Jérémie 22:3 - Mbeti ti Nzapa - Tënë so amu fini

³ Tënë so KOTA GBIA atene ayeke so: Ayeke nzoni ala sara ye mbirimbiri si ala baa lege ti fango ngbanga mbirimbiri. Ala zi azo so a yeke te ala na mbana na maboko ti azo so ayeke sara ngangu na azo. Awande, anyindu nga na awali-mua, ala sara pasi na ala pepe, ala sara ngangu na azo ni pepe. Azo so tënë ayeke na li ti ala pepe so, ala tuku mene ti ala na ndo so pepe!

Jérémie 22:3 Iomraidhean Croise

2 Samuel 23:3

Nzapa ti Israel atene tënë, Kota Têne so azo ti Israel ayeke luti na ndö ni atene na mbi: “Gbia so ayeke bata azo ti lo mbirimbiri si lo yeke bata azo ti lo na lege ti kpengo mbeto ti Nzapa,

2 Agbia 24:4

nga ndali ti azo so asara sioni pepe si Manase afâ ala senge senge; mene ti ala atuku si amu ya ti gbata ti Jérusalem kue. KOTA GBIA ake ti zi tënë ni na li ti lo.

Mbeti ti Job 22:9

Mo yeke tumba awali-mua maboko ti ala senge; mo yeke nika anyindu.

Mbeti ti Job 24:9

A yeke gboto nyindu na yanga ti me; a yeke gbu zo ti mawa na ngangu ti futa yongo so ayeke na li ti lo.

Abia (Psaumes) 68:5

Ala azo, ala he bia na Nzapa, ala he bia ti gonda na iri ti lo! Ala leke lege ndali ti lo so lo yeke hon na ndö ti ambinda tongana zo ti kpengo na mbarata. Iri ti lo ayeke *KOTA GBIA, ala dodo na ngia na le ti lo!

Abia (Psaumes) 82:4

Zo so ngangu atia lo na zo so ye atia lo, ala soo ala, ala zi ala na maboko ti azo ti sioni!

Abia (Psaumes) 94:21

Ala bongbi ti sara sioni na zo ti mbirimbiri, ala fâ ngbanga ti kuâ na li ti zo so tënë ayeke na li ti lo pepe.

Abia (Psaumes) 94:6

Ala yeke fâ wali-mua nga na wande, ala yeke fâ anyindu.

Sigingo 22:21

Alingbi ala sara ngangu pepe na wali-mua nga na nyindu.

Sigingo 22:22

Tongana ala sara sioni na wali-mua ni nga na molenge ni si ala dekongo na mbi ti mu maboko na ala, fade mbi yeke ma ala.

Amato 23:10

Atêne so a lu ando ti sara na maka ti yaka, mo zi ni ti pusu na dawa pepe; mo nzi mbage ti sese ti anyindu pepe.

Amato 6:17

le so abaa ndo na baba, yanga so ayeke tene mvene, maboko so ayeke tuku mene ti azo so tënë ayeke na li ti ala pepe;

Ésaïe 1:23

Amakonzi ti mo ayeke azo ti ngangu li, ala yeke sara songo na azo ti nzi. Ala kue aye tënë ti goro, ala yeke kpe na peko ti aye so azo ayeke mu na ala na hondengo ni; ala yeke fâ ngbanga ti nyindu na legeni pepe, tënë ti wali-mua ayeke gbu be ti ala pepe.

Ésaïe 58:6

Kengo kobe so mbi ye ayeke so: ti zi zingiri na tere ti azo so a kanga ala na mbana, ti zi ala na gbe ti nengo kungba, ti zi azo so amba ti ala asara ngangu na ala, ti fâ ya ti *zuge kue,

Ésaïe 58:7

ti kangbi kobe ti mo na zo so nzara ayeke sara lo, ti mu ndo ti lango na azo ti mawa so da ti li ti ala ayeke daa pepe, ti mu bongo na azo so bongo atia ala; ayeke nga titene mo zia peko ti mo pepe na taa ita ti mo.”

