Osée 8:6 - Mbeti ti Nzapa - Tënë so amu fini

⁶ Kete bagara ti Samarii ni alondo na Israel, mbeni zo ti sarango ye na kode laa aleke ni; kete bagara ni ayeke Nzapa pepe. Biani, fade a yeke fâ ya ti lo kete kete.

Osée 8:6 Iomraidhean Croise

2 Agbia 23:15

Yosias akungbi ni na sese gbalaka so ayeke na gbata ti Betel nga na ndo so ayeke na ndö ti hoto so Yeroboam asara ti pusu azo ti Israel ti sara siokpari. Lo gbi ndo ni nga na keke so a leke si aluti na nduzu ndali ti nzapa-wali *Ashera, lo gbi ni si aga fuku.

2 Agbia 23:19

Na ya ti agbata ti Samarii, agbia ti Israel aleke lani na ndö ti ahoto ando ti vorongo anzapa nde daa. Ye so agbia so asara so azia ngonzo mingi na be ti KOTA GBIA. Yosias akungbi nga na sese ada so kue gi tongana ti so lo sara na Betel.

2 Mbai 13:8

Fadeso, ala ye ti londo ti ke kodro-gbia so KOTA GBIA amu na *ahale ti David. Yeroboam, mo na azo ti mo, ala yeke gbani gbani si na popo ti ala, ala yeke na abagara ti lôro so Yeroboam asara titene aga anzapa ti ala.

2 Mbai 31:1

So matanga ni ahunzi awe, azo ti Israel so kue ayeke kâ ague na ya ti agbata ti Juda, ala fâ ya ti angbongboro têne so a leke si aluti na nduzu, ala kungbi na sese akeke so a leke si aluti na nduzu ndali ti nzapa-wali *Ashera, ala buba ando so azo aleke na ndö ti ahoto ti voro anzapa nde daa, ala buba nga agbalaka ti ando ni. Ala sara gi oko ye so na sese ti Juda kue, ti Benjamin, ti Efraim na ti Manase. Na pekoni, azo ti Israel kue akiri na ya ti agbata ti ala, zo oko oko na ndo ti lo.

Jérémie 10:14

Azo kue ayeke azo so li ti ala ayeke daa pepe, ala hinga ndo pepe; awakode-kua kue ti lôro, kamene agbu le ti ala ndali ti ayanda ti ala, ayanda ti ala ni ayeke ye ti mvene, pupu ayeke na ya ti ala pepe.

Jérémie 48:13

Fade Kemosh, nzapa ti Moab ayeke bi kamene na le ti lo tongana ti so Betel, nzapa ti Israel abi kamene na le ti lo. Andaa Israel azia ando be ti lo kue na ndö ti nzapa ni so.

Jérémie 50:2

“Ala azo, ala fa tënë ni na popo ti amara nde, ala sara si azo ama tënë ni na lege ti bendere so ala yo na nduzu; ala sara si azo ama tënë ni, ala honde ni pepe! Ala tene: A mu Babilone awe! Kamene ahon ndö ti ayanda ti lo awe! Biani, kamene ahon ndö ti Bel awe, Marduk ati biani biani awe!

Osée 10:2

Be ti azo ti Israel ayeke use use. Fadeso ala yeke wara ye ti peko ti sioni ti ala: *KOTA GBIA wani ayeke kinda agbalaka ti ala si lo yeke kungbi angbongboro têne ti ala so ala leke aluti na nduzu so.

Osée 13:2

Ti fadeso, azo ti Efraim angba ti sara siokpari: ala kporo wen si asara na anzapa nde, ala mu wen ti nginza ti ala si na lege ti kode ti ala, ala sara na ayanda. Ye so kue ayeke ye ti maboko ti awakode-kua. Ndali ti anzapa ni, azo ayeke tene: “Azo, ala mu asandaga na anzapa ni!” Azo ayeke su ngbangba ti akete bagara!

Osée 14:3

Ala kiri na KOTA GBIA si ala tene na lo atënë so: “Sioni so kue e sara so, zi tënë ni na li ti e. Yamba e na nzoni be! E ye ti ya na mo atënë ti yanga ti e, ahon titene e ya na mo *sandaga ti akoli-bagara.

Mishe 1:7

Fade a yeke fâ ya ti ayanda ti gbata ni kue; aye so azo ti gbata ni awara, fade a yeke gbi ni kue na wâ, ngbanga ti so ala wara ni na lege ti sarango aye ti ndumba. Fade aye ni ayeke kiri ti hon na lege ti sarango aye ti ndumba.”

Habakuk 2:18

Yanda so zo amu keke si aleke na ni, kua ti lo ayeke nyen? Wen so zo akporo na wâ si lo leke na limo ti yanda ni so, limo ni ayeke fa tënë ti mvene. Wakode-kua laa aleke aye ni so, ala yeke tene tënë pepe; lo zia be ti lo na ndö ti ayanda ni ngbanga ti nyen?

Awatokua 17:29

So e yeke amolenge ti Nzapa, e lingbi ti baa Nzapa pepe tongana anzapa so zo amu lôro, wen ti nginza wala têne si aleke na ni na lege ti ndara na kode ti lo.

Awatokua 19:26

Fadeso, ye so asi, ala baa ni si ala ma nga tënë ni: koli so iri ti lo Paul ayeke tene, anzapa so azo ayeke leke ayeke anzapa oko pepe si lo sara kue titene azo mingi ayeda ti mu peko ti lo. Azo ti Efeze ge na ala ti sese ti Azii nga amu peko ti lo.