Jérémie 40:5 - Mbeti ti Nzapa - Tënë so amu fini

⁵ So Jérémie ade ti gue pepe, Nebuzaradan akiri atene na lo: “Mo lingbi ti kiri na tere ti Gedalia, molenge ti Ahikam, molenge ti Shafan. Gbia ti Babilone azia Gedalia titene lo ga govoronere ti agbata ti Juda. Mo na lo aduti na popo ti azo ti agbata ni, wala mo gue na ndo so kue mo baa nzoni na le ti mo.” Makonzi ti aturugu ni amu na Jérémie kobe ti tengo ni na lege; lo mu nga na lo amatabisi si lo zia lege na lo ti gue.

Jérémie 40:5 Iomraidhean Croise

2 Agbia 22:12

Na pekoni, lo mu yanga na wayango-sandaga Hilkia, na Ahikam, molenge ti Shafan, na Akbor, molenge ti Mikaya, na wakuasu Shafan nga na Asaya, zo ti kua ti gbia, lo tene:

2 Agbia 22:14

Wayango-sandaga Hilkia, na Ahikam, na Akbor, na Shafan nga na Asaya ague, awara Hulda, wayanga-Nzapa so ayeke lango na Fini Vaka ti Jérusalem. Lo yeke wali ti Shalum; Shalum ayeke molenge ti Tikva, molenge ti Haras. Shalum ayeke zo ti batango abongo ti ya ti kota da ti Nzapa. Azo ni afa peko ti tënë ni na wayanga-Nzapa ni.

2 Mbai 34:20

Na pekoni, lo mu yanga na Hilkia, na Ahikam, molenge ti Shafan, na Abdon, molenge ti Mika na wakuasu Shafan nga na Asaya, zo ti kua ti gbia, lo tene:

Esdras 7:27

Esdras atene: “Mbi mu singila na *KOTA GBIA, Nzapa ti akotara ti e! Lo laa lo zia na be ti gbia titene lo ne kota da ti Nzapa ti Jérusalem.

Néhémie 1:11

KOTA GBIA, mbi gbu gere ti mo, mo zi mê ti mo, mo ma sambela ti mbi, zo ti kua ti mo. Mo ma nga sambela ti azo ti kua ti mo, ala so ayeke na ngia ti ne iri ti mo. Mo sara si aye ti mbi, zo ti kua ti mo, aga nzoni laso. Mo sara si ye so mbi yeke hunda na gbia, lo kiri tënë na mbi na nzoni be.” Biani, mbi yeke lani zo ti mungo samba na gbia.

Mbeti ti Job 22:29

Tongana ambeni zo awoko, mo lingbi ti tene na ala: “Ala londo!” Biani, azo so asara tere ti ala kete, Nzapa ayeke soo ala.

Amato 16:7

Tongana KOTA GBIA ayeda na lege ti sarango ye ti mbeni zo, ataa awato ti zo ni, lo yeke leke songo na popo ti lo na ala.

Amato 21:1

Tënë ti be ti gbia ayeke na ya ti maboko ti KOTA GBIA tongana kete ngu so ayeke sua. KOTA GBIA ayeke hon na atënë ti be ni na ndo so kue be ti lo wani aye.

Jérémie 15:11

Andaa *KOTA GBIA atene lani na mbi, atene: “Mbi mu zendo ti zi mo titene mo baa nzoni; mbi mu zendo ti sara si awato ti mo avoro tere ti ala na mo na ngoi ti ye ti sioni nga na ngoi ti ye ti vundu.

Jérémie 26:24

Me ti Jérémie, Ahikam, molenge ti Shafan abata lo; lo sara si Jérémie ati pepe na maboko ti azo so aye fade gi kuâ ti lo so.

Jérémie 39:14

Ala tokua azo ti gue ti mu Jérémie na ya ti gbagba ti aturugu ti batango gbia; ala zia lo na maboko ti Gedalia, molenge ti Ahikam, molenge ti Shafan. Gedalia amu yanga na Jérémie ti kiri na da ti lo. Tongaso Jérémie aduti na popo ti azo ti kodro ni.

Jérémie 40:4

Gi laso laso, mbi yeke zi azingiri so a kanga maboko ti mo na ni. Tongana mo ye ti ga na peko ti mbi na Babilone, mo lingbi ti ga senge; fade mbi yeke baa ndo na ndö ti mo. Me tongana mo ye ti ga na peko ti mbi na Babilone pepe, mo ngba senge. Mo lingbi ti gue na ndo so kue be ti mo aye na ya ti kodro ni, zo akanga lege na mo pepe. Mo gue na ndo so kue mo baa nzoni na le ti mo.”

Jérémie 41:1

Na nze mbarambara ni, Ismael, molenge ti Netania, molenge ti Elishama amu azo baleoko na peko ti lo si ala ga na tere ti Gedalia na gbata ti Mispa. Ismael ayeke mbeni zo ti sewa ti gbia, lo yeke oko ti akota zo so ayeke na yangbo ti gbia. Na ndembe so ala ngba ti te kobe na ndo oko na Mispa,

Jérémie 41:18

titene ala kpe azo ti Babilone so ala sara mbeto ti ala. Biani, Ismael afâ lani Gedalia, molenge ti Ahikam, lo so gbia ti Babilone azia lo na li ti kodro ni.

Jérémie 41:2

Ismael, molenge ti Netania, lo na azo baleoko so amu peko ti lo alondo, ala kpo Gedalia, molenge ti Netania na yongoro zeme. Lege so ala fâ lo so gbia ti Babilone azia lo na li ti kodro ni laa.

Awatokua 27:3

Lango oko na pekoni, e si na Sidon. Yulius so ayeke sara nzoni be na Paul, azia lo ti gue ti baa azo so lo na ala aye tere titene ala mu na lo ambeni ye so atia lo.

Awatokua 27:43

Me kapita ti aturugu ni aye ti soo fini ti Paul, nilaa lo ke na ala ti fâ azo ti kanga ni. Tongaso lo mu yanga titene azo so ahinga ngu, ala ti na ya ti ngu kozoni ti hon na yanga ti ngu ni.

Awatokua 28:10

Azo ti zoa ni ane e tongana akota zo. Na ngoi so e yeke mu mangboko ti hon, ala mu na e aye ndali ti lege.

Ahebro 13:6

Ndani laa e lingbi ti tene na mbeto pepe, e tene: “*Kota Gbia laa ayeke mu na mbi maboko, fade mbeto ayeke sara mbi pepe. Nyen laa zo alingbi ti sara na mbi, nyen?”