Jérémie 19:4

Biani, azo ti Juda ado mbi, azia awe; ala buba ndo so kue awe, zo alingbi ti hinga ni mbeni pepe: na ndo ni so, ala zö dukani na ambeni nzapa nde. Ataa ala wani, ataa akotara ti ala, ataa agbia ti Juda ahinga anzapa ni so kozoni pepe. Ala sara si ndo ni asi singo na mene ti azo so tënë ayeke na li ti ala pepe.

Jérémie 21:12

ala asewa ti David! Tënë so KOTA GBIA atene ayeke so: Lakue na ndaperere, ayeke nzoni ala fâ ngbanga mbirimbiri. Azo so ayeke te amba ti ala na mbana so, ala zi azo ni na maboko ti ala. Tongaso pepe, fade ngonzo ti mbi ayeke londo tongana wâ so ayeke gbi ye kue; zo alingbi ti mingo ni pepe. So ayeke futa ti asioni sarango ye ti ala laa.

Jérémie 22:17

Me ti mo, mo yeke gi gi nzoni ti mo wani; nilaa azo so tënë ayeke na li ti ala pepe, mo ye gi ti tuku mene ti ala senge senge; mo ye gi ti sara ngangu na azo, ti sara ala na ngangu, na ngangu.”

Jérémie 26:16

Tongaso, agbenyogbia ni na azo ni kue atene na awayango-sandaga nga na awayanga-Nzapa, atene: “Koli so alingbi na kuâ pepe! Biani, na iri ti KOTA GBIA Nzapa ti e laa lo tene tënë na e.”

Jérémie 5:28

Ala kono mingi si tere ti ala ayeke za zango. Ala hon azo kue na sarango sioni. Ala yeke fâ ngbanga na legeni pepe; ala yeke baa tënë ti nyindu na legeni pepe; tongaso pepe, ka nyindu ni abaa nzoni. Ala yeke baa tënë ti awayere na legeni pepe.

Jérémie 7:23

Yanga so mbi mu na ala ayeke so: Ayeke nzoni ala ma yanga ti mbi, tongaso si mbi yeke duti Nzapa ti ala si ala yeke duti azo ti mbi. Ala tambula mbirimbiri na lege so mbi fa na ala si ala yeke duti nzoni.

Jérémie 9:24

“Mbeni lango ayeke ga so mbi yeke ga na tere ti azo so atene, ani yeke azo so afâ *ganza awe so; so tënë ti yanga ti KOTA GBIA laa.

Abia ti demango tere 3:36

so na le ti ngbanga, azo afâ ngbanga ti mbeni zo nzoni pepe so, KOTA GBIA ayeke baa ye so pepe?

Ezekiel 18:12

lo yeke sara ngangu na azo ti mawa na awayere, lo yeke nzi ye ti azo. Ye so lo gbu na maboko ti zo ndali ti yongo ti lo, lo yeke kiri na ni na wani pepe, lo yeke baa ndo na mbage ti ayanda, lo yeke sara aye so zo alingbi ti baa na le ti lo fani use pepe.

Ezekiel 18:7

Lo yeke sara ngangu na zo pepe; tongana lo gbu ye ti zo ndali ti yongo ti lo so ayeke na li ti zo ni, lo yeke kiri na ni; lo yeke nzi ye ti zo pepe, lo yeke mu kobe na zo so nzara asara lo, lo yeke mu bongo na zo so bongo atia lo.

Ezekiel 22:7

Na ndo ti mo, azo ayeke ne babâ na mama ti ala pepe, ala yeke sara ngangu na awande, ala yeke sara ngangu na awali-mua nga na anyindu.

Ezekiel 45:9

Tënë so Kota Gbia NZAPA atene ayeke so: “Ala amakonzi ti Israel, ala sara ye ni ahon ndoni awe! Ala zia ti sara ngangu na azo, ti nzi aye ti azo. Ala sara ye na legeni; ala fâ ngbanga mbirimbiri; ala zia ti mu ye ti azo ti mbi na ngangu. So tënë ti yanga ti Kota Gbia NZAPA laa.

Awayango-sandaga 19:15

“Na le ti ngbanga, ala fâ ngbanga na legeni: ala mu mbage ti zo ti mawa pepe, ala mu nga mbage ti kota zo pepe; me ala fâ ngbanga ti amba ti ala mbirimbiri.

