Jérémie 21:7 - Mbeti ti Nzapa - Tënë so amu fini

⁷ Na pekoni, mbi yeke zia Sedesias, gbia ti Juda, lo na azo ti gbe ti lo, na maboko ti gbia ti Babilone. Mbi yeke zia nga na maboko ti gbia ni azo ti gbata ni, ala so angba na fini na peko ti sioni kobela ti bubango kodro, ala so angba na fini na peko ti bira na kota nzara. Biani, fade mbi yeke zia azo ni na maboko ti awato ti ala nga na maboko ti azo so aye gi kuâ ti ala. Gbia Nabukodonosor ayeke fâ azo ni kue, lo yeke zia zo oko pepe, lo yeke baa mawa ti zo oko pepe, lo yeke hinga zo oko pepe; so tënë ti yanga ti KOTA GBIA laa.’ ”

Jérémie 21:7 Iomraidhean Croise

Ésaïe 27:11

Tongana amaboko ti keke ahole, a yeke fâ ni si awali ayeke ga ti ro ni ti sara na wâ. Biani, azo so ahinga ndo pepe. Ndani laa lo so lo sara ala abaa mawa ti ala pepe, lo so lo sara ala azi tënë na li ti ala pepe.

Ésaïe 47:6

Mbi sara lani ngonzo na tere ti azo ti mbi. Tongaso mbi zia kamene na le ti azo so ayeke ti mbi si mbi zia ala na maboko ti mo. Me mo baa mawa ti ala oko pepe, mo sara si komandema ti mo ane tongana *zuge na ndö ti ambakoro.

Jérémie 13:14

Mbi yeke pika ala na tere ti tere titene ya ti ala akungbi, mbi yeke pika ababâ na amolenge na tere ti tere; so tënë ti yanga ti KOTA GBIA laa. Mbi yeke zia zo oko pepe, mbi yeke sara nzoni be na zo oko pepe, mbi yeke baa mawa ti zo oko pepe. Mbeni ye oko ayeke kanga lege na mbi pepe ti fâ ala kue ti hunzi ala.’ ”

Jérémie 14:12

Ataa ala ke kobe, fade mbi yeke ma dema ti ala pepe. Ataa ala ya na mbi asandaga so a yeke gbi ni kue na wâ nga na asandaga ti ale ti kobe, ayeke nzere na be ti mbi pepe. Me mbi yeke hunzi ala na lege ti bira, na lege ti nzara nga na lege ti sioni kobela ti bubango kodro.”

Jérémie 15:5

*KOTA GBIA atene: “Mo Jérusalem, zo wa laa ayeke baa mawa ti mo, zo wa? Zo wa laa ayeke toto mawa ti mo, zo wa? Zo wa laa ayeke do tere ti lo ti hunda tënë ti mo, zo wa?

Jérémie 15:9

Wali so lani azo ayeke gonda lo atene, lo yeke na amolenge mbarambara so, fadeso ngangu ti lo ahunzi kue, lo yeke wu gi na nduzu, na nduzu. Ti lo, taa na kota lâ, lâ akui awe. Kamene ahon ndö ti lo, kamene agbu le ti lo. Ti ala so angba na fini, fade mbi yeke sara si ala kui kuâ ti yongoro zeme taa na le ti awato ti ala.” So tënë ti yanga ti KOTA GBIA laa.

Jérémie 19:7

Na ndo so, fade mbi yeke sara si poroso ti azo ti Juda na ti Jérusalem aga senge senge ye. Mbi yeke sara si ala ti na gbe ti awato ti ala si awato ni afâ ala na ya ti bira, awato ti ala ni ayeke baa mawa ti ala oko pepe. Mbi yeke sara si kuâ ti ala aga kobe ndali ti andeke ti nduzu na anyama ti sese.

Jérémie 20:4

Biani, tënë so KOTA GBIA atene ayeke so: ‘Mbi yeke sara si mo ga zo ti ziango mbeto na be ti mo wani nga na be ti amba ti mo so mo na ala aye tere mingi. Amba ti mo ni ayeke kui kuâ ti yongoro zeme na maboko ti awato ti ala. Ti mo, mo yeke luti ande ti baa ye ni na le ti mo. Mbi yeke sara si azo ti Juda kue ati na maboko ti gbia ti Babilone; lo yeke gbu ala ti gue na ala na Babilone si lo yeke fâ ala na yongoro zeme.

Jérémie 22:25

Mbi yeke sara si mo ti na maboko ti azo so aye gi kuâ ti mo, azo so mo sara mbeto ti ala mingi, so ti tene gbia Nabukodonosor na aturugu ti lo.

