Jérémie 30:3 - Mbeti ti Nzapa - Tënë so amu fini

³ So tënë ti yanga ti KOTA GBIA laa: Mbeni lango ayeke ga so mbi yeke sara titene azo ti Israel na azo ti Juda so ayeke azo ti mbi akiri na kozo ndo ti ala. Fade mbi yeke kiri na ala na ya ti kodro so mbi mu ando na akotara ti ala; ala yeke kiri ti mu ni titene aga ye ti ala; mbi KOTA GBIA laa, mbi tene.”

Jérémie 30:3 Iomraidhean Croise

Esdras 3:1

So nze mbarambara ti ngu ni alingbi awe, azo ti Israel so kue aduti na ya ti agbata ti ala abongbi tere ti ala tongana zo oko na Jérusalem.

Esdras 3:12

Awayango-sandaga mingi, na azo ti mara ti Lévi nga na ambeni zo ti li ti asewa so aga mbakoro awe si ala baa ando kozo da ni so, ala toto mingi na vundu na ndembe so a yeke lu na gbe ti le ti ala, gere ti fini da ni. Me ambeni zo mingi ayeke dekongo na ngia.

Esdras 3:8

Na ngu use ni so ala si na Jérusalem, na ndo so kota da ti Nzapa ayeke lani daa, na use nze ni, Zorobabel, molenge ti Shealtiel, lo na Yeshua, molenge ti Yosadak, na tanga ti a-ita ti ala, na awayango-sandaga, na azo ti mara ti Lévi nga na azo so kue a gbu ala lani, a gue na ala na kodro wande si ala kiri na Jérusalem, ala to nda ti kua ni. Ala soro azo ti mara ti Lévi so ngu ti ala ayeke baleuse wala ahon so titene ala baa ndo na ndö ti akua ti lekengo da ti KOTA GBIA.

Abia (Psaumes) 126:4

KOTA GBIA, azo so a gbu ala na popo ti e a gue na ala na kodro wande so, mo kiri na ala; sara si ala ga tongana angu ti mbage ti Mbongo so akiri ayeke sua.

Abia (Psaumes) 53:6

Fade ala yeke do na kota mbeto, ataa so mbeni ye ti zia mbeto na be ti ala ayeke daa pepe. Azo so aga ti tiri bira na mo, fade Nzapa ayeke kangbi abio ti ala kirikiri. Fade mo yeke zia kamene na le ti ala, ngbanga ti so Nzapa ake ala awe.

Jérémie 16:15

me azo ni ayeke tene: ‘Na iri ti KOTA GBIA so ayeke na fini, lo so lo sara si azo ti Israel asigigi na kodro so ayeke na mbage ti Banga nga na akodro so lo tumba ala ando titene ala gue daa so!’ Fade mbi yeke sara si ala kiri na ndö ti sese so mbi mu ando na akotara ti ala.”

Jérémie 23:5

“So tënë ti yanga ti KOTA GBIA laa: Baa, mbeni lango ayeke ga so mbi yeke sara titene taa *hale ti David abaa gigi. Lo yeke sigigi tongana kete keke so asigigi na ya ti sese. Lo yeke le-gbia tongana nzoni gbia, lo yeke sara ye na lege ti ndara, lo yeke fâ ngbanga mbirimbiri si lo yeke sara ye ti mbirimbiri na ya ti kodro ni.

Jérémie 27:11

“Me mara so ayeke yeda ti yo zuge so gbia ti Babilone ayeke zia na ndö ti go ti lo, tongana mara ni ayeda ti sara kua na gbia ti Babilone, mbi yeke zia mara ni kpoo na ndö ti sese ti lo, lo lingbi ti fâ yaka si lo lango na sese ni; so tënë ti yanga ti KOTA GBIA laa.”

Jérémie 27:22

‘Fade a yeke gue na akungba ni kue na Babilone, ayeke ngba kâ ngbii asi na ndembe so mbi yeke baa lege titene a kiri na ni ge.’ ” So tënë ti yanga ti KOTA GBIA laa.

Jérémie 29:10

“Tënë so KOTA GBIA akiri atene ayeke so: ‘Tongana ngu balembarambara so a diko ndali ti Babilone so ahon awe, mbi yeke ga ti baa lege ti ala; nzoni ye so mbi mu zendo ti sarango ni na ala, fade mbi yeke sara ni: mbi yeke kiri na ala ge na Jérusalem.

Jérémie 29:14

fade mbi yeke zia lege titene ala wara mbi; so tënë ti yanga ti KOTA GBIA laa. Mbi yeke sara titene ala kiri na kozo ndo ti ala; mbi yeke zi ala na ya ti kodro so kue nga na ando so kue mbi kangbi ala ando daa ti bongbi ala na ndo oko; mbi yeke kiri na ala na ndo so a gbu ala ando daa si a gue na ala na kodro wande so’; so tënë ti yanga ti KOTA GBIA laa.

