Joël 3:5 - Mbeti ti Nzapa - Tënë so amu fini

⁵ Tongaso, zo so kue ayeke iri KOTA GBIA ti mu maboko na lo, fade lo yeke soo kuâ. Na ndö ti hoto ti *Sion, na gbata ti Jérusalem, ambeni zo ayeke wara lege ti sigigi na ya ti akpale ni alingbi na tënë so KOTA GBIA atene. Azo so KOTA GBIA airi ala, ala yeke duti na popo ti azo so angba na fini.

Joël 3:5 Iomraidhean Croise

2 Agbia 12:18

Na ngoi ni so, Hazael, gbia ti Sirii aga ti tiri bira na gbata ti Gat si lo mu ni. Na pekoni, lo leke na be ti lo ti gue ti tiri bira na Jérusalem.

2 Agbia 16:8

Ahaz amu nginza na lôro so ayeke na ya ti kota da ti KOTA GBIA nga na ya ti kubu so a bata amosoro ti yangbo ti gbia daa si lo tokua ni na kadoo na gbia ti Asirii.

2 Agbia 24:13

Nabukodonosor amu amosoro so kue a bata na ya ti kubu ti kota da ti KOTA GBIA, na amosoro so a bata na ya ti kubu ti yangbo ti gbia, lo gue na ni alingbi gi na tënë so KOTA GBIA atene. Lo fâ ya ti aye so kue Salomon, gbia ti Israel aleke na lôro si lo zia na ya ti kota da ti KOTA GBIA so.

Ésaïe 11:11

Na lango ni so, *KOTA GBIA ayeke yoro maboko ti lo ti fani use ti zi tanga ti azo ti lo ti kiri na ala na kodro ti ala: azo ti lo so angba na fini na sese ti Asirii, ti Ezipte, ti Patros, ti Kush, ti Elam, ti Shinear nga na ti Hamat na ala so ayeke na ya ti azoa so ayeke na le ti kota ngu-ingo.

Jérémie 23:7

“So tënë ti yanga ti KOTA GBIA laa: Biani, mbeni lango ayeke ga so azo ayeke kiri ti tene pepe: ‘Na iri ti KOTA GBIA so ayeke na fini, lo so lo sara si azo ti Israel asigigi na sese ti Ezipte…’

Jérémie 50:28

Ala ma si! Azo so akpe, ala so angba na fini na kodro ti Babilone, ala laa ayeke ga na asango na *Sion, atene: “KOTA GBIA Nzapa ti e akiri na azo ti Babilone peko ti sioni ti ala awe; lo kiri na ala peko ti sioni so ala sara na kota da ti lo.”

Jérémie 51:11

KOTA GBIA aleke na be ti lo ti buba kodro ti Babilone. Ndani laa lo zia nzara ni na be ti agbia ti Medii. Biani, KOTA GBIA akiri na awato ti e peko ti sioni ti ala awe; lo kiri na ala peko ti sioni so ala sara na kota da ti lo. Ala leke yanga ti ale ti kokora, aza! Ala mu ni asi ya ti abozo ni!

Ezekiel 37:12

Ndani laa, tene peko ti tënë ti yanga ti mbi, mo tene na ala: Tënë so Kota Gbia NZAPA atene ayeke so: Mbi yeke zi yanga ti adu ti kuâ ti ala, mbi yeke sara titene ala sigigi na ya ti adu ti kuâ ni, ala azo ti mbi. Mbi yeke kiri na ala na sese ti Israel.

Daniel 11:38

Fade lo yeke voro anzapa so pepe, me lo yeke voro nzapa ti agbagba ti bira, nzapa so akotara ti lo ahinga ni ando pepe. Lo yeke mu na nzapa so lôro, wen ti nginza, atêne ti ngangu ngere na ambeni ye ti ngangu ngere.

Abdias 1:17

Me azo so akpe si angba na fini, fade ala ayeke honde tere ti ala na ndö ti hoto ti *Sion; hoto ni ayeke kiri ti ga ndo so ayeke nde si ayeke nzoni kue. Fade *ahale ti Jacob ayeke kiri ti mu sese ti ala na maboko ti azo so amu ni lani so.