Marc 13:9 - Mbeti ti Nzapa - Tënë so amu fini

⁹ Me ti ala, ala sara hange! Fade azo ayeke gue na ala na gbe ti ngbanga; azo ayeke pika ala na ya ti ada ti sambelango Nzapa. Ala yeke luti na le ti agovoronere na agbia ndali ti mbi titene ala tene tënë ti mbi na le ti ala.

Marc 13:9 Iomraidhean Croise

Matthieu 5:22

Ti mbi, mbi tene na ala: zo so asara ngonzo na tere ti ita ti lo, fade a yeke gue na lo na ngbanga; zo so atene na ita ti lo: ‘Buba zo!’, fade a yeke gue na lo na gbe ti azo ti *Kota Bongbi ti Fango Ngbanga; zo so atene na ita ti lo: ‘Mo, zo ti gbogbolinda so!’, lo lingbi titene a bi lo na ndo so wâ ayeke gbi daa lakue.

Marc 1:44

lo tene: “Mo tene tënë ni na zo oko pepe, me mo gue, mo fa tere ti mo na wayango-sandaga, mo mu *sandaga so Moïse amu yanga ando ti mungo ni so. Tongaso si mo fa na le ti azo kue so tere ti mo aga nzoni awe.”

Marc 13:5

Tongaso Jésus atene na ala: “Ala sara hange si mbeni zo ahanda ala pepe!

Marc 13:8

Fade mbeni mara ayeke londo ti tiri na mbeni mara, mbeni kodro-gbia ayeke londo ti tiri na mbeni kodro-gbia; sese ayeke yingi na ando nde nde, kota nzara ayeke ga. Fade aye so ayeke duti tongana kozo songo ti ya ti wali so aga nduru ti du.

Marc 6:11

Tongana azo ti mbeni kodro ake ti yamba ala, wala aye ti ma tënë ti ala pepe, ala londo na ndo ni so ahon. Ala pika sese ti gbe ti gere ti ala ti fa na azo ni so ala sara sioni awe.”

Nzoni Tënë so Luc asu na mbeti 9:5

Ndo so kue azo ayeke yamba ala daa pepe, ala sigigi na ya ti gbata ti azo ni, ala pika sese ti gbe ti gere ti ala, ti fa sioni ti azo ni na le ti ala wani.”

Jean 15:20

Ala dabe ti ala na tënë so mbi tene na ala: ‘Zo ti kua ayeke kota ahon makonzi ti lo pepe.’ Fade azo ayeke sara ngangu na ala tongana ti so azo ni asara ngangu na mbi. Tongana azo ni asara fade ye alingbi na tënë ti mbi, ka ala sara nga ye alingbi na tënë ti ala.

Jean 16:2

Fade azo ayeke tumba ala na ya ti ada ti sambelango Nzapa. Na ndö ni, ngbonga ni ayeke ga so fade ambeni zo ayeke fâ ala si azo ni ayeke tene na be ti ala atene, kua ti Nzapa laa ala yeke sara so.

Awatokua 21:11

Lo ga ti baa e. Lo mu kamba ti ndö ti bongo ti Paul, lo kanga gere ti lo na maboko ti lo na ni si lo tene: “Ala ma tënë so Yingo-Vuru atene: fade azuife ayeke kanga wa ti kamba so tongaso na Jérusalem si ala yeke zia lo na maboko ti azo so ahinga Nzapa pepe.”

Awatokua 7:54

So azo ti *Kota Bongbi ti Fango Ngbanga ni ama tënë so, ngonzo ti ala alondo tongana wâ si ala yeke te pembe ti ala na tere ti Étienne.

Awatokua 9:16

Mbi wani laa mbi yeke fa na lo pasi so lo yeke baa ande ndali ti iri ti mbi.”

Filipe 1:29

Nzapa asara nzoni be na ala gi titene ala ma na be na Christ pepe, me ti baa nga pasi ndali ti lo.

2 Tesalonike 1:5

Ye so kue afa atene, fango ngbanga ti Nzapa ayeke mbirimbiri. Biani, ye ni ayeke sara titene ala lingbi na *Kodro-gbia ti Nzapa so ala yeke baa pasi ndali ni.

2 Jean 1:8

Ala sara hange! Tongaso, fade ye ti peko ti kua ti e agirisa na maboko ti ala pepe, me ala wara futa ti kua ti ala kue.

Aye so Nzapa afa 1:9

Mbi Jean, ita ti ala, mbi na ala kue, e yeke na ya ti ye ti ngangu. Na lege ti gango so e ga oko na Jésus, e yeke kanga be ti e na ya ti ye ti ngangu ni si mbi na ala, e yeke azo ti *Kodro-gbia ti Nzapa. A bi mbi na ya ti zoa ti Patmos ndali ti tënë ti Nzapa so mbi fa nga ndali ti taa-tënë so Jésus afa.

Aye so Nzapa afa 2:10

Mo yeke baa ande pasi, me ayeke nzoni mbeto ti pasi ni asara mo pepe. Baa, fade Zabolo ayeke bi ambeni zo na popo ti ala na da ti kanga, ti tara be ti ala, azo ti Nzapa; na ya ti lango baleoko kue, a yeke sara ngangu na ala. Ayeke nzoni mo bata tënë ti mbi ngbii asi na kuâ, fade mbi yeke mu na mo nzoni ye so a yeke mu na zo so aso benda, so ti tene fini so angba lakue lakue.

Aye so Nzapa afa 2:13

Mbi hinga ndo so mo yeke duti daa: ayeke ndo so Satan azia mbata ti lo ti gbia daa, me mo ngba na tere ti mbi; be ti mo so mo zia na ndö ti mbi, mo zia lege ni pepe, ataa na ndembe so a fâ Antipas, lo so lo fa tënë na ndö ti mbi na legeni, na ndo so Satan azia mbata ti lo ti gbia daa.