Jérémie 21:6 - Mbeti ti Nzapa - Tënë so amu fini

⁶ Fade mbi yeke fâ azo ti gbata so, ala na anyama ti ala kue; ala yeke kui kuâ ti sioni kobela ti bubango kodro.

Jérémie 21:6 Iomraidhean Croise

Tongo nda ti aye 6:7

Lo tene: “Mbi yeke sara ande titene azo so mbi sara ala so ahunzi kue na ndö ti sese, ala na anyama ti kodro, na anyama so ayeke hara harango, na andeke ti nduzu. Tongana mbi sara fade ala pepe, ka ayeke nzoni mingi.”

Ésaïe 6:11

Tongaso mbi hunda ndo, mbi tene: “KOTA GBIA, ye ni so ayeke gue ngbii asi lawa?” Lo kiri tënë, lo tene: “Ye ni ayeke gue ngbii asi na ndembe so a buba agbata kue, zo oko ayeke ngba na ya ti agbata ni pepe, zo oko ayeke ngba na ya ti da pepe, sese ayeke buba kue si ayeke ga ngonda.

Jérémie 14:12

Ataa ala ke kobe, fade mbi yeke ma dema ti ala pepe. Ataa ala ya na mbi asandaga so a yeke gbi ni kue na wâ nga na asandaga ti ale ti kobe, ayeke nzere na be ti mbi pepe. Me mbi yeke hunzi ala na lege ti bira, na lege ti nzara nga na lege ti sioni kobela ti bubango kodro.”

Jérémie 16:4

Fade ngangu kobela ayeke fâ ala; zo ayeke toto kuâ ti ala pepe, zo ayeke lu nga kuâ ti ala pepe. Me ala yeke ga tongana puru na ndö ti sese. Fade bira na nzara ayeke fâ ala si kuâ ti ala ayeke ga kobe ti andeke ti nduzu na ti anyama ti sese.”

Jérémie 20:4

Biani, tënë so KOTA GBIA atene ayeke so: ‘Mbi yeke sara si mo ga zo ti ziango mbeto na be ti mo wani nga na be ti amba ti mo so mo na ala aye tere mingi. Amba ti mo ni ayeke kui kuâ ti yongoro zeme na maboko ti awato ti ala. Ti mo, mo yeke luti ande ti baa ye ni na le ti mo. Mbi yeke sara si azo ti Juda kue ati na maboko ti gbia ti Babilone; lo yeke gbu ala ti gue na ala na Babilone si lo yeke fâ ala na yongoro zeme.

Jérémie 32:24

“Fadeso azo ti Babilone abongbi sese si aga *koto, ala ga nduru na gbata ni titene ala mu ni awe; ala yeke tiri bira titene ala mu gbata ni. Na lege ti bira, kota nzara na sioni kobela ti bubango kodro, gbaa fade gbata ni ayeke ti na maboko ti ala. Tënë so lani mo tene, ni laa asi awe so; ti mo, mo yeke baa gi ni bango!

Jérémie 33:12

Tënë so KOTA GBIA so ayeke na ndö ti dunia kue atene ayeke so: “Na ya ti kodro so abuba kue awe so, so azo na anyama ayeke daa pepe so, na ya ti agbata ni kue, ndo ayeke kiri ti duti daa ndali ti awabatango-taba, ndo titene ala zia ataba na angasa ti ala daa ti wu tere.

Jérémie 34:17

“Baa, tënë so KOTA GBIA atene ayeke so: Ala oko oko kue alingbi fade ti to mbela titene a zi a-ita ti ala na amba ti ala na gbe ti ngbaa; me ala ma yanga ti mbi pepe. Ndani laa, mbi KOTA GBIA, mbi to mbela titene a zi lege na bira, na sioni kobela ti bubango kodro nga na nzara ti ga na tere ti ala; so tënë ti yanga ti KOTA GBIA laa. Fade akodro-gbia kue ti sese ayeke do na kota mbeto na bango ala.

Jérémie 36:29

Fade mo yeke tene tënë so na ndö ti Yoakim, gbia ti Juda, mo tene: ‘Tënë so KOTA GBIA atene ayeke so: Jérémie asu lani na mbeti, atene, fade gbia ti Babilone ayeke ga biani si lo yeke buba kodro so; lo yeke fâ azo na anyama ti hunzi ala. Me Yoakim asuku na Jérémie si lo gbi rulo ni.

Jérémie 42:22

Ti fadeso, kite ni ayeke daa pepe: fade ala yeke kui na lege ti bira, kota nzara na sioni kobela ti bubango kodro na ya ti kodro so ala ye ti gue ti honde tere ti ala daa.”

Jérémie 7:20

Ndani laa, tënë so Kota Gbia NZAPA atene ayeke so: “Fade mbi yeke tuku ngonzo ti mbi ti wâ na ndö ti gbata so, na ndö ti azo na anyama, na ndö ti akeke nde nde ti yaka na ale ti kobe so asigigi na sese. Ngonzo ti mbi ayeke duti tongana wâ so ayeke mingo pepe.”

Ezekiel 12:16

Me fade mbi yeke bata ambeni na popo ti ala so ayeke kui kuâ ti yongoro zeme pepe, kuâ ti nzara pepe nga na kuâ ti sioni kobela ti bubango kodro pepe. Tongaso si ala yeke fa na amara nde so ala yeke gue na popo ti ala, peko ti asioni sarango ye ti ala so zo alingbi ti baa na le ti lo fani use pepe so. Tongaso, fade amara nde ni ayeke hinga atene, mbi yeke KOTA