Amos 5:15

Ala ke ye ti sioni, ala ye ye ti nzoni. Na le ti ngbanga, ala kiri afâ ngbanga na lege ti ndia; e hinga pepe, fade KOTA GBIA, Nzapa so ayeke na ndö ti dunia kue ayeke baa mawa ti tanga ti azo ti sewa ti Joseph.

Amos 5:24

Me ayeke nzoni fango ngbanga na lege ti ndia asua tongana ngu si fango ngbanga ti mbirimbiri asua tongana ngu so ayeke hole laoko pepe.

Mishe 3:11

Amakonzi ti agbata ni ayeke fâ ngbanga gi ndali ti warango goro; awayango-sandaga ti ala ayeke fa ye gi ti wara ye na pekoni; awayanga-Nzapa ti ala ayeke fa ye so ayeke si gi ndali ti warango nginza. Na ndö ni kue, ala yeke luti na ndö ti *KOTA GBIA si ala tene: “KOTA GBIA ayeke na popo ti e pepe? Fade ye ti sioni alingbi ti si na e pepe.”

Mishe 6:8

Mo zo, a fa na mo ye so ayeke nzoni awe. Ye so KOTA GBIA ahunda na mo ayeke gi so: sara ye so ayeke mbirimbiri, ye tënë ti sarango ye ti nzoni be, tambula na Nzapa ti mo na lege ti sarango tere ti mo kete.

Malashii 3:5

Biani, fade mbi yeke ga nduru na tere ti ala ti fâ ngbanga na li ti ala. Mbi yeke ga hio ti bi tënë na li ti azo ti mazi, azo ti gingo wali wala koli ti amba ti ala, azo so ayeke bi atënë ti mvene na li ti amba ti ala na azo so ayeke futa azo ti kua ti ala na legeni pepe; azo so ayeke sara ngangu na awali-mua nga na anyindu, azo so ayeke sara mbana na awande nga na azo so ayeke kpe mbeto ti mbi pepe. Tënë so KOTA GBIA so ayeke na ndö ti dunia kue atene laa.”

Matthieu 23:23

“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala yeke mu *dime ti aye ti ala, ataa akete kete ye ti yaka ti ala; me kota tënë ti *Ndia, ala baa ni gi tongana senge ye na le ti ala. Kota tënë ti Ndia ni ayeke sarango ye ti mbirimbiri, bango mawa ti azo, ngbango na lege ti tënë ti Nzapa. Ye so ala lingbi fade ti sara ni laa, me ala zia pepe ti sara tanga ti aye ni.

Ndia ti fani use ni 10:18

Lo yeke gbu koko ti anyindu na awali-mua; lo ye awande si lo yeke mu na ala kobe ti tengo ni na bongo ti yungo ni.

Ndia ti fani use ni 24:17

Moïse atene: Ala buba ya ti ngbanga ti wande wala ti nyindu pepe. Ala gbu bongo ti wali-mua ti bata ni ndali ti yongo ti ala pepe.

Ndia ti fani use ni 24:7

Moïse atene: Tongana mbeni zo na popo ti ala anzi ita ti lo, zo ti Israel, lo sara zo ni na ngbaa, wala lo ka ita ti lo ni, zo ti nzi ni alingbi na kuâ. Lege so fade ala yeke zi sioni ye na popo ti ala laa.

Ndia ti fani use ni 25:1

Moïse atene: Tongana azo use awara tënë na popo ti ala si ala use kue ague na ngbanga titene a fâ ya ti tënë ni, zo so tënë ayeke na li ti lo, fade a yeke fâ ngbanga na li ti lo; zo so tënë ayeke na li ti lo pepe, a yeke bi tënë na li ti lo pepe.

Ndia ti fani use ni 27:19

‘Deba aga na ndö ti zo so afâ ngbanga ti wande, ti nyindu na ti wali-mua na legeni pepe!’ Fade azo kue ayeke kiri tënë, atene: ‘Amen!’

Jacques 1:27

Mbirimbiri vorongo Nzapa so sioni ye oko ayeke daa pepe, ayeke mungo maboko na anyindu nga na awali-mua so ayeke baa pasi; mbirimbiri vorongo Nzapa ayeke nga ti ke sarango aye ti potopoto ti dunia so.