Jérémie 44:13 - Mbeti ti Nzapa - Tënë so amu fini

¹³ Mbi yeke ga na tere ti azo so ayeke lango na Ezipte tongana ti so mbi ga na tere ti azo ti Jérusalem: na lege ti bira, kota nzara na sioni kobela ti bubango kodro.

Jérémie 44:13 Iomraidhean Croise

Jérémie 11:22

Ndani laa, tënë so KOTA GBIA so ayeke na ndö ti dunia kue atene ayeke so: “Fade mbi yeke ga na tere ti ala: amaseka ti ala ti koli ayeke kui na ya ti bira, amolenge ti ala ti koli na ti wali ayeke kui na nzara.

Jérémie 21:9

Zo so ayeke ngba na ya ti gbata so, fade lo yeke kui na lege ti bira, ti kota nzara na ti sioni kobela ti bubango kodro. Me zo so ayeke sigigi na ya ti gbata ni ti zia tere ti lo na maboko ti aturugu ti Babilone, zo ni ayeke soo fini ti lo; ye so ayeke ngba na lo ayeke gi fini ti lo.

Jérémie 24:10

Fade mbi yeke tokua na ndö ti ala bira, kota nzara na sioni kobela ti bubango kodro. Ye ni ayeke ninga ngbii, ala kue ahunzi na ya ti kodro so mbi mu ando na ala nga na akotara ti ala so.”

Jérémie 24:9

Na ya ti akodro-gbia kue ti sese, fade mbi yeke sara si ala, azo ti Juda, ala ga tapande ti kpale so ayeke sara si azo ado na kota mbeto. Na ando so kue mbi yeke tumba ala daa, ala yeke ga tapande; zo ayeke mu iri ti ala ti zonga na mba ti lo wala ti he lo, ti he bia na iri ti lo wala ti deba lo.

Jérémie 42:15

Tongana ye ni ayeke tongaso, ala atanga ti azo ti Juda, ala ma tënë so KOTA GBIA atene. Tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Tongana ala ye biani ti gue na Ezipte, tongana ala gue ti honde tere ti ala kâ,

Jérémie 42:16

bira so ala yeke sara mbeto ni so, fade ayeke wara ala kâ; nzara so ayeke sara si ala yeke gi be ti ala mingi so, fade ayeke tumba peko ti ala ti wara ala kâ; kâ laa ala yeke kui.

Jérémie 42:17

Azo so kue ayeda ti honde tere ti ala na Ezipte, fade ala yeke kui na lege ti bira, kota nzara na sioni kobela ti bubango kodro. Kpale so mbi yeke sara si aga na ndö ti ala, zo oko ayeke sigigi na ya ni pepe, zo oko ayeke ngba na fini pepe.’ ”

Jérémie 42:18

Jérémie akiri atene: “Tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Ngonzo ti mbi na ngonzo ti mbi ti wâ alondo lani na tere ti azo ti Jérusalem. Legeoko nga, fade mbi tuku ngonzo ni na ndö ti ala, azo ti Juda, tongana ala si na Ezipte. Tongaso, fade ala ga tapande ndali ti azo so ayeke deba amba ti ala, ala yeke ga ye ti dongo be, ye ti dengo ba na ye ti ziango kamene na le ti zo. Ala yeke kiri ti baa kodro so oko pepe.’ ”

Jérémie 43:11

Tongana lo si ande, lo yeke nika Ezipte nikango. Ti azo so a diko ala ndali ti kuâ, ala yeke kui; ti azo so a diko ala ndali ti tokuango ala na kodro wande, a yeke tokua ala na kodro wande; ti azo so a diko ala ndali ti fango ala, a yeke fâ ala!

Osée 9:6

Baa, ala yeke kpe kodro ti ala so abuba so, Ezipte laa ayeke yamba ala; me gbata ti Manfis ayeke ga ndo ti lungo ala. Fade akeke ti ki ayeke kanga ndö ti mosoro ti ala ti kota nginza, akamba ti ki ayeke kanga ndö ti ada ti lango ti ala.