Sigingo 13:16 - Mbeti ti Nzapa - Tënë so amu fini

¹⁶ Asandaga so ayeke ga ye ti dango be ti ala, legeoko tongana mbeni nzoroko na tere ti maboko ti ala nga na ndö ti le ti ala. Asandaga ni ayeke dabe ti ala na ngangu ti maboko ti KOTA GBIA, lo so lo zi ala na Ezipte lo sigigi na ala.”

Sigingo 13:16 Iomraidhean Croise

Néhémie 1:10

KOTA GBIA, e yeke azo ti kua ti mo, e yeke azo ti mo! E laa mo zi e na gbe ti ngbaa na lege ti kota ngangu ti mo nga na lege ti ngangu ti maboko ti mo.

Abia (Psaumes) 136:11

lo mu azo ti Israel na popo ti ala, lo sigigi na ala. – Biani, nzoni be ti lo angba kpu na kpu!

Sigingo 12:13

Me ti ada so ala yeke lango daa, mene ayeke duti tongana mbeni nzoroko ndali ti ala. Fade mbi yeke baa ni si mbi yeke hon hongo na ndö ti ada ni, mbi yeke luti pepe. Tongaso kpale so ayeke buba ndo ayeke wara ala pepe, na ndembe so mbi yeke fâ azo ti Ezipte.

Sigingo 12:41

Na peko ti ngu ngbangbo osio na baleota so, taa gi na lango ni so, azo ti KOTA GBIA asigigi na ya ti kodro ti Ezipte na lege ti molongo ti amara ti ala.

Sigingo 13:14

Gbanda, tongana amolenge ti ala ahunda ala, atene: ‘Nda ti ye so ala sara so ayeke nyen?’ Fade ala kiri tënë na ala, atene: ‘Na ngangu ti maboko ti KOTA GBIA, lo sara si e sigigi na Ezipte, ndo so lani e yeke angbaa daa so.

Sigingo 13:9

Na lege ti ngangu ti maboko ti KOTA GBIA laa, lo zi ala na Ezipte, lo sigigi na ala. Fade matanga so ayeke ga ye ti dango be ti ala, legeoko tongana mbeni nzoroko na tere ti maboko ti ala nga na ndö ti le ti ala. Matanga ni ayeke dabe ti ala so, ala lingbi ti fa *Ndia ti KOTA GBIA na azo.

Sigingo 6:1

KOTA GBIA atene na Moïse: “Fafadeso, mo yeke baa ye so mbi yeke sara na Faraon. Na lege ti ngangu ti maboko ti mbi, mbi yeke sara si lo zia lege na azo ti Israel ti gue. Na lege ti ngangu ti mbi, mbi yeke sara si lo tumba ala na ya ti kodro ti lo!”

Sigingo 6:6

Ndani laa, fade mo yeke tene na azo ti Israel, mo tene: ‘Mbi laa mbi yeke KOTA GBIA. Mbi yeke zi ala na gbe ti akua ti ngbaa ti Ezipte; mbi yeke zi ala na gbe ti ngbaa so azo ti Ezipte azia ala daa. Mbi yeke yoro maboko ti mbi si mbi yeke fâ ngbanga ti ngangu na ndö ti azo ti Ezipte si mbi yeke zi ala, azo ti Israel.

Amato 6:21

Bata atënë ni lakue na be ti mo; mo kanga ni na go ti mo tongana ye ti go.

Daniel 9:15

“Kota Gbia Nzapa ti e, na lege ti ngangu ti maboko ti mo, mo sara si azo ti mo asigigi na sese ti Ezipte; nilaa iri ti mo awu ngbii asi laso. Me e ke yanga ti mo, e sara siokpari.

Matthieu 23:5

Ye so kue awafango-ye ni ayeke sara, ala yeke sara ni gi titene azo abaa ala. Tongaso, ala yeke sara titene ya ti akete kete bozo ti poro so ala su tënë ti Nzapa si azia na ya ni so akono, kamba so ala leke na yanga ti bongo ti ala aga kota.

Awatokua 13:17

Nzapa ti azo ti Israel asoro akotara ti e. Lo sara si li ti azo ni awu mingi na ndembe so ala yeke wande na kodro ti Ezipte. Na pekoni, na lege ti ngangu ti lo, lo sara si ala londo na Ezipte asigigi.

Ndia ti fani use ni 11:18

Atënë ti ndia so mbi yeke fa ni na ala, alingbi ala bata ni na ya ti be ti ala nga na ya ti yingo ti ala. Titene be ti ala agirisa na ni pepe, fade ala yeke kanga ni na maboko ti ala nga na ndö ti le ti ala.

Ndia ti fani use ni 26:8

KOTA GBIA asara si e sigigi na sese ti Ezipte na lege ti ngangu ti maboko ti lo nga na lege ti maboko ti lo so lo yoro; na lege ti akota ye ti ziango mbeto na be ti zo, na lege ti aye ti kpene nga na lege ti aye ti dongo be.

Ndia ti fani use ni 5:15

Mo dabe ti mo so, ando mo yeke ngbaa na Ezipte si KOTA GBIA Nzapa ti mo asara si mo sigigi na lege ti ngangu ti maboko ti lo nga na lege ti maboko ti lo so lo yoro. Ndani laa, KOTA GBIA Nzapa ti mo amu yanga na mo titene mo bata lango ti wungo tere.

Ndia ti fani use ni 6:21

Fade ala yeke kiri tënë na ala, atene: “Ando, e yeke angbaa ti gbia Faraon na sese ti Ezipte; me KOTA GBIA asara si e sigigi na ya ti kodro ni na lege ti kota ngangu ti lo.

Awafango-ngbanga 2:12

Ala do KOTA GBIA, Nzapa ti akotara ti ala azia, lo so lo sara si ala sigigi na kodro ti Ezipte so. Ala gue, avoro ambeni nzapa nde so ayeke anzapa ti azo so alango nduru na ala. Ala kuku na gbe ti anzapa ni si ala zia ngonzo na be ti KOTA GBIA.