Osée 2:21 - Mbeti ti Nzapa - Tënë so amu fini

²¹ Fade mo yeke duti wali so mbi mu mo titene mo ga wali ti mbi kpu na kpu. Ye so mbi yeke ka na peko ti mo ayeke ye ti mbirimbiri nga na ndia, yengo tere nga na nzoni be.

Osée 2:21 Iomraidhean Croise

Ésaïe 55:10

Ngu-Nzapa na *neze alondo na le ti nduzu si ayeke ti na sese. Ala yeke kiri na le ti nduzu senge pepe: ala yeke tuku na ndö ti sese, ala yeke sara si sese ni awoko pendere, ala yeke sara si ale ti kobe asigigi. Lege so zo ti lungo kobe ayeke wara ale ti kobe ti lungo ni na kobe ti tengo ni laa.

Ésaïe 62:4

Azo ayeke kiri ti iri mo pepe, “Gbata so azo ado azia”, azo ayeke kiri ti di iri ti kodro ti mo pepe, “Sese so aga ngonda awe”. Me azo ayeke di iri ti mo, “Wali so mbi yeke wara ngia na lege ti lo”, azo ayeke di iri ti sese ti mo, “Wali ti koli”. Biani, fade KOTA GBIA ayeke wara ngia na lege ti mo si sese ti mo ayeke ga wali ti koli.

Ésaïe 62:5

Tongana ti so maseka-koli ayeke mu maseka-wali ti ga wali ti lo, legeoko nga, lo so lo yeke kiri ti leke mo, fade lo yeke ga koli ti mo. Tongana ti so fini wali ayeke zia ngia na be ti koli ti lo, fade mo yeke zia ngia na be ti Nzapa ti mo.

Ésaïe 65:24

Kozo titene ala di iri ti mbi, mbi, mbi yeke kiri tënë na ala; tënë angba ngbango na yanga ti ala, mbi ma ala awe.

Ezekiel 36:29

Mbi yeke zi ala na ya ti *asioni ti ala kue. Mbi yeke kiri ti tokua nzara na ya ti kodro ti ala pepe, me mbi yeke sara titene le ti kobe asigigi si ale gbani gbani.

Osée 14:7

Lo yeke ga tongana keke so amaboko ni agbara tere, pendere ti lo ayeke duti tongana ti keke ti olive, fion ti lo ayeke duti tongana nzoni fion ti keke ti Liban.

Joël 2:19

Lo kiri tënë na azo ti lo, lo tene: “Baa, mbi yeke kiri ti mu na ala *ble, fini vin nga na nzoni mafuta. Ala yeke wara ni gbani gbani alingbi na ala. Mbi yeke kiri ti sara si amara nde azia kamene na le ti ala pepe.

Zakarii 13:9

Fade mbi yeke mu ota mbage ti azo so angba na fini so, mbi yeke hon na ala na le ti wâ ti zi sioni ye na tere ti ala tongana ti so a yeke kporo wen ti nginza na ya ti wâ ti zi sioni ye na tere ni. Mbi yeke tara ala ti zi sioni ye na tere ti ala tongana ti so a yeke tara lôro na le ti wâ ti zi sioni ye na tere ni. Fade ala yeke iri mbi ti mu maboko na ala; ti mbi, mbi yeke ma ala. Mbi yeke tene: ‘Ala yeke azo ti mbi’, ala yeke tene: ‘KOTA GBIA ayeke Nzapa ti e.’ ”

Zakarii 8:12

Biani, fade mbi yeke sara si siriri amu ndö ti sese kue, akeke ti *vinye ayeke le, sese ayeke du ale ti kobe, yayu ayeke tokua ngu-Nzapa. Mbi yeke mu anzoni ye so na tanga ti azo ti Israel so angba titene aga ye ti ala.

Zakarii 8:8

Fade mbi yeke kiri na ala si ala yeke duti na Jérusalem. Ala yeke duti azo ti mbi si mbi yeke duti Nzapa ti ala. Mbi yeke sara komandema na ndö ti ala na lege ti batango tënë ti yanga ti mbi na fango ngbanga ti mbirimbiri.”

Malashii 3:10

Adime ti aye so ala wara, ala ga na ni kue na ya ti kubu ti batango mosoro ti da ti mbi titene kobe aduti lakue na ya ti da ti mbi. Ala sara tongaso ti tara mbi, ala baa tongana mbi zi fenetere ti yayu ti tuku anzoni ye ti mbi gbani gbani na ndö ti ala pepe si. Tënë so KOTA GBIA so ayeke na ndö ti dunia kue atene laa.

Malashii 3:11

Fade mbi yeke kanga lege na akete nyama so ayeke te akobe ti yaka ti ala titene anyama ni abuba akobe ti ala pepe; mbi yeke kanga lege si akeke ti *vinye ti ala so ayeke le pepe so, akiri ale. Tënë so KOTA GBIA so ayeke na ndö ti dunia kue atene laa.

Matthieu 6:33

Ala gi lege ti *Kodro-gbia ti Nzapa kozoni, ala sara nga ye so ayeke mbirimbiri na le ti lo; fade lo yeke mu na ala tanga ti aye kue na ndö ni.

Rome 8:32

Nzapa agbanzi Molenge ti lo na e pepe, me lo ka lo ndali ti e kue; fade lo yeke ke ti mu na e aye kue tongana nyen?