Osée 7:13 - Mbeti ti Nzapa - Tënë so amu fini

¹³ “Mawa na azo ti Efraim, ngbanga ti so ala kpe yongoro na tere ti mbi! Kota kpale na ndö ti ala, ngbanga ti so ala tomboka na tere ti mbi! Ala so ayeke tene mvene na tere ti mbi so, fade mbi yeke zi ala tongana nyen?

Osée 7:13 Iomraidhean Croise

Néhémie 1:10

KOTA GBIA, e yeke azo ti kua ti mo, e yeke azo ti mo! E laa mo zi e na gbe ti ngbaa na lege ti kota ngangu ti mo nga na lege ti ngangu ti maboko ti mo.

Mbeti ti Job 22:17

Azo ni ayeke tene na Nzapa: “Zia e kpoo! Lo so ngangu ti lo ahon angangu kue so, nyen laa lo lingbi ti sara na e, nyen?”

Abia (Psaumes) 106:10

Lo soo ala na maboko ti azo so ake ala, lo zi ala na maboko ti awato.

Ésaïe 30:1

Mawa na amolenge ti ngangu li! So tënë ti yanga ti *KOTA GBIA laa. Ala yeke leke apialo so alondo na mbi pepe; ala yeke sara *ambuki kirikiri so be ti mbi aye tënë ni pepe. Ala yeke sara si siokpari aga na ndö ti tere, na ndö ti tere.

Ésaïe 30:2

Ala mu lege ti gue na Ezipte, me ala hunda mbi pepe. Ala yeke gi titene Faraon aga tongana ngangu gbagba ti batango ala, ala yeke gi ndo ti hondengo tere ti ala na gbe ti de ti Ezipte!

Ésaïe 31:1

Mawa na azo so ayeke gue na Ezipte titene a mu maboko na ala! Ala zia be ti ala na ndö ti ambarata, na ndö ti apusu ti mbarata, ngbanga ti so apusu ni ayeke gbani gbani; ala zia be ti ala na ndö ti azo ti kpengo na mbarata, ngbanga ti so ala yeke na ngangu mingi. Me ala yeke baa ndo na mbage ti Nzapa ti Israel pepe, lo so lo yeke nde si lo yeke nzoni kue; ala yeke gi *KOTA GBIA pepe.

Ésaïe 41:14

“Jacob, sara mbeto pepe, mo so mo yeke tongana ngusu, Israel, mo so mo yeke tongana makongo. Mbi yeke ga ti mu na mo maboko, so tënë ti yanga ti *KOTA GBIA laa. Mbi laa mbi yeke zi mo, mbi Nzapa ti Israel so mbi yeke nde si mbi yeke nzoni kue.

Ésaïe 43:1

Me fadeso mo Jacob, lo so lo sara mo, mo Israel, lo so lo leke mo, tënë so KOTA GBIA atene ayeke so: “Mo sara mbeto pepe, mbi zi mo awe, mbi iri mo na iri ti mo, mo yeke ti mbi.

Ésaïe 59:13

e ke ndia ti mo, e bere tënë ti mo, e ke ti mu peko ti mo, Nzapa ti e, e tene gi atënë ti sarango ngangu na zo nga na sarango ngangu li. Ye so e leke na be ti e na ye so e gbu li ti e daa ayeke gi atënë ti mvene.

Ésaïe 63:8

Lo tene tënë ti azo ti Israel, lo tene: “Biani, ala yeke azo ti mbi; amolenge ti mbi so alingbi ti handa mbi pepe.” Lo laa lo yeke wasongo ala.

Jérémie 14:10

Tënë so KOTA GBIA atene na azo so ayeke so: “Biani, ala ye gi ti tambula kirikiri, ngbonda ti ala agbu sese pepe.” Ye ni anzere na be ti KOTA GBIA pepe. Fadeso, lo dabe ti lo na asioni ti ala, lo yeke pika ala ndali ti aye ti kirikiri ti ala.

Jérémie 42:20

Ala tokua mbi na KOTA GBIA, Nzapa ti ala ti hunda lo ndali ti tënë ti ala. Ala tene na mbi: ‘Sambela KOTA GBIA, Nzapa ti e ndali ti e. Tënë so kue KOTA GBIA ayeke tene, tene na e, fade e yeke sara ni.’ Andaa kuâ laa ala iri na ndö ti ala.

Jérémie 51:9

– “E ye ti kai kobela na tere ti Babilone, me tere ti lo aga nzoni pepe. Ayeke nzoni e zia lo, zo oko oko akiri na kodro ti lo. Biani, ngbanga so ati na ndö ti lo ayeke ngangu mingi; ague ngbii asi na le ti nduzu, ague ngbii asi na ambinda.

Jérémie 7:15

Mbi yeke tumba ala yongoro na le ti mbi tongana ti so mbi tumba a-ita ti ala, azo ti mara ti Efraim so.”

Abia ti demango tere 5:16

Nengo ti e ti amolenge ti gbia ati awe. E sara siokpari awe; so mawa na e, azo!

