Jérémie 34:3 - Mbeti ti Nzapa - Tënë so amu fini

³ Ti mo, fade mo yeke kpe na maboko ti lo pepe; a yeke gbu mo si a zia mo na maboko ti lo. Mo na gbia ti Babilone ayeke baa tere le na le si lo wani, lo yeke tene tënë na mo. Na pekoni, mo yeke gue na Babilone.

Jérémie 34:3 Iomraidhean Croise

Jérémie 21:7

Na pekoni, mbi yeke zia Sedesias, gbia ti Juda, lo na azo ti gbe ti lo, na maboko ti gbia ti Babilone. Mbi yeke zia nga na maboko ti gbia ni azo ti gbata ni, ala so angba na fini na peko ti sioni kobela ti bubango kodro, ala so angba na fini na peko ti bira na kota nzara. Biani, fade mbi yeke zia azo ni na maboko ti awato ti ala nga na maboko ti azo so aye gi kuâ ti ala. Gbia Nabukodonosor ayeke fâ azo ni kue, lo yeke zia zo oko pepe, lo yeke baa mawa ti zo oko pepe, lo yeke hinga zo oko pepe; so tënë ti yanga ti KOTA GBIA laa.’ ”

Jérémie 27:22

‘Fade a yeke gue na akungba ni kue na Babilone, ayeke ngba kâ ngbii asi na ndembe so mbi yeke baa lege titene a kiri na ni ge.’ ” So tënë ti yanga ti KOTA GBIA laa.

Jérémie 32:28

Ndani laa, tënë so mbi KOTA GBIA, mbi tene ayeke so: mbi yeke zia gbata so na maboko ti azo ti Babilone nga na Nabukodonosor, gbia ti Babilone; fade lo yeke mu ni.

Jérémie 32:3

Sedesias, gbia ti Juda amu fade yanga titene a kanga Jérémie kâ. Biani, lo suku na Jérémie ngbanga ti tënë ti peko ti yanga ti KOTA GBIA so Jérémie atene: “Baa, tënë so KOTA GBIA atene ayeke so: Mbi yeke zia Jérusalem na maboko ti gbia ti Babilone si lo yeke mu ni.

Jérémie 32:4

Ti Sedesias, gbia ti Juda, lo yeke kpe na maboko ti azo ti Babilone pepe. Biani, fade a yeke zia lo na maboko ti gbia ti Babilone, lo wani, lo yeke tene tënë na gbia ni si lo yeke baa lo le na le.

Jérémie 34:21

Ti Sedesias, gbia ti Juda, fade mbi yeke zia lo legeoko tongaso, lo na akota zo ti kodro ti lo na maboko ti awato ti ala nga na azo so aye gi kuâ ti ala. Mbi yeke zia ala na maboko ti aturugu ti gbia ti Babilone, ataa so aturugu ni agboto tere ti ala fadeso ahon yongoro na tere ti ala.

Jérémie 34:4

“Ye oko, Sedesias, gbia ti Juda, alingbi mo ma tënë ti KOTA GBIA si! Tënë so KOTA GBIA atene na ndö ti mo ayeke so: Fade a yeke fâ mo na ya ti bira pepe.

Jérémie 37:17

Na pekoni gbia Sedesias atokua titene a ga na Jérémie. Gbia ni ahunda lo na hondengo ni na ya ti yangbo ti lo, atene: “Mbeni tënë ti *KOTA GBIA ayeke daa ndali ti mbi?” Jérémie akiri tënë: “Een, ayeke daa; tënë ni ayeke so: ‘Fade a yeke zia mo na maboko ti gbia ti Babilone.’ ”

Jérémie 38:18

Me tongana mo ke ti zia tere ti mo na maboko ti aturugu ti kota kamba ti gbia ti Babilone, fade a yeke zia gbata so na maboko ti azo ti Babilone si ala yeke bi wâ na ya ni; ti mo, mo yeke kpe na maboko ti ala pepe.’ ”

Jérémie 38:23

Biani, fade a yeke mu awali ti mo na amolenge ti mo ti gue na ala na azo ti Babilone; ti mo, mo yeke kpe na maboko ti ala oko pepe. Gbia ti Babilone ayeke gbu mo ti ga zo ti kanga si lo yeke bi wâ na gbata ni.”

Ezekiel 12:13

Mbi KOTA GBIA, mbi yeke bi gbanda ti mbi na ndö ti lo si lo yeke ti na ya ti kuku ti mbi. Mbi yeke gue na lo na Babilone, na sese ti azo ti Kalde. Me lo yeke baa sese ni pepe si lo kui kâ.

Ezekiel 17:15

Me lo tomboka na tere ti gbia ti Babilone. Lo tokua azo na Ezipte titene kodro ni amu na lo ambarata na gba ti aturugu. Zo so asara ye so, fade ye ni ayeke ga nzoni na lo laa? Lo yeke sigigi na ya ti kpale ni? Oko pepe, ngbanga ti so lo wani, lo buba lege ti mbuki ni awe.

Ezekiel 17:16

“Fini ti mbi! So tënë ti yanga ti mbi, Kota Gbia NZAPA laa: Gbia so ayeke kui ande na kodro ti gbia so azia lo na ndö ti mbata ti gbia so. Biani, lo baa dengo ba ti yanga ti lo tongana senge ye, lo buba ya ti mbuki ni. Tongaso, na Babilone, na ndo ti gbia ni laa, gbia ti Israel ayeke kui.

Ezekiel 21:25

Oko ti alege ni, aturugu ti Babilone ayeke mu ni ti gue na Raba, gbata ti azo ti mara ti Amon. Use lege ni, ala yeke mu ni ti gue na Juda, na Jérusalem, gbata so a sara ngangu gbagba na tere ni.