Osée 8:10 - Mbeti ti Nzapa - Tënë so amu fini

¹⁰ Ataa azo ti Efraim amu akadoo na amara nde, mbi yeke bongbi ala fadeso. Gi na ya ti kete ngoi, ala yeke baa pasi na gbe ti nengo kungba ti gbia ti amakonzi.

Osée 8:10 Iomraidhean Croise

2 Agbia 14:26

Biani, KOTA GBIA abaa ye ti vundu ti azo ti Israel; ye ti vundu so ahon ngangu ni. Zo oko ayeke daa pepe, ataa mbeni ngbaa, ataa mbeni senge zo ti mu maboko na Israel.

2 Agbia 17:3

Salmanasar, gbia ti Asirii aga ti tiri bira na Osée. Osée aga zo ti gbe ti lo si ayeke futa lapo na ngu oko oko.

2 Agbia 17:4

Me mbeni lâ, gbia ti Asirii ama a tene, Osée aleke tënë na hondengo ni na tere ti lo. Biani, Osée atokua azo na Sö, gbia ti Ezipte, nilaa lo ke ti futa lapo na gbia ti Asirii tongana ti so lo yeke sara kozoni na ngu oko oko. Tongaso Salmanasar agbu Osée si abi lo na da ti kanga.

1 Mbai 5:26

Nilaa Nzapa ti Israel azia na be ti agbia ti Asirii, Pul na Teglat-Falasar titene ala ga amu sese ti amara ni si ala gbu azo ni ague na ala na Hala, Habor nga na Hara, nduru na *bale ti Gozan. Ala ngba kâ ngbii asi laso.

Ésaïe 10:8

Lo tene: ‘Amakonzi ti aturugu ti mbi kue ayeke agbia pepe?

Ésaïe 30:2

Ala mu lege ti gue na Ezipte, me ala hunda mbi pepe. Ala yeke gi titene Faraon aga tongana ngangu gbagba ti batango ala, ala yeke gi ndo ti hondengo tere ti ala na gbe ti de ti Ezipte!

Ésaïe 36:13

Na pekoni, makonzi ti aturugu ti batango gbia ti Asirii aluti na nduzu si lo dekongo na kota go na yanga ti hebro, lo tene: “Ala ma tënë ti kota gbia, gbia ti Asirii si!

Jérémie 42:2

wayanga-Nzapa Jérémie si ala tene na lo: “E gbu gere ti mo, ayeke nzoni vorongo tere ti e agbu be ti mo. Sambela *KOTA GBIA, Nzapa ti mo ndali ti tanga ti e so e ngba na fini so. Lani e yeke mingi, fadeso e ngba gi kete, tongana ti so mo yeke baa na le ti mo so.

Ezekiel 16:33

Awali-ndumba kue ayeke wara futa; me ti mo, mo laa mo mu kadoo na andeko ti mo kue. Mo futa ala titene ala londo na ando nde nde aga ti lango na mo.

Ezekiel 16:37

Ndani laa, mbi yeke bongbi andeko so kue mo nzere na le ti ala so, ala so kue mo ye ala nga na ala so kue be ti mo ake ala. Mbi yeke bongbi ala na ndo kue ti ga na tere ti mo; mbi yeke zi bongo kue na tere ti mo na le ti ala titene ala baa tere ti mo so kue angba senge so.

Ezekiel 22:20

A yeke bongbi wen ti nginza, bengba wen, wen, plon na eten na ya ti tawa. Na pekoni, a yeke tingo wâ na gbe ni ti sara si aga ngu. Gi tongana ti so a sara na wen so, na lege ti ngonzo ti mbi, na lege ti ngonzo ti mbi ti wâ, fade mbi yeke bongbi ala ti zia ala na ya ti wâ si mbi yeke sara titene ala ga ngu.

Ezekiel 23:5

Me Ohola asara ye ti ndumba, ataa so lo yeke ti mbi. Azo ti Asirii so alango nduru na lo, lo sara nzara ti ala mingi si lo sara ndeko na ala.

Ezekiel 26:7

“Biani, tënë so mbi Kota Gbia NZAPA, mbi tene ayeke so: Mbi yeke sara titene Nabukodonosor, gbia ti Babilone, kota gbia ti agbia alondo na mbage ti Banga ti ga na tere ti mo, gbata ti Tir. Lo yeke ga na ambarata, apusu ti mbarata, azo ti kpengo na mbarata nga na aturugu gbani gbani.

Daniel 2:37

O gbia! Mo yeke gbia ti agbia. Nzapa so ayeke na yayu laa azia mo gbia; lo mu na mo komandema, ngangu na gonda.

Osée 10:10

KOTA GBIA atene: “Fade mbi yeke pika ala tongana ti so be ti mbi aye; gba ti amara ayeke bongbi na ndö ti ala ti tiri bira na ala ndali ti asioni use so ala sara.

Osée 12:2

Pupu aga kobe ti azo ti Efraim, ala yeke tumba peko ti pupu ti To, ti londo na ndaperere ngbii asi na lakui; ala yeke tene mvene mingi mingi si ala yeke sara ngangu na azo. Ala na azo ti Asirii aleke tënë ti ga *ambuki, ala yeke tokua mafuta na azo ti Ezipte.

Aggée 2:6

Biani, tënë so KOTA GBIA so ayeke na ndö ti dunia kue atene ayeke so: Gi na ya ti kete ngoi, angba mingi pepe, fade mbi yeke yingi nduzu na sese, kota ngu-ingo na kuru sese.