Ezekiel 16:23

“Na peko ti sioni so kue mo sara, so mawa na mo! Ae, so mawa na mo! So tënë ti yanga ti Kota Gbia NZAPA laa.

Ezekiel 18:2

“Na sese ti Israel, azo ayeke tene mato so lakue: ‘Ababâ ate akpi-kpi le ti *vinye, me pembe ti amolenge laa akui.’ Ala yeke tene ni ngbanga ti nyen?

Ezekiel 18:25

Me ala yeke tene: ‘Sarango ye ti KOTA GBIA ayeke na legeni pepe!’ Ala azo ti Israel, ala ma tënë so nzoni: Mbi laa sarango ye ti mbi ayeke na legeni pepe? Wala ala laa sarango ye ti ala ayeke na legeni pepe?

Ezekiel 34:6

Ataba ti mbi ahon kirikiri na ndö ti akota hoto kue nga na ndö ti akete hoto kue; ataba ti mbi akangbi kirikiri, mbage na mbage na ndö ti sese kue. Zo oko ti baa tënë ti ala ayeke daa pepe; zo oko ti gi ala ayeke daa pepe.

Osée 11:2

Me na pekoni, so mbi yeke iri ala, ala yeke hon gi hongo yongoro na tere ti mbi. Ala mu *sandaga na anzapa *Baal, ala zö dukani na ayanda.

Osée 5:7

Ala ka KOTA GBIA, ngbanga ti so ala du amolenge so a hinga babâ ti ala pepe. Fadeso, gi na ya ti nze oko, a yeke hunzi ala kue nga na amosoro ti ala.”

Osée 7:1

si mbi ye ti kai kobela ti Israel, sioni ti Efraim na sioni sarango ye ti azo ti Samarii ayeke sigigi polele. Azo ayeke handa amba ti ala ti mu ye ti ala, azo ti nzi ayeke li na ya ti da ti nzi ye ti azo, asioni zo amu ndö ti alege kue.

Osée 7:3

Ala yeke zia ngia na be ti gbia, andaa ala yeke asioni zo; ala yeke zia ngia na be ti amakonzi, andaa ala yeke azo ti mvene.

Osée 9:12

Ataa ala yeke bata amolenge-koli, mbi yeke kanga lege na ala titene ala kono. Biani, mawa na ala, azo ti Efraim, tongana mbi hon yongoro na tere ti ala!

Osée 9:17

Fade Nzapa ti mbi ayeke ke ala, ngbanga ti so ala ma lo pepe. Fade ala yeke tambula kirikiri na popo ti amara nde.

Jonas 1:10

Na pekoni, Jonas afa na azo ni peko ti ye so asi na lo. So ala hinga atene, Jonas ayeke kpe yongoro na le ti KOTA GBIA, be ti ala kue afun si ala hunda lo, atene: “Mo sara mara ti ye tongaso ngbanga ti nyen?”

Jonas 1:3

Me Jonas alondo ti lo ti kpe ti gue na Tarsis, yongoro na le ti KOTA GBIA. Lo gue, lo si na Zafa. Kâ, lo wara mbeni mangboko so ayeke gue na Tarsis. Lo futa mangboko ni si lo na azo ti ya ni kue alondo ti gue na Tarsis, yongoro na le ti KOTA GBIA.

Mishe 6:12

Azo ti mosoro ti gbata ni ayeke sara gi ngangu na zo; azo ti gbata ni ayeke tene gi mvene. Tënë so ayeke sigigi na yanga ti ala ayeke gi tënë ti handango zo.

Mishe 6:4

Mbi mu ando ala na sese ti Ezipte, mbi sigigi na ala; mbi zi ala na gbe ti ngbaa si mbi tokua Moïse, Aaron na Miriam ti fa na ala lege. So sioni laa mbi sara so?

Matthieu 23:37

“Jérusalem! Jérusalem! Mo so mo yeke fâ awayanga-Nzapa; azo so Nzapa atokua ala na mo, mo bo ala na têne ti fâ ala. Lege mingi, mbi ye fade ti bongbi azo ti mo na gbe ti mbi tongana ti so mama ti kondo ayeke bongbi amolenge ti lo na gbe ti maboko ti lo, me mo yeda pepe!

Ndia ti fani use ni 15:15

Ayeke nzoni ala dabe ti ala so ala wani, ala yeke ando angbaa na sese ti Ezipte si KOTA GBIA Nzapa ti ala azi ala. Ndani laa, mbi yeke mu yanga so na ala laso.

1 Jean 1:10

Tongana e tene, e sara siokpari pepe, andaa e yeke sara si Nzapa aga zo ti mvene si tënë ti lo ayeke na be ti e pepe.

Aye so Nzapa afa 8:13

Mbi kiri mbi baa ndo, mbi ma mbeni *ngoalo so ayeke huru yongoro kâ na le ti nduzu si ayeke dekongo, atene: “Mawa! Mawa! Mawa na azo ti ndö ti sese ndali ti atatalita so a-ange ota ayeke huru ni ande!”