Marc 3:5 - Mbeti ti Nzapa - Tënë so amu fini

⁵ Jésus abaa le ti ala oko oko kue na ngonzo; be ti lo awara vundu ngbanga ti sioni be ti ala. Lo tene na koli ni: “Yoro ya ti maboko ti mo.” Lo yoro ni si maboko ti lo akiri aga nzoni.

Marc 3:5 Iomraidhean Croise

Tongo nda ti aye 6:6

Nilaa be ti KOTA GBIA aso ndali ti so lo sara zo si lo zia lo na ndö ti sese so. Vundu agbu be ti lo mingi.

1 Agbia 13:6

Gbia amu tënë si lo tene na zo ti Nzapa so, lo tene: “Mbi gbu gere ti mo, mo toto na KOTA GBIA, Nzapa ti mo titene ngonzo ti lo ade. Mo sambela lo ndali ti mbi titene mbi kiri na maboko ti mbi na tere ti mbi.” Zo ti Nzapa so asambela si ngonzo ti KOTA GBIA ade; gbia akiri na maboko ti lo na tere ti lo tongana ti kozoni.

Néhémie 13:8

Ngonzo asara mbi mingi si mbi mu agbakuru ti Tobia so ayeke na ya ti kubu ni, mbi tuku na gigi.

Abia (Psaumes) 95:10

Na ya ti ngu baleosio, azo ti ngoi ni so asara ye so aso be ti mbi, nilaa mbi tene: ‘Li ti azo so ague kirikiri awe, lege so mbi ye ala mu, ala hinga ni pepe.’

Matthieu 12:13

Na pekoni, Jésus atene na koli so: “Yoro ya ti maboko ti mo.” Lo yoro ni si maboko ti lo aga nzoni tongana ti mbage ni.

Marc 3:4

Na pekoni, lo hunda azo ni, lo tene: “*Ndia afa nyen na e? A fa na e ti sara nzoni wala sioni, ti soo fini ti zo wala ti fâ zo na lango ti wungo tere?” Me zo oko akiri tënë pepe.

Nzoni Tënë so Luc asu na mbeti 13:15

*Kota Gbia akiri tënë na lo, atene: “Ala so tënë ti yanga ti ala ayeke nde na sarango ye ti ala so! Na lango ti wungo tere, ala oko oko ayeke zi bagara ti ala wala lele ti ala na ndo so a kanga lo daa ti gue na lo titene lo nyon ngu pepe?

Nzoni Tënë so Luc asu na mbeti 17:14

So lo baa ala, lo tene na ala: “Ala gue, afa tere ti ala na awayango-sandaga.” Na lege ti guengo ni, tere ti ala aga *nzoni.

Nzoni Tënë so Luc asu na mbeti 6:10

Jésus abaa le ti ala oko oko kue si lo tene na koli ni: “Yoro ya ti maboko ti mo!” Lo yoro ni si maboko ti lo aga nzoni.

Jean 9:7

si lo tene na lo: “Gue mo sukula le ti mo na du ti ngu ti Siloe.” Nda ti iri ti Siloe atene “Zo ti tokua”. Tongaso koli ni ague, lo sukula le ti lo si na kiringo ti lo, lo baa ndo nzoni.

Rome 11:25

A-ita, mbi ye titene ala hinga taa-tënë so a sigigi na nda ni awe, tongaso si ala baa tere ti ala tongana azo ti ndara pepe. Tënë ni ayeke so: fade ambeni zo ti Israel ayeke ngba ti sara ngangu li ngbii asi na ndembe so wungo ti azo ti amara nde alingbi, so ti tene ala so ayeke li na popo ti azo ti Nzapa.

2 Korente 3:14

Me lege ti hingango ndo ti ala akanga ando! Ndani laa, ti londo na ndembe ni so ngbii asi laso, tongana ala yeke diko mbeti ti Kozo Mbuki, bongo ni angba ti kanga le ti ala; a de azi bongo ni so pepe. A yeke zi bongo ni gi na le ti zo so aga oko na Christ.

Efeze 4:18

Hingango ndo ti ala ayeke na ya ti vukongo ndo; fini so Nzapa ayeke mu na zo, ala wara ni pepe, ngbanga ti so be ti ala akpengba si ala hinga ndo pepe.

Efeze 4:26

Tongana ala sara ngonzo, ala sara hange si ala sara siokpari pepe; ala bata ngonzo na be ti ala ngbii asi na lakui pepe.

Efeze 4:30

Ala mu vundu na Yingo-Vuru pepe. Yingo-Vuru ayeke tongana nzoroko so Nzapa azia na tere ti ala ti fa so ala yeke ti lo. Na lege ti Yingo-Vuru, Nzapa akiri afa so mbeni lâ, fade lo yeke zi ala na ya ti siokpari biani biani.

Ahebro 3:10

na ya ti ngu baleosio. Ndani laa ngonzo asara mbi na tere ti ala si mbi tene lani, mbi tene: ‘Li ti ala ayeke gue lakue gi kirikiri; ala ke ti hinga lege so mbi ye ala mu.’

Ahebro 3:17

Be ti lo aso na ya ti ngu baleosio na azo wa? Be ti lo aso na azo so asara siokpari si ala kui na ya ti benyama.

Ahebro 5:9

So lo sara aye so kue lo lingbi fade ti sara awe, Jésus aga zo ti songo azo so kue ayeke ma yanga ti lo si lo yeke sara titene ala duti na fini lakue lakue.

Aye so Nzapa afa 6:16

Ala tene na ahoto na atêne ni, atene: “Ala ti na ndö ti e. Ala honde e si lo so lo yeke duti na ndö ti mbata ti gbia so abaa e pepe, tongaso si e kpe ngonzo ti Molenge ti Taba so!

Awafango-ngbanga 10:16

Na pekoni, azo ti Israel aga azi anzapa ti awande so ayeke na popo ti ala, ala kiri avoro KOTA GBIA. Tongaso, KOTA GBIA akanga be ti lo gbaa na ndö ti pasi so azo ti Israel ayeke baa.

1 Samuel 20:34

Jonatan asara ngonzo mingi, lo londo na tere ti kobe ni, lo ke ti te kobe na use lango ti matanga ti fini nze so. Be ti lo aso mingi ndali ti David, ngbanga ti so babâ ti lo azonga David mingi.