Jérémie 8:6 - Mbeti ti Nzapa - Tënë so amu fini

⁶ Atënë so ala yeke tene so, mbi ma ni nzoni: atënë ni agbu le ni oko pepe. Zo oko azia lege ti sioni ti lo pepe; lo tene nga pepe: ‘Nyen laa mbi sara so?’ Zo oko oko amu lege so be ti lo aye tongana mbarata so ali na loro na ya ti bira.

Jérémie 8:6 Iomraidhean Croise

Mbeti ti Job 10:2

Fade mbi yeke tene na Nzapa: Fâ ngbanga na li ti mbi pepe. Tënë so mo bi na li ti mbi so, fa na mbi ni si mbi hinga.

Mbeti ti Job 34:31

Me mbeni zo alingbi ti tene na Nzapa: “Pikango mbi ni alingbi awe, mbi yeke kiri ti sara sioni pepe.

Mbeti ti Job 34:32

Asioni so mbi baa pepe so, mo wani, fa ni na mbi. Tongana mbi sara sioni, fade mbi yeke kiri ti sara ni pepe.”

Abia (Psaumes) 14:2

Kâ na yayu, *KOTA GBIA aba tere ti lo na mbage ti azo ti sese ti baa ndo, ti gi zo so li ti lo ayeke daa, zo so ayeke gi Nzapa.

Ésaïe 30:18

Me *KOTA GBIA ayeke ku mbeni ngoi ti sara nzoni be na ala, lo yeke londo ti baa mawa ti ala. Biani, KOTA GBIA ayeke Nzapa ti mbirimbiri. Ti ala nzoni, azo so kue azia be ti ala na ndö ti lo!

Ésaïe 57:17

Ndali ti sioni nzara ti warango ye ti Israel, ngonzo agbu mbi ngangu. Na ya ti ngonzo ti mbi, mbi pika lo, mbi ye ti kiri ti baa lo pepe. Me lo ngba ti sara ngangu li, lo ngba ti sara ye ti be ti lo.

Ésaïe 59:16

Lo baa so zo oko ti sara ye ayeke daa pepe; li ti lo akpe, ngbanga ti so zo oko ti mu maboko ayeke daa pepe. Tongaso, maboko ti lo laa asara si lo so benda; mbirimbiri ti lo laa amu ngangu na lo ti sara ye ni.

Jérémie 23:25

“Atënë so awayanga-Nzapa ayeke tene na peko ti yanga ti mbi so, mbi ma ni kue awe. Ala tene, ani yeke fa tënë na iri ti mbi, andaa gi mvene laa ala yeke tene. Ala yeke tene: ‘Mbi baa li ti mbi! Mbi baa li ti mbi!’

Jérémie 3:5

Ngonzo ti lo ayeke ngba ande lakue? Lo yeke ngba ande ti bata mbi na be lakue?” Baa, tënë so mo yeke tene laa! Me mo ngba ti sara sioni si mo ga walombe ni!

Jérémie 5:1

“Ala tambula na ndö ti alege ti Jérusalem mbage na mbage kue, ala baa ndo, ala hunda ndo, ala gi ndo na ndö ti abalabala ti wara mbeni zo, zo so ayeke sara ye mbirimbiri, zo so ayeke sara ye na legeni. Tongana ala wara mbeni zo oko tongaso, fade mbi yeke zi siokpari na li ti azo ti Jérusalem.”

Ezekiel 18:28

Tongana li ti lo aga daa, lo baa aye ti sioni ti lo tongana sioni ye si lo zia lege ni, biani, lo yeke ngba na fini, lo yeke kui pepe.

Ezekiel 22:30

Mbi gi mbeni zo na popo ti ala titene lo leke gbagba ti bata na kodro ni, ti luti na dawa ti mbi na ndo so du akoro daa na tere ti gbagba ni; tongaso si mbi buba kodro ni pepe; me mbi wara zo oko pepe.

Daniel 9:11

Azo ti Israel kue ake ndia ti mo awe; ala gue yongoro na mo si atënë so mo tene, ala ke ti ma ni. Tongaso asioni tënë na atënë ti dengo ba so a su ni na ya ti mbeti ti ndia ti Moïse, zo ti kua ti mo, atënë ni ati na ndö ti e, ngbanga ti so e sara siokpari so ake mo.

Mishe 7:2

Azo so abata be ti ala na Nzapa ayeke na ya ti kodro ni mbeni pepe. Mbeni zo ti mbirimbiri oko ayeke na popo ti azo ti kodro ni pepe. Azo kue ayeke gi gi lege ti fâ amba ti ala; zo oko oko ayeke gi lege titene mba ti lo ati na ya ti gbanda.

Sofonii 3:7

Mbi tene na be ti mbi, mbi tene: ‘Mo gbata so, tongana mo kpe fade mbeto ti mbi, tongana mo ma fade wango ti mbi, ka a yeke buba mo pepe.’ Me lakue so mbi yeke ga ti pika mo, azo ti mo ayeke kpe hio ti sara sioni ahon ndoni.

Aggée 1:5

Tënë so KOTA GBIA so ayeke na ndö ti dunia kue atene ayeke so: Fadeso, ala gbu li ti ala nzoni na ndö ti aye so ayeke si na ala.

Aggée 1:7

Tënë so KOTA GBIA so ayeke na ndö ti dunia kue atene ayeke so: Ala gbu li ti ala nzoni na ndö ti aye so ayeke si na ala.”

Malashii 3:16

Tongaso azo so ayeke kpe mbeto ti KOTA GBIA atene tënë na popo ti ala. KOTA GBIA adingi mê ti lo si lo ma tënë so ala yeke tene so. Nilaa na dawa ti lo, a su na ya ti mbeni mbeti iri ti azo so ayeke kpe mbeto ti lo si ala yeke voro lo.

2 Pierre 3:9

Ye so Kota Gbia amu zendo ni, lo yeke ninga ti sara ni pepe. Me ambeni zo ayeke tene, lo ngba ti ku gi kungo. Andaa lo ngba ti ku, ngbanga ti so lo ye pepe titene zo oko akui, me lo ye titene azo kue azia ngbene lege ti sarango ye ti ala.

Aye so Nzapa afa 9:20

Tanga ti azo so kue akui na lege ti asioni ye so pepe, ala zia pepe lege ti sarango asioni ye ti ala. Ala zia lege ti vorongo asioni yingo pepe; ala ngba ti voro ayanda so a sara na lôro, na wen ti nginza, na bengba wen, na têne nga na keke. Ayanda ni ayeke baa ndo pepe, ala yeke ma ndo pepe, ala yeke tambula nga pepe.