Mishe 4:13 - Mbeti ti Nzapa - Tënë so amu fini

¹³ “Ala azo ti Jérusalem, ala londo, ala gue, apika ale ti kobe ni! Fade mbi yeke sara titene ala ga ngangu tongana bagara so adidi ti lo ayeke na wen si asokoto ti gere ti lo ayeke na bengba wen. Fade ala yeke nika amara gbani gbani; aye so ala gbu na peko ti bira, ala zia ni nde ndali ti mbi, KOTA GBIA; amosoro ti azo ni, ala zia ni nde ndali ti mbi, Kota Gbia ti sese kue.”

Mishe 4:13 Iomraidhean Croise

Abia (Psaumes) 24:1

Bia ti David. Sese so na aye ti ndö ni kue ayeke ti *KOTA GBIA. Dunia so na azo ti ndö ni kue ayeke ti lo.

Abia (Psaumes) 68:29

Nzapa ti mo amu yanga titene mo ga ngangu. Nzapa, fa ngangu ti mo, mo so mo sara ye mingi ndali ti e so!

Abia (Psaumes) 72:10

Agbia ti kodro ti Tarsis na ala ti azoa so ayeke yongoro kâ ayeke tokua na lo akadoo; agbia ti kodro ti Saba na ala ti Seba ayeke futa lapo na lo.

Ésaïe 18:7

Na ngoi ni so, fade azo ayeke ga na anzoni ye na KOTA GBIA so ayeke na ndö ti dunia kue; azo ni ayo mingi, poro ti tere ti ala ayeke za zango, ala yeke zia mbeto na be ti azo na ndo so ngbii asi na ndo kue, ala yeke nika awato ti ala, abale ahon na ya ti kodro ti ala. Fade a yeke ga na anzoni ye na li ti hoto ti *Sion, ndo so KOTA GBIA so ayeke na ndö ti dunia kue ayeke duti daa.

Ésaïe 21:10

Ala azo ti mbi so a pika ala tongana *ble na ndö ti lakere so, tënë so mbi ma na yanga ti KOTA GBIA so ayeke na ndö ti dunia kue, Nzapa ti Israel, tënë ni laa mbi yeke fa na ala so.

Ésaïe 23:18

Me aye so gbata ni ayeke wara nga na futa ti lo, a yeke zia ni nde ndali ti KOTA GBIA. A yeke bongbi ni pepe, a yeke bata ni pepe. Aye so lo wara so, a yeke vo na kobe na azo so ayeke duti na dawa ti KOTA GBIA, ala te ya ti ala asi; a yeke vo nga na apendere bongo na ala.

Ésaïe 5:28

Ala leke yanga ti ale ti kokora ti ala aza, ala gboto ya ti kamba ti kokora ti ala. Asokoto ti gere ti ambarata ti ala akpengba tongana têne, gere ti apusu ti ambarata ti ala ayeke turne wirrr tongana ngangu pupu.

Jérémie 51:20

“Babilone, lani mo yeke martoo, mo yeke ye ti bira ti mbi. Mbi mu mo ti nika amara nde nga ti buba akodro-gbia.

Jérémie 51:33

Tënë so KOTA GBIA so ayeke na ndö ti dunia kue, Nzapa ti Israel atene ayeke so: “So mawa na lo, maseka-wali Babilone! Lo ga tongana lakere so azo ayeke leke ni titene a pika ale ti kobe daa. Angba gi kete titene ngoi ti kongo ale ti kobe ndali ti lo ayeke lingbi.”

Daniel 2:44

Na ngoi ti agbia ni, fade Nzapa so ayeke na yayu ayeke sara mbeni kodro so ayeke buba laoko pepe; kodro ni ayeke ti na gbe ti azo ti ambeni mara nde pepe. Fade kodro ni ayeke fâ si ayeke nika ambeni kodro ni kue; gi kodro oko so laa ayeke ngba ti lo lakue lakue.

Osée 10:11

“Efraim ayeke tongana kete mama ti bagara so aleke lo nzoni si lo ye ti pika ale ti *ble. Tongana mbi baa konongo go ti lo, mbi ye fade ti kanga nengo keke na go ti Efraim; ka tongaso, Juda afâ ti lo yaka si Israel apika ti lo ya ti sese.

Mishe 5:7

Azo ti Israel so ayeke ngba na fini na popo ti amara gbani gbani, ayeke ga tongana bamara na popo ti anyama ti ngonda, tongana kete bamara na popo ti ataba. Na hongo ti lo na popo ti ala, lo yeke do ala na gere ti lo si lo yeke suru ya ti ala; zo oko alingbi ti zi ala na maboko ti lo pepe.

Habakuk 3:12

Na ngonzo na be ti mo, mo yeke tambula na ndö ti sese; na kota ngonzo na be ti mo, mo yeke do amara na gbe ti gere ti mo.

Zakarii 12:3

Biani, na lango ni so, fade mbi yeke sara titene Jérusalem aga tongana mbeni ngbongboro têne ndali ti amara kue; têne so zo alingbi ti yo ni na nduzu pepe. Zo so kue aye ti yo ni, lo yeke wara ka. Tongaso, amara ti sese kue ayeke bongbi oko ti tiri na lo.

Zakarii 12:6

Na lango ni so, fade mbi yeke sara titene amakonzi ti Juda aduti tongana mbeni kota le ti wâ na ya ti gbako, wala tongana mbeni *tanda so a zia wâ daa na gbe ti gba ti ale ti kobe. Fade ale ti wâ ni ayeke te mbage na mbage kue amara so kue angoro ala. Me azo ti Jérusalem ayeke ngba ti duti gi na ya ti gbata ti ala.”

Zakarii 4:14

Tongaso lo tene na mbi: “Akeke ti olive ni ayeke akoli so a tuku mafuta na li ti ala si a zia ala nde ndali ti kua ti KOTA GBIA, lo so lo yeke Makonzi ti sese kue.”

Zakarii 6:5

Ange ni akiri tënë na mbi: “Ala yeke andangoro osio ti le ti nduzu. Ala yeke luti ando na dawa ti *KOTA GBIA so ayeke Makonzi ti sese kue; fadeso ala londo ti hon.”

1 Korente 16:2

Na layenga, fade zo oko oko ayeke mu mbeni nginza, lo zia ni nde na da ti lo alingbi na ye so lo wara. Tongaso, ala to nda ti bongbi nginza ni kozoni si mbi si.

Ndia ti fani use ni 33:25

Ayeke nzoni a kanga yanga ti gbagba ti lo na angbongboro kerere ti wen na ti bengba wen. Ayeke nzoni ngangu ti lo angba alingbi na lango ti fini ti lo kue!”

Josué 6:19

Wen ti nginza kue na lôro nga na aye so kue a sara na bengba wen nga na wen, fade ala zia ni nde ndali ti KOTA GBIA; ala zia ni na ya ti kubu so a yeke bata amosoro ti KOTA GBIA daa.”