Jérémie 44:12 - Mbeti ti Nzapa - Tënë so amu fini

¹² Mbi yeke mu tanga ti azo ti Juda so angba si ala ye ti gue na Ezipte ti honde tere ti ala kâ, fade ala yeke kui kue. Na ya ti kodro so laa ala yeke kui kuâ ti bira wala ti kota nzara, ti londo na akete zo asi na akota zo. Biani, fade ala yeke kui na lege ti bira na kota nzara; ala yeke ga tapande ndali ti azo so ayeke deba amba ti ala; ala yeke ga ye ti dongo be, ye ti dengo ba na ye ti ziango kamene na le ti zo.

Jérémie 44:12 Iomraidhean Croise

Ésaïe 1:28

Me azo ti ngangu li na azo ti siokpari, fade a yeke kungbi ala; azo so azia *KOTA GBIA, gigi ti ala ayeke hunzi.

Ésaïe 65:15

Azo so mbi soro ala ayeke mu iri ti ala, azo ti sioni, ti deba azo na ni; ala yeke tene: ‘Alingbi Kota Gbia NZAPA afâ mo tongana zo tongaso!’ Me ti ala, azo ti kua ti mbi, fade a yeke mu mbeni iri nde na ala.

Jérémie 16:4

Fade ngangu kobela ayeke fâ ala; zo ayeke toto kuâ ti ala pepe, zo ayeke lu nga kuâ ti ala pepe. Me ala yeke ga tongana puru na ndö ti sese. Fade bira na nzara ayeke fâ ala si kuâ ti ala ayeke ga kobe ti andeke ti nduzu na ti anyama ti sese.”

Jérémie 18:16

Ala sara si kodro ti ala aga ngonda, aga ye so azo ayeke huru yanga ti ala kpu na kpu na bango ni. Azo so kue ayeke hon na tere ni, li ti ala ayeke kpe si ala yingi li ti ala.

Jérémie 24:9

Na ya ti akodro-gbia kue ti sese, fade mbi yeke sara si ala, azo ti Juda, ala ga tapande ti kpale so ayeke sara si azo ado na kota mbeto. Na ando so kue mbi yeke tumba ala daa, ala yeke ga tapande; zo ayeke mu iri ti ala ti zonga na mba ti lo wala ti he lo, ti he bia na iri ti lo wala ti deba lo.

Jérémie 26:6

Tongana ala ma pepe, fade mbi yeke buba kota da ti Nzapa so, tongana ti so mbi buba ti Silo. Mbi yeke sara si gbata ti Jérusalem aga tapande ti dengo ba ndali ti amara ti sese kue.’ ”

Jérémie 29:18

Mbi yeke tumba peko ti ala na lege ti bira, nzara na sioni kobela ti bubango kodro. Mbi yeke sara tongaso si akodro-gbia ti sese kue ado na kota mbeto na bango ala. Na ya ti akodro so kue mbi yeke kangbi ala daa, ala yeke ga tapande ndali ti azo so ayeke deba amba ti ala; ala yeke ga ye ti dongo be nga na ye so azo ayeke huru yanga ti ala na bango ni.

Jérémie 29:22

Azo ti Juda so kue a gbu ala si a gue na ala na Babilone, fade ala yeke mu iri ti akoli use ti deba na amba ti ala. Biani, fade azo ti Juda ni ayeke tene: Ayeke nzoni KOTA GBIA asara na mo gi mara ti ye so lo sara na Sidekia nga na Ahab so gbia ti Babilone azö ala na le ti wâ so!’

Jérémie 42:1

Tongaso amakonzi kue ti aturugu, mbirimbiri Yohanan, molenge ti Karea, lo na Yezania, molenge ti Hoshaya nga na azo so kue ayeke na ndo so, akete zo na akota zo, ague nduru na

Jérémie 42:22

Ti fadeso, kite ni ayeke daa pepe: fade ala yeke kui na lege ti bira, kota nzara na sioni kobela ti bubango kodro na ya ti kodro so ala ye ti gue ti honde tere ti ala daa.”

Jérémie 43:11

Tongana lo si ande, lo yeke nika Ezipte nikango. Ti azo so a diko ala ndali ti kuâ, ala yeke kui; ti azo so a diko ala ndali ti tokuango ala na kodro wande, a yeke tokua ala na kodro wande; ti azo so a diko ala ndali ti fango ala, a yeke fâ ala!

Jérémie 44:22

KOTA GBIA akanga be ti lo gbaa na asioni sarango ye ti ala nga na asioni sarango ye ti ala so zo alingbi ti baa na le ti lo fani use pepe so. Ndani laa kodro ti ala aga ndo ti gba ti atêne, aga ngonda si zo ayeke daa mbeni pepe, aga tapande ndali ti azo so ayeke deba amba ti ala; ye ni laa a yeke baa ni laso so.

Osée 4:6

Azo ti mbi ayeke kui, ngbanga ti so ala hinga mbi pepe. So mo ke ti hinga mbi, fade mbi nga, mbi yeke ke mo, mo yeke kiri ti duti wayango-sandaga ti mbi pepe. So be ti mo agirisa na ye so Nzapa ti mo afa, fade be ti mbi nga ayeke girisa na amolenge ti mo.

Osée 9:6

Baa, ala yeke kpe kodro ti ala so abuba so, Ezipte laa ayeke yamba ala; me gbata ti Manfis ayeke ga ndo ti lungo ala. Fade akeke ti ki ayeke kanga ndö ti mosoro ti ala ti kota nginza, akamba ti ki ayeke kanga ndö ti ada ti lango ti ala.

Zakarii 8:13

Ala, akodro-gbia ti Juda na ti Israel, na popo ti amara kue, ala yeke lani tapande ti mbeni mara so a deba lo. Me fadeso, mbi soo ala, ala yeke ga tapande ti mbeni mara so a sara tufa na ndö ti lo. Ala sara mbeto pepe, ala gbu ngangu!”

Wungo ti azo 5:27

Tongana wali ni ahanda koli ti lo si lo sara ye ti kirikiri ti buba tere ti lo, na peko ti nyongo ngu ni, ye so ayeke si na lo ayeke so: fade ngu so ayeke ga na deba na ndö ti zo ayeke gue na ya ti avi ti lo, ayeke suku ya ti lo si lo yeke du pepe. Azo ti mara ti lo ayeke mu lo tongana tapande ti deba amba ti ala.