔk mɑnu mɑnŋ e. Ii tien Yennu niipuouk mɑn.

1 Tesɑɑluoniiktieb 2:12

k cien k biɑ mɑɑnt i pɑlɑ, k tun kpɑɑn’i ɑ ii mɔk binbensiɑk nbɑ sɑɑ gbuo Yennu nunm, wun nbɑ yiin’i ɑ yin kuɑ u tiɑɔnŋ nɑɑn ni k gɑɑl u dontl.

1 Tesɑɑluoniiktieb 5:8

Ŋɑɑn tinm nbɑ tie yennu ni yɑb nɑ, tii diɑ t mɔnŋ, k jii yɑdɑ nɑn lonm liɑ nɑn *nɑɑgbɑnkɔnŋl nɑ, k biɑ jii fielu dindɑnn k yi’l nɑn kut-foklk nɑ.

2 Tesɑɑluoniiktieb 1:11

L pɑɑk e k t mei Yennu yuo kul k tien’i. T mei’ɔ, ɑ wun te k yin jɑnŋ nɑn binbenŋ nbɑ k u yiin’i, ɑ i be lenŋ nɑ ni e. T mei’ɔ, ɑ wun jii u yiikuo k te k yii tuun tuonŋɑnɑ kul nbɑ k i luon, ɑ yii tuun nɑ, k gbenn tuonɑ kul nbɑ k i tuun i yɑdɑ pɑɑk nɑ.

2 Tesɑɑluoniiktieb 2:16

T Yonmdɑɑnɔ Yiesu Klistu tiɑɔnŋ nɑn t Bɑɑ Yennu nbɑ luon’t, k tul’t pɑlcienn nbɑ kɑɑ gbennu nɑn dindɑnn nbɑ ŋɑn, u ninkpɑbɑɔnŋ nɑ pɑɑk nɑ,

1 Tiimuote 6:12

A yɑdɑ pɑɑk kɔnin kunkɔnŋɑnn, k suol mɑnfuol nbɑ kɑɑ gbennu nbɑ k Yennu din yiin’ɑ ɑ fɑn gɑɑl yuo nbɑ k ɑ din nyinn ɑ mɔnŋ siɑlŋɑnn niib bonciɑnn nunm ni nɑ.

Tiit 2:13

Nnɑ e k t sii guu mɑnu nbɑ k t dɑɑn nɑ, dɑɑl nbɑ k Yiesu Klistu, wun nbɑ tie t Yenjɑɑnn nɑn t Fietuɑ nɑ, tɑn sɑɑ dɔkt yentsɑɑkɑl ni nɑ.

Tiit 3:7

Yennu ninkpɑbɑɔnŋ pɑɑk k u din tun nnɑ ɑ wun tien’t niŋɑnm u buol, k biɑ tien’t u wɑɑs nbɑ mɔk dindɑnn k t sɑɑ lɑ mɑnfuol nbɑ kɑɑ gbennu.

Hebluonbɑ 10:32

Ii tiɑn mɑn yuo nbɑ gɑl nɑ lɑbɑɑl. Yennu yentu nbɑ din yent i pɑɑk yuo nbɑ, i din di fɑlɑ bonciɑnn, ŋɑɑn l fɑlsiɑl din k nyɑnn’i ni.

Hebluonbɑ 6:4

Ŋɑɑnt mɑn k tin got bin nbɑ ŋmɑt bɑɑ binbenbiik ni nɑ: b din lɑ Yennu yentu nɑ wɑɑ. B din lenm **Yendɔunŋ ni piini k biɑ din gɑɑl Foŋɑnm ɑ.

1 Piɑl 1:3

Pɑkn mɑn Yennu nbɑ tie t Yonmdɑɑnɔ Yiesu Klistu Bɑɑ nɑ, k mɑɑn u tin’t ninbɑɑɔk bonciɑnn k tul’t mɑnfopɑɑnn Yiesu Klistu kuun fiilu pɑɑk. Lin nbɑ nɑ e te k t mɔk dindɑnn nɑn t tɑn sii mɔk mɑnfuol,

1 Piɑl 3:9

I dɑɑ tuun biit k jiint biit pɑɑk. I biɑ dɑɑ suki k jiint suɑ, ŋɑɑn jiin sukt mɑnŋ nɑn yetŋɑnm, k mɑɑn Yennu din yiin’i, ɑ yin gɑɑl u yetŋɑnm e.

1 Piɑl 5:10

I fɑlɑ nɑ dinu kɑn wei, k Yennu nbɑ tin’i ninbɑɑɔk k biɑ yiin’i ɑ yin lɑ dontl nbɑ kɑɑ gbennu Klistu ni nɑ, sɑɑ ŋɑnm i binbenŋ, k cie i yɑdɑ, k pukn’i pɑnŋ, k senn’i fiɑkl nbɑ wɑki nɑ pɑɑk.