Marc 12:28 - Mbeti ti Nzapa - Tënë so amu fini

²⁸ Mbeni wafango-ndia ama ala na *bingbingo tënë so. Lo baa so Jésus akiri tënë nzoni na *asadusien. Lo ga nduru si lo hunda Jésus, lo tene: “Ndia so ayeke kota ahon atanga ni kue ayeke so wa?”

Marc 12:28 Iomraidhean Croise

Matthieu 19:18

Koli ni ahunda Jésus, atene: “Andia wa?” Jésus akiri tënë na lo: “Alingbi mo fâ zo pepe; alingbi mo gi wali wala koli ti zo pepe; alingbi mo nzi pepe; alingbi mo tene mvene na le ti ngbanga pepe;

Matthieu 23:23

“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala yeke mu *dime ti aye ti ala, ataa akete kete ye ti yaka ti ala; me kota tënë ti *Ndia, ala baa ni gi tongana senge ye na le ti ala. Kota tënë ti Ndia ni ayeke sarango ye ti mbirimbiri, bango mawa ti azo, ngbango na lege ti tënë ti Nzapa. Ye so ala lingbi fade ti sara ni laa, me ala zia pepe ti sara tanga ti aye ni.

Matthieu 5:19

Ndani laa, zo so ake mbeni kete kete mbage ti Ndia si lo fa lege ti kengo ni na ambeni zo, fade lo yeke duti ndangba zo na ya ti *Kodro-gbia ti yayu. Me zo so asara ye alingbi na atënë ni si lo fa lege na amba ti lo ti sara ye alingbi na ni, fade lo yeke duti kota zo na ya ti Kodro-gbia ti yayu.

Marc 9:14

So ala ga awara tanga ti adisiple, ala baa gba ti azo so ayeke na tere ti ala. Azo ni na awafango-ndia ayeke *bingbi tënë na adisiple ni.

Nzoni Tënë so Luc asu na mbeti 11:42

“Mawa na ala, afarizien! Ala yeke mu na Nzapa *dime ti akugbe ti kasa ti yaka ti ala, ataa akete kete ye ti yaka ti ala. Me ala girisa taa ye so Nzapa aye: dutingo mbirimbiri na azo nga na yengo Nzapa. Baa, ye so ala lingbi fade ti sara laa, me ala girisa nga tanga ni pepe.

Nzoni Tënë so Luc asu na mbeti 20:39

Ambeni wafango-ndia atene na lo: “Wafango-ye, tënë ti mo ayeke nzoni mingi.”