Jérémie 30:11 - Mbeti ti Nzapa - Tënë so amu fini

¹¹ So tënë ti yanga ti KOTA GBIA laa: Mbi yeke na mo ti soo mo. Amara so kue mbi kangbi mo lani na popo ti ala, mbi yeke fâ ala kue ti hunzi ala; me ti mo, mbi yeke hunzi mara ti mo pepe. Biani, mbi pika mo, me na legeni; mbi lingbi fade ti zia mo senge tongaso pepe!”

Jérémie 30:11 Iomraidhean Croise

2 Samuel 24:12

“Gue mo tene na David, mo tene: ‘Tënë so KOTA GBIA atene ayeke so: Mbi zia na dawa ti mo aye ota; soro oko na popo ni, fade mbi yeke sara ni na mo.’ ”

Abia (Psaumes) 6:1

Bia ti David; bia so ayeke ndali ti makonzi-bia. A he ni na kundi ti akamba miombe.

Sigingo 34:7

Mbi yeke sara nzoni be na azo ngbii asi na molongo ti ala saki oko. Azo so asara sioni, azo so asara ngangu li na azo so asara siokpari, mbi yeke kanga be na ala; me zo so tënë ayeke na li ti lo, mbi yeke zia lo senge pepe. Azo so asara siokpari, mbi yeke sara titene siokpari ti azo ni akiri na ndö ti amolenge ti ala na *ahale ti ala ngbii asi na molongo ota ni wala osio ni.”

Ésaïe 43:25

Me mbi, gi mbi oko, mbi wani laa mbi yeke zi siokpari na li ti mo; fade mbi yeke kiri ti dabe ti mbi na sioni ti mo pepe.

Ésaïe 8:10

Ala leke apialo ma, fade ayeke li ngu. Ala tene tënë mingi mingi ma, fade a yeke sara ye oko pepe, ngbanga ti so Nzapa ayeke na e.

Jérémie 1:19

Fade ala yeke tiri na mo, me ala yeke hon ndö ti mo pepe, ngbanga ti so mbi yeke na mo ti zi mo na maboko ti ala; so tënë ti yanga ti KOTA GBIA laa.”

Jérémie 1:8

Sara mbeto ti ala pepe, ngbanga ti so mbi yeke na mo; fade mbi yeke zi mo na maboko ti ala.” So tënë ti yanga ti KOTA GBIA laa.

Jérémie 10:24

KOTA GBIA, pika mbi, me na legeni; pika mbi na ngonzo pepe, tongaso pepe, fade mo yeke nika mbi.

Jérémie 15:20

Na dawa ti ala, mbi yeke sara si mo ga tongana mbeni gbagba so a sara na bengba wen, so zo alingbi ti kungbi ni pepe. Fade ala yeke tiri na mo, me ala yeke kinda mo pepe, ngbanga ti so mbi yeke na mo ti soo mo, ti zi mo na maboko ti ala; so tënë ti yanga ti KOTA GBIA laa.

Jérémie 4:27

Tënë so KOTA GBIA atene ayeke so: “Fade kodro ni kue ayeke ga ngonda; me ye kue laa mbi yeke buba ni pepe.

Jérémie 5:10

Ala mondee na li ti agbagba ti azo ti mara ni, ala buba aye; me ala buba ye kue pepe! Ala fâ gi amaboko ti *vinye ti azo ni; amaboko ni so ayeke ti KOTA GBIA pepe.

Jérémie 5:18

“Ataa na ngoi ni so, fade mbi yeke fâ ala kue pepe; so tënë ti yanga ti KOTA GBIA laa.

Abia ti demango tere 3:22

Anzoni be ti KOTA GBIA angba lakue, ndoye ti lo ayeke hunzi laoko pepe.

Ezekiel 11:13

So mbi ngba ti tene peko ti tënë ti yanga ti Nzapa so, Pelatia, molenge ti Benaya angba akui. Mbi ti, mbi kpo li ti mbi na sese si mbi dekongo ngangu, mbi tene: “Ae, Kota Gbia NZAPA! Mo ye ti hunzi tanga ti azo ti Israel ni kue?”

Ezekiel 6:8

Me mbi yeke zia ambeni zo na popo ti ala angba na fini na peko ti bira. A yeke kangbi azo ni so na ya ti akodro wande.

Osée 11:9

Fade mbi yeke sara ye na lege ti sioni ngonzo ti mbi pepe, mbi yeke kiri ti ga ti buba Efraim pepe, ngbanga ti so mbi yeke zo pepe, me mbi yeke ti mbi Nzapa. Na ndo ti mo Efraim, mbi yeke nde si mbi yeke nzoni kue; fade mbi yeke kiri ti ga na lege ti sioni ngonzo pepe.”

Awayango-sandaga 26:44

Me ataa so kue, tongana ala yeke na kodro ti awato ti ala, mbi yeke ke ala biani biani pepe, be ti mbi ayeke ke ala pepe, mbi yeke hunzi ala pepe, mbi yeke buba tënë ti ya ti mbuki na ala pepe. Biani, mbi laa mbi yeke KOTA GBIA, Nzapa ti ala.

Matthieu 1:23

“Baa, fade maseka-wali so ade ti hinga koli pepe ayeke mu ngo, lo yeke du molenge-koli; fade a yeke di iri ti lo Emmanuel.” – Nda ti iri so atene: “Nzapa ayeke na e”. –

Matthieu 28:20

ala fa na ala ti bata lege ti aye so kue mbi mu yanga na ala. Baa, mbi yeke na ala lakue ngbii asi na ngoi ti ndani.”

Awatokua 18:10

ngbanga ti so mbi yeke na mo. Zo oko alingbi ti ndu mo wala ti sara sioni na mo pepe, ngbanga ti so mingi ti azo ti gbata so ayeke azo ti mbi.”

Ndia ti fani use ni 4:31

Biani, KOTA GBIA Nzapa ti ala ayeke Nzapa so ayeke baa mawa ti zo. Fade lo yeke zia ala pepe, lo yeke hunzi ala pepe; mbuki so lo deba yanga ti lo ti sara na akotara ti ala, be ti lo ayeke girisa na ni pepe.

2 Timothée 4:22

Ayeke nzoni *Kota Gbia aduti na mo! Ayeke nzoni Nzapa asara nzoni be na ala!