Marc 13:8 - Mbeti ti Nzapa - Tënë so amu fini

⁸ Fade mbeni mara ayeke londo ti tiri na mbeni mara, mbeni kodro-gbia ayeke londo ti tiri na mbeni kodro-gbia; sese ayeke yingi na ando nde nde, kota nzara ayeke ga. Fade aye so ayeke duti tongana kozo songo ti ya ti wali so aga nduru ti du.

Marc 13:8 Iomraidhean Croise

2 Mbai 15:6

Mara ayeke tiri na mbeni mara, gbata ayeke tiri na mbeni gbata, ngbanga ti so Nzapa ayingi ala na lege ti aye ti ngangu nde nde.

Abia (Psaumes) 48:6

Gi so ala baa KOTA GBIA awe, be ti ala ado, mbeto agbu ala ahon ndoni si ala kpe kirikiri.

Ésaïe 19:2

*KOTA GBIA atene: “Mbi yeke pusu azo ti Ezipte na tere ti amba ti ala, zo oko oko ayeke tiri na ita ti lo, zo oko oko ayeke tiri na mba ti lo mbeni gbata ayeke tiri na mbeni gbata, mbeni kodro-gbia ayeke tiri na mbeni kodro-gbia.

Ésaïe 29:6

KOTA GBIA so ayeke na ndö ti dunia kue ayeke ga ti mu maboko na mo na lege ti toto ti bekpa, na lege ti ye so atoto ngangu, na ya ti ngangu pupu, na ya ti pupu ti ngu-Nzapa nga na wâ so ayeke gbi ye kue.

Ésaïe 37:3

Ala tene na lo: “Tënë so Ezekias atene ayeke so: ‘Lango ti laso ayeke lango ti ye ti ngangu, lango ti kota kpale, lango ti kota kamene. Azo ayeke tene: molenge aga nduru ti sigigi na ya ti mama ti lo, me ngangu atia mama ni ti du molenge ni.

Jérémie 13:21

Azo so lani mo mu lege na ala ti ga akamarade ti mo so, na ndembe so ala yeke ga ti so na ndö ti mo, fade mo yeke tene nyen? Mo yeke baa pasi tongana wali na ndembe ti dungo ni.

Jérémie 22:23

Mo so lani mo duti kpoo na ndö ti hoto ti Liban; lani mo sara da ti mo na ya ti keke ti sedre tongana ti ndeke, fade mo yeke dema na ndembe so pasi ayeke ga na ndö ti mo; ye ayeke gboto mo si mo yeke do tere ti mo tongana wali na ndembe ti dungo ni!”

Jérémie 25:32

Tënë so KOTA GBIA so ayeke na ndö ti dunia kue atene ayeke so: “Kota kpale alondo na mbeni mara asi na mbeni mara, ngangu pupu ti ngu-Nzapa alondo na nda ti sese kâ si ayeke ya.”

Jérémie 4:31

Mbi ma mbeni go; go ni akpa ti wali so ya ti lo ayeke so ti du si lo yeke dema tere ti lo. Go ni akpa ti wali so ayeke du kozo molenge ti lo; go ni so ayeke go ti *Sion, pendere gbata: lo wu pupu gbaa si lo yeke dema; lo yoro maboko ti lo na nduzu si lo tene: “Ti mbi awe! Azo ti fango zo afâ mbi awe!”

Jérémie 49:24

Be ti azo ti Damas awoko kue awe, ala turne tere ti ala ti kpe ti hon, ala yeke do na mbeto. Be ti ala afun kue si ala yeke baa pasi tongana wali na ndembe ti dungo ni.

Jérémie 50:43

So gbia ti Babilone ama tënë ni, ngangu ti lo kue ahunzi, vundu agbu be ti lo si lo baa pasi tongana wali na ndembe ti dungo ni.

Jérémie 6:24

“Na mango tënë so, e woko kue si be ti e afun kue. E baa pasi tongana wali na ndembe ti dungo ni.

Aggée 2:22

Mbi yeke kinda mbata ti agbia si mbi yeke zi ngangu ti akodro-gbia ti amara; mbi yeke kinda apusu ti mbarata na azo ti kpengo na ni; ambarata na azo ti kpengo na ambarata ni ayeke ti. Zo oko oko ayeke fâ mba ti lo na yongoro zeme.

Zakarii 14:13

Na lango ni so, fade KOTA GBIA ayeke bi kota mbeto na popo ti ala; zo oko oko ayeke londo ti tiri na mba ti lo, ala yeke gbu tere na tiri na popo ti ala.

Matthieu 24:8

Fade aye so kue ayeke duti tongana kozo songo ya ti wali so aga nduru ti du.

Marc 13:7

Ala azo ti mbi, tongana ala yeke ma tënë ti bira so aga nduru wala tënë ti bira so angba yongoro, ala sara mbeto pepe! Alingbi aye so asi, me so laa ayeke hunzingo ti aye kue pepe.

Marc 13:9

Me ti ala, ala sara hange! Fade azo ayeke gue na ala na gbe ti ngbanga; azo ayeke pika ala na ya ti ada ti sambelango Nzapa. Ala yeke luti na le ti agovoronere na agbia ndali ti mbi titene ala tene tënë ti mbi na le ti ala.

Awatokua 11:28

Mbeni oko so iri ti lo Agabus alondo, lo tene na azo ye so Yingo-Vuru afa na lo, lo tene: “Fade mbeni kota nzara ayeke ga na ndö ti sese kue.” – Nzara ni aga biani na ndembe so Claude ayeke kota gbia ti Rome. –

1 Tesalonike 5:3

Na ndembe so azo ayeke tene ande, atene: “E yeke na siriri, mbeni ye ti sarango e ayeke daa pepe!”, gi na ndembe so laa kota kpale ayeke ti na ndö ti ala fafade tongana songo ya ti mama ti ngo so aga nduru ti du. Fade ala yeke wara lege ti sigigi na ya ni pepe.

Aye so Nzapa afa 6:4

Tongaso, mbeni mbarata ni asigigi, tere ti lo abe tongana wâ. A mu ngangu na zo so aduti na ndö ti mbarata ni ti zi siriri na ndö ti sese titene azo afâ tere na popo ti ala. A mu nga na lo yongoro zeme.