Mishe 7:1 - Mbeti ti Nzapa - Tënë so amu fini

¹ Mawa na mbi! Mbi yeke tongana zo so ague ti gi ale ti keke na peko ti so azo ako ale ti keke ni kue awe; mbi yeke tongana zo so ague ti gi ale ti *vinye na peko ti so azo afâ ale ti vinye ni awe. Me mbi wara mbeni ye oko ti tengo ni pepe, ataa le ti vinye wala le ti fige so anzere na mbi mingi so.

Mishe 7:1 Iomraidhean Croise

Abia (Psaumes) 120:5

Mawa na mbi so mbi lango na popo ti awande, mawa na mbi so mbi duti na popo ti azo ti sarango sioni so!

Amato 20:6

Azo mingi ayeke gonda tere ti ala atene, ani yeke nzoni; me zo wa laa alingbi ti wara zo so lo lingbi ti zia be ti lo na ndö ti lo?

Ésaïe 17:6

Azo kete laa ayeke ngba na Israel tongana ti so ale ti keke ayeke ngba gi kete na ya ti keke, tongana ti so zo afâ ale ti olive awe, gi ale ni use wala ota laa ayeke ngba na li ti keke ni, wala ale ni osio wala oku laa ayeke ngba na tere ti amaboko ti keke ni. So tënë ti yanga ti KOTA GBIA, Nzapa ti Israel laa.

Ésaïe 24:13

Biani, na ndö ti sese, na popo ti amara, ye ayeke ngba gi kete tongana ti so ale ti keke ti olive ayeke ngba gi kete na ya ti keke ni na peko ti so a fâ ale ti olive ni awe, tongana ti so a fâ ale ti vinye si ahunzi awe.

Ésaïe 24:16

Na nda ti sese kâ, e yeke ma bia so: “Gonda na Nzapa so ayeke mbirimbiri!” Ti mbi, mbi tene: “Ti mbi ahunzi awe! Ti mbi ahunzi awe! So mawa na mbi!” Azo ti kango zo ayeke sara kua ti ala. Ala yeke ka amba ti ala! Azo ti kango zo ayeke sara kua ti ala.

Ésaïe 28:4

Kongo so awoko awe si ayeke sara pendere ti gbata ni, gbata so ayeke na nduzu ti popo-hoto so akobe ayeke le daa mingi so, fade ayeke ga tongana le ti fige so abe kozo na ngoi ti fango ale ti kobe. Gi so mbeni zo abaa le ti fige ni, lo mu ni si hio lo mene ni.

Ésaïe 6:5

Tongaso mbi tene: “Mawa na mbi, mbi kui awe! Mbi yeke zo so tënë ti yanga ti mbi ayeke *sioni, mbi yeke lango na popo ti azo so tënë ti yanga ti ala ayeke *sioni. Mbi baa na le ti mbi wani Gbia, KOTA GBIA so ayeke na ndö ti dunia kue.”

Jérémie 15:10

Mama ti mbi, so mawa na mbi so mo du mbi so! Na ya ti kodro ni kue, azo ake mbi, ala ye gi kuâ ti mbi. Yongo ti mbi ayeke na li ti zo pepe, yongo ti mbeni zo ayeke na li ti mbi nga pepe, me azo kue ayeke deba mbi!

Jérémie 24:2

Afige so ayeke na ya ti kozo sakpa ni ayeke pendere ahon ndoni; ala yeke tongana akozo bengo fige. Afige ti ya ti use sakpa ni ayeke sioni ahon ndoni, akpa titene zo ate ni pepe.

Jérémie 4:31

Mbi ma mbeni go; go ni akpa ti wali so ya ti lo ayeke so ti du si lo yeke dema tere ti lo. Go ni akpa ti wali so ayeke du kozo molenge ti lo; go ni so ayeke go ti *Sion, pendere gbata: lo wu pupu gbaa si lo yeke dema; lo yoro maboko ti lo na nduzu si lo tene: “Ti mbi awe! Azo ti fango zo afâ mbi awe!”

Jérémie 45:3

Mo tene: ‘So mawa na mbi! Mbi baa pasi kozoni awe, me KOTA GBIA akiri azia mbeni vundu na ndö ni! Mbi woko kue awe na peko ti dema ti mbi; mbi wara lege ti wu tere pepe!’

Jérémie 5:1

“Ala tambula na ndö ti alege ti Jérusalem mbage na mbage kue, ala baa ndo, ala hunda ndo, ala gi ndo na ndö ti abalabala ti wara mbeni zo, zo so ayeke sara ye mbirimbiri, zo so ayeke sara ye na legeni. Tongana ala wara mbeni zo oko tongaso, fade mbi yeke zi siokpari na li ti azo ti Jérusalem.”

Osée 9:10

KOTA GBIA atene: “Ando, mbi wara Israel tongana nzerengo ale ti *vinye na benyama. Mbi wara akotara ti ala tongana akozo nzoni le ti keke so asigigi na li ti keke ti fige. Me so akotara ti ala asi na Bet-Peor awe, ala mu tere ti ala kue na *Baal, nzapa ti kamene. Nilaa ala ga sioni mingi tongana anzapa so ala ye tënë ti ala so.

Wungo ti azo 18:13

Akozo le ti kobe ti sese ti ala so azo ayeke ga na ni na mbi ayeke ga ti ala. Zo so kue ayeke *nzoni na ya ti sewa ti ala alingbi ti te ni.