Sofonii 1:13 - Mbeti ti Nzapa - Tënë so amu fini

¹³ Fade a yeke nzi amosoro ti ala, a yeke buba ada ti ala; ala yeke sara ada, me ala yeke lango na ya ni pepe; ala yeke fâ ayaka ti *vinye, me ala yeke nyon vin ni pepe.”

Sofonii 1:13 Iomraidhean Croise

Ésaïe 6:11

Tongaso mbi hunda ndo, mbi tene: “KOTA GBIA, ye ni so ayeke gue ngbii asi lawa?” Lo kiri tënë, lo tene: “Ye ni ayeke gue ngbii asi na ndembe so a buba agbata kue, zo oko ayeke ngba na ya ti agbata ni pepe, zo oko ayeke ngba na ya ti da pepe, sese ayeke buba kue si ayeke ga ngonda.

Jérémie 15:13

“Mo Juda, anzoni ye ti mo na amosoro ti mo, mbi yeke mu azo titene ala gbu ahon na ni, fade mo yeke wara ye oko na peko ni pepe. So ayeke ye ti peko ti asioni ye ti mo kue laa, asioni so kue mo sara na ndö ti sese ti mo mobimba.

Jérémie 17:3

Mo, mara ti Juda, mo so mo yeke voro anzapa nde na ndö ti ahoto nga na yaka so, fade mbi yeke zia azo titene ala ga agbu anzoni ye ti mo na amosoro ti mo kue; ala yeke gbu aye na ando so mo leke na nduzu. Mbi yeke sara ye ni ndali ti asioni ye so mo sara na sese ti mo kue.

Jérémie 4:20

Azo ayeke dekongo, atene: “Aye abuba na peko ti tere, na peko ti tere!” Biani, kodro ni kue abuba awe! Gi hio tongaso, azo abuba ada ti mbi ti bongo; ala buba nga gbefa ti mbi.

Jérémie 4:7

Bamara alondo na ya ti gbako ti lo si ayeke sigigi. Zo ti bubango kodro ti amara nde alondo awe, lo yeke ga. Lo londo na ndo ti lo si lo yeke ga ti buba kodro ti mo; fade lo yeke sara si agbata ti mo aga ngonda si zo ayeke daa mbeni pepe.

Jérémie 5:17

Fade ala yeke te ale ti kobe ti mo na mapa ti mo kue; ala yeke te amolenge ti mo ti koli na ti wali; ala yeke te anyama ti mo kue: abagara, ataba na angasa; ala yeke te akeke ti *vinye na ti fige ti mo. Agbata ti mo so gbagba ti bira ayeke na tere ni si mo baa mo tene, mbeni sioni ye ayeke wara mo na ya ni pepe so, fade ala yeke buba ni kue na lege ti bira.

Jérémie 9:11

Mbeni zo ti ndara ayeke daa so alingbi ti ma ya ti tënë so? Tongana zo ni ayeke daa, ayeke nzoni tënë so KOTA GBIA azia na yanga ti lo, lo fa ni na azo polele. Lo fa nda ni so kodro ni abuba; nda ni so kodro ni agbi si aga gi benyama so; nda ni so zo ayeke hon daa oko pepe so.

Jérémie 9:19

Ala awali, ayeke nzoni ala ma tënë so KOTA ayeke tene na ala; ala zi mê ti ala mbirimbiri ti ma tënë so lo yeke tene na ala. Ala fa na amolenge ti ala ti wali abia ti demango tere; ala awali, ala oko oko kue afa abia ti totongo kuâ na amba ti ala.

Abia ti demango tere 5:2

Asese so ayeke ti e wani so, akiri aga ti awande. Ada ti lango ti e akiri aga ti azo so e hinga le ti ala laoko pepe.

Ezekiel 22:31

Tongaso, mbi tuku ngonzo ti mbi na ndö ti ala; mbi hunzi ala kue na lege ti ngonzo ti mbi ti wâ; mbi sara si sioni sarango ye ti ala akiri na li ti ala. So tënë ti yanga ti Kota Gbia NZAPA laa.”

Ezekiel 7:19

Ala yeke tuku nginza ti ala na ndö ti alege, lôro ti ala ayeke ga tongana zende na le ti ala. Na lango ti ngonzo ti KOTA GBIA, nginza na lôro ti ala alingbi ti soo ala pepe. Ala yeke wara kobe ti kai na nzara ti ala pepe, ala yeke kui nzara, ngbanga ti so nginza na lôro laa abi ala na ya ti siokpari.

Ezekiel 7:21

Fade mbi yeke zia awande titene ala nzi aye ni, agodobe agbu ni tongana ye so agbu na peko ti bira ti hon na ni. Ala yeke sara si aye ni aga sioni.

Ezekiel 7:24

Fade mbi yeke sara titene amara so ayeke sioni ahon ndoni aga amu ada ti ala. Mbi yeke kai baba ti angangu zo, awato ni ayeke sara si ando ti vorongo anzapa ti ala aga sioni.

Amos 5:11

Ala yeke sara ngangu na azo ti mawa, ala yeke gbu ale ti kobe ti azo ni na ngangu. Ndani laa apendere da so ala sara na têne so, fade ala yeke lango na ya ni pepe; anzoni vinye so ala lu so, fade ala yeke nyon vin ni pepe.

Mishe 3:12

Ndani laa, ndali ti ala, fade Sion ayeke ga tongana yaka so a de ni awe, Jérusalem ayeke ti kue na sese si hoto so kota da ti Nzapa ayeke daa, ndö ni ayeke ga ngonda.

Mishe 6:15

Ala yeke lu ale ti kobe, me ala yeke ko ale ti kobe ni pepe. Ala yeke pete ale ti olive, me ala yeke sara kua na mafuta ni pepe. Ala yeke pete ale ti *vinye, me ala yeke nyon vin ni pepe.

Sofonii 1:9

Na lango ni so, fade mbi yeke ga na tere ti azo so kue ayeke huru hurungo ti li na ya ti da, ala so ayeke sara si ya ti da ti makonzi ti ala asi singo na aye so ala gbu na ngangu nga na aye so ala wara na lege ti handango zo.

Ndia ti fani use ni 28:30

Zo so ahunda tënë ti mungo wali, mbeni koli nde laa ayeke lango na wali ni. Zo so asara da, lo yeke lango na ya ni pepe; zo so afâ yaka ti *vinye, ataa akozo le ti vinye ni, lo yeke ko ni pepe.

Ndia ti fani use ni 28:39

Ala yeke lu ayaka ti vinye, ala yeke leke tere ni nzoni, me ala yeke nyon vin ni pepe; ala yeke ko ale ti vinye ni nga pepe, ngbanga ti so asioni makongo ayeke te ni kue.

Ndia ti fani use ni 28:51

Azo ti mara ni so ayeke gbu anyama ti ala na akobe ti yaka ti ala. Ti ala, azo ti Israel, ala yeke kui na nzara. Azo ti mara ni ayeke zia mbeni ye oko na ala pepe, ataa *ble, ataa mafuta, ataa akete bagara ti ala, ataa akete taba ti ala, ataa akete ngasa ti ala. Azo ti mara ni ayeke sara tongaso ngbii ala hunzi kue.