Jérémie 27:6

Fadeso, mbi zia akodro so kue na maboko ti zo ti kua ti mbi Nabukodonosor, gbia ti Babilone. Ataa anyama ti ngonda, mbi mu ala na lo titene ala sara kua na lo.

Jérémie 32:4

Ti Sedesias, gbia ti Juda, lo yeke kpe na maboko ti azo ti Babilone pepe. Biani, fade a yeke zia lo na maboko ti gbia ti Babilone, lo wani, lo yeke tene tënë na gbia ni si lo yeke baa lo le na le.

Jérémie 34:3

Ti mo, fade mo yeke kpe na maboko ti lo pepe; a yeke gbu mo si a zia mo na maboko ti lo. Mo na gbia ti Babilone ayeke baa tere le na le si lo wani, lo yeke tene tënë na mo. Na pekoni, mo yeke gue na Babilone.

Jérémie 36:29

Fade mo yeke tene tënë so na ndö ti Yoakim, gbia ti Juda, mo tene: ‘Tënë so KOTA GBIA atene ayeke so: Jérémie asu lani na mbeti, atene, fade gbia ti Babilone ayeke ga biani si lo yeke buba kodro so; lo yeke fâ azo na anyama ti hunzi ala. Me Yoakim asuku na Jérémie si lo gbi rulo ni.

Jérémie 37:17

Na pekoni gbia Sedesias atokua titene a ga na Jérémie. Gbia ni ahunda lo na hondengo ni na ya ti yangbo ti lo, atene: “Mbeni tënë ti *KOTA GBIA ayeke daa ndali ti mbi?” Jérémie akiri tënë: “Een, ayeke daa; tënë ni ayeke so: ‘Fade a yeke zia mo na maboko ti gbia ti Babilone.’ ”

Jérémie 50:17

Israel ayeke lani tongana taba so agirisa si abamara ayeke tumba peko ti lo. Kozo bamara so ate Israel ayeke gbia ti Asirii. Na pekoni Nabukodonosor, gbia ti Babilone aga, lo kungbi abio ti lo.

Abia ti demango tere 2:20

KOTA GBIA, mo baa nga maa! Azo ti mo laa mo sara na ala tongaso? Mo baa, awali so adu amolenge si abata ala so, ala kiri ti te amolenge ni tongana nyen so-oo? Azo ague ngbii ti fâ awayango-sandaga na awayanga-Nzapa taa na ya ti kota da ti mo biani?

Abia ti demango tere 2:22

Azo so alango nduru na mbi si mbeto ti ala agbu mbi mingi so, mo tisa ala ti ga na tere ti mbi, mo baa mo tene, azo na lango ti matanga. KOTA GBIA, na lango so ngonzo ti mo alondo, zo oko ti kpe ti soo kuâ ayeke daa pepe, zo oko ti ngba na fini ayeke daa pepe. Amolenge so mbi bata ala si ala kono na da ti mbi so, awato aga afâ ala, ahunzi ala kue!

Ezekiel 23:28

“Ndani laa, tënë so mbi Kota Gbia NZAPA, mbi tene ayeke so: Fade mbi yeke zia mo na maboko ti azo so mo ke ala, mbi yeke zia mo na maboko ti azo so be ti mo ake ala.

Ezekiel 7:9

Mbi yeke baa mawa ti zo oko pepe, mbi yeke zia zo oko pepe. Mbi yeke futa ala alingbi na sarango ye ti ala nga na asioni ye so ala sara si zo alingbi ti baa na le ti lo fani use pepe so; aye ni kue ayeke na popo ti ala. Tongaso, fade ala yeke hinga atene, mbi laa mbi KOTA GBIA laa, mbi yeke pika ala.

Ezekiel 8:18

Mbi nga, fade mbi yeke sara ye na ala na lege ti ngonzo ti mbi ti wâ. Mbi yeke baa mawa ti ala pepe, mbi yeke zia zo oko pepe. Ataa ala dekongo na mbi na kota go, mbi yeke ma ala pepe.”

Ezekiel 9:10

Tongaso mbi nga, fade mbi yeke baa mawa ti ala oko pepe, mbi yeke zia zo oko pepe; mbi yeke futa ala alingbi na lege ti sarango ye ti ala.”

Ndia ti fani use ni 28:50

Azo ti mara ni so, ngia ayeke na le ti ala ka pepe; ala yeke kpe ambakoro pepe, ala yeke baa mawa ti amolenge pepe.