Osée 4:3 - Mbeti ti Nzapa - Tënë so amu fini

³ Ndani laa fade ndo ayeke hole kue na ya ti kodro ni, azo ti kodro ni kue ayeke nge ngengo, ala, na anyama ti ngonda na andeke ti nduzu; ataa asusu ti kota ngu-ingo ayeke hunzi kue.

Osée 4:3 Iomraidhean Croise

Ésaïe 33:9

Sese ni ayeke na mua, ayeke hole holengo. Agbako ti Liban ahole kue si kamene ahon ndö ti ala. Lando ti Saron ahole kasakasa. Ahoto ti Bashan na ti Karmel, akeke ayeke daa mbeni pepe.

Jérémie 12:4

Kodro ni ayeke ngba na mua ngbii asi lawa? Apere ti ayaka kue ayeke ngba ti hole ngbii asi lawa? Ndali ti sioni ti azo ti kodro ni, anyama na andeke ayeke kui kue. Azo ni ayeke tene: “Jérémie ayeke hunzi kozo ti e.”

Jérémie 23:10

“Kodro so asi singo na azo ti sarango aye ti ndumba. Sese ni ayeke na mua ndali ti adengo ba, ndo ti tengo pere ti anyama ahole kasakasa. Azo ni ayeke kpe gi na peko ti ye ti sioni; be ti ala awoko pepe na sarango ye so akpa pepe.

Jérémie 4:25

Mbi baa ndo: baa, zo ayeke daa mbeni pepe, andeke kue akpe ahon.

Jérémie 9:10

KOTA GBIA atene: “Mbi yeke sara titene Jérusalem aga ndo so ye kue abuba daa; ndo so aga ndo ti lango ti *anzagua. Mbi yeke sara si agbata ti Juda aga gi ngonda, ndo so zo ayeke daa mbeni pepe.”

Jérémie 9:9

Ndali ti ahoto, mbi yeke toto si mbi yeke dema tere; ndali ti ndo so anyama ayeke te ka pere daa, mbi yeke he bia ti totongo kuâ, ngbanga ti so ndo ni kue agbi awe; zo ayeke hon daa mbeni pepe; a yeke ma go ti anyama na ndo ni so pepe. Ataa andeke ti nduzu na anyama, ala kue ahon, mbeni oko angba pepe.

Ezekiel 38:20

Asusu ti kota ngu-ingo, andeke ti nduzu, anyama ti ngonda, anyama so kue ayeke hara harango nga na azo kue ti ndö ti sese, tere ti ala ayeke do na mbeto na dawa ti mbi. Ahoto ayeke ti na sese, atêne ayeke tuku na sese, agbagba kue ayeke ti na sese.

Joël 1:18

Anyama ayeke dema mingi! Abagara atomboka kirikiri, ngbanga ti so ala wara pere ti tengo ni pepe. Ataa ataba, ala yeke baa nga pasi.

Amos 1:2

Amos atene: “Ti londo na hoto ti *Sion, KOTA GBIA ayeke toto tongana bamara; ti londo na Jérusalem, lo dekongo ngangu. Apere ti awabatango-nyama ahole kue awe, ndö ti hoto ti Karmel ahole kasakasa.”

Amos 5:16

Ndani laa, tënë so KOTA GBIA, Nzapa so ayeke na ndö ti dunia kue atene ayeke so: “Na ndo so kue azo ayeke bongbi daa, fade azo ayeke ma abia ti totongo kuâ; na ndö ti alege kue, azo ayeke tene: ‘So ye ti mawa ti nyen! So ye ti mawa ti nyen!’ Fade a yeke iri zo ti fango yaka ti ga ti toto kuâ; a yeke iri nga azo so ahinga lege ti totongo kuâ ti ga ti toto kuâ.

Amos 8:8

Ndani laa, fade sese ayeke yingi si azo ti kodro ni kue ayeke duti na vundu. Fade sese ni kue ayeke londo na nduzu, na pekoni, ayeke kiri na gbeni tongana kota ngu ti Ezipte so asuku si akiri na gbeni.

Nahum 1:4

Lo suku na kota ngu-ingo si kota ngu-ingo ni ahole; lo sara titene *abale kue ahole. Tongaso apere so ayeke na sese ti Bashan na akeke ti hoto ti Karmel ahole; akongo ti pere ti hoto ti Liban ahole.

Sofonii 1:3

Fade mbi yeke hunzi azo na anyama kue, andeke ti le ti nduzu na asusu ti kota ngu-ingo kue; mbi yeke hunzi asioni zo nga na aye so kue ayeke sara si ala yeke ti so. Mbi yeke hunzi azo kue kue kue na ndö ti sese.” So tënë ti yanga ti KOTA GBIA laa.

Zakarii 5:4

So tënë ti yanga ti *KOTA GBIA so ayeke na ndö ti dunia kue laa: mbi yeke tokua deba ni titene ali na ya ti da ti zo ti nzi, nga na ya ti da ti zo ti dengo ba ti mvene na iri ti mbi. Dengo ba ni ayeke ngba na ya ti da ti azo ni, ayeke buba ni kue, ataa akeke ti li ni, ataa atêne ni.”