Jérémie 3:18

Na lango ni so, fade azo ti Juda ayeke bongbi oko na ala ti Israel si ala yeke londo na kodro so ayeke na Banga ti kiri na kodro so mbi mu na akotara ti ala titene aga ye ti ala.”

Jérémie 30:10

“Ti mo Israel, zo ti kua ti mbi, sara mbeto pepe! So tënë ti yanga ti KOTA GBIA laa. Mo hale ti Jacob, mo do na mbeto pepe! Biani, mbi yeke ga ti soo mo na ya ti akodro so ayeke na yongoro ndo; mbi yeke soo nga ahale ti mo na sese so a gbu ala si a gue na ala daa so. Israel, fade mo yeke kiri si mo yeke wara lege ti duti kpoo, mbeni sioni ye ti kiri ti sara mo ayeke daa pepe, mbeni zo ti kiri ti zia mbeto na be ti mo ayeke daa pepe.

Jérémie 30:18

Tënë so KOTA GBIA atene ayeke so: “Fade mbi yeke sara si azo ti da ti Jacob akiri na kozo ndo ti ala; mbi yeke baa mawa ti da ti ala. Gbata so lani abuba, a yeke kiri ti leke ni na ndö ti angbene da so atuku na sese; a yeke kiri ti sara apendere da gi na oko ndo so lani ada ni ayeke daa so.

Jérémie 30:4

Tënë so KOTA GBIA atene ndali ti Israel na Juda ayeke so:

Jérémie 31:16

Me tënë so KOTA GBIA atene ayeke so: “Awe-oo! Kiri mo dema tere ti mo pepe! Kiri mo toto pepe! Fade mo yeke wara futa ti kua ti mo; so tënë ti yanga ti KOTA GBIA laa. Amolenge ti mo ayeke londo na ndo ti awato ti ala ti kiri.

Jérémie 31:23

Tënë so *KOTA GBIA so ayeke na ndö ti dunia kue, Nzapa ti Israel atene ayeke so: “Tongana mbi sara titene kodro ti Juda na agbata ti Juda akiri na kozo ndo ti ala, tënë so azo ayeke kiri ti tene laa: ‘Ayeke nzoni KOTA GBIA asara tufa na ndö ti mo, hoto ti *Sion so mo yeke nde si mo yeke nzoni kue; mo yeke ndo ti mbirimbiri!’

Jérémie 31:27

“So tënë ti yanga ti KOTA GBIA laa: Mbeni lango ayeke ga so mbi yeke tuku azo na anyama gbani gbani na ya ti akodro-gbia ti Israel na ti Juda tongana ti so zo ayeke tuku ale ti kobe na le ti yaka.

Jérémie 31:31

“Mbeni lango ayeke ga so mbi na azo ti Israel nga na azo ti Juda, e yeke sara fini *mbuki; so tënë ti yanga ti KOTA GBIA laa.

Jérémie 31:38

“So tënë ti yanga ti KOTA GBIA laa: Mbeni lango ayeke ga so a yeke kiri ti leke gbata ti Jérusalem ndali ti KOTA GBIA, ti londo na kota da ti Hananeel so ayo na nduzu, ngbii asi na yanga ti gbagba so iri ni Ti-Ndangoro.

Jérémie 32:37

Lani mbi sara ngonzo na tere ti ala si ngonzo ti mbi ti wâ alondo na tere ti ala. Tongaso, na lege ti sioni ngonzo ti mbi, mbi kangbi ala na ya ti akodro mingi. Me mbi yeke bongbi ala, mbi yeke kiri na ala na ndo so si ala yeke duti na siriri.

Jérémie 32:44

Biani, fade azo ayeke kiri ti vo ayaka na sese ti Benjamin, na ya ti akodro so angoro Jérusalem, na ya ti agbata ti Juda, na ya ti agbata ti Kodro-ti-nduzu, agbata ti *Kodro-ti-gbeni na ti Negev. Ala yeke su ambeti ti vongo yaka ni, ala yeke kpo anzoroko na ndö ti ambeti ni ti kanga na yanga ni, ala yeke iri azo ti duti na tere ni. Biani, fade mbi yeke kiri na agbata ni na kozo ndo ti ala; so tënë ti yanga ti KOTA GBIA laa.”

Jérémie 33:26

Tongaso, mbi lingbi ti ke ahale ti Jacob na ti David, zo ti kua ti mbi? Mbi lingbi ti ke ti soro na popo ti ahale ti ala azo so ayeke le-gbia na ndö ti ahale ti Abraham, ti Isaac na ti Jacob? “Oko pepe! Fade mbi yeke sara titene ala kiri na kozo ndo ti ala, ngbanga ti so mbi baa mawa ti ala.”

Jérémie 51:60

Jérémie asu na le ti mbeni *rulo tënë ti asioni ye so kue ayeke si ande na Babilone, atënë so kue a tene na ndö ti Babilone.

Ezekiel 20:42

Fade mbi yeke mu ala, mbi kiri na ala na sese ti Israel, sese so mbi yoro maboko ti mbi na nduzu, mbi deba yanga ti mbi ti mu na akotara ti ala. Tongaso, fade ala yeke hinga atene, mbi laa mbi yeke KOTA GBIA.

Ezekiel 34:13

Mbi yeke mu ala na kodro wande, mbi yeke zi ala na ya ti akodro so kue ala yeke daa si mbi yeke kiri na ala na kodro ti ala. Mbi yeke gue na ala titene ala te kobe na ndö ti ahoto ti Israel, na ando so ngu ayeke sua daa nga na ando so kue azo asara kodro daa.

Ezekiel 36:24

“Fade mbi yeke zi ala na popo ti amara nde, mbi yeke mu ala na sese nde nde, mbi yeke bongbi ala si mbi yeke kiri na ala na sese ti ala.

Ezekiel 47:14

Ala yeke kangbi sese ni na popo ti ala; zo oko oko ayeke wara alingbi na ti mba ti lo. Biani, mbi yoro ando maboko ti mbi na nduzu, mbi deba yanga ti mbi ti mu sese ni na akotara ti ala. Tongaso sese ni ayeke ga ye ti ala.

Joël 3:1

*KOTA GBIA atene: “Na pekoni, fade mbi yeke sara titene Yingo ti mbi aga na ndö ti azo kue. Fade amolenge ti ala ti koli na ti wali ayeke tene peko ti tënë ti yanga ti mbi, ambakoro ti ala ayeke baa li ti ala, amaseka ti ala ti koli ayeke baa aye na ya ti mbeni ye tongana bango-li.

Sofonii 2:7

Tanga ti azo ti Juda so angba na fini, fade sese ni ayeke ga ti ala; ala yeke gue na anyama ti ala ti te pere na ando ni so; na bi, ala yeke lango na ya ti ada ti Askalon. Biani, KOTA GBIA, Nzapa ti ala ayeke ga ti sara nzoni na ala, lo yeke sara si gigi ti ala akiri aga nzoni.

Sofonii 3:20

Na ngoi ni so, mbi yeke kiri na ala; gi na ngoi ni so, mbi yeke bongbi ala na ndo oko. Gi na le ti ala wani, mbi yeke sara titene gigi ti ala akiri aga nzoni. Mbi yeke sara titene azo ane ala si iri ti ala awu, amu ndo na popo ti azo ti sese kue.” Tënë so KOTA GBIA atene laa.

Nzoni Tënë so Luc asu na mbeti 17:22

Na pekoni, Jésus atene na adisiple: “Ambeni lango ayeke ga so fade ala yeke sara nzara ti bango *Molenge ti Zo gi ti lango oko, me ala yeke baa lo pepe.

Nzoni Tënë so Luc asu na mbeti 19:43

Biani, ambeni lango ayeke ga so awato ti mo ayeke bongbi sese aga koto, angoro mo kue. Ala yeke ngoro mo si ala yeke pete mo mbage na mbage kue.

Nzoni Tënë so Luc asu na mbeti 21:6

Jésus atene: “Ye so ala yeke baa so, ambeni lango ayeke ga so fade têne oko ayeke ngba na ndö ti mba ti lo pepe; ye so kue ayeke tuku na sese.”

Ndia ti fani use ni 30:3

Tongaso, fade KOTA GBIA ayeke sara titene dutingo ti ala aga nde na ti kozoni, lo yeke baa mawa ti ala si lo yeke zi ala na popo ti amara so kue lo kangbi ala lani daa ti kiri ti bongbi ala na ndo oko.

Ndia ti fani use ni 30:5

Fade KOTA GBIA Nzapa ti ala ayeke kiri na ala na sese so akotara ti ala amu ando titene aga ti ala; ala, azo ti Israel, ala yeke kiri ti mu sese ni titene aga ti ala. KOTA GBIA ayeke sara si ala duti nzoni, ala wu mingi ahon akotara ti ala.

Ahebro 8:8

Andaa Nzapa asuku na azo ti lo, atene: “Kota Gbia atene: Ambeni lango ayeke ga so fade mbi na azo ti Israel nga na azo ti Juda, e yeke sara fini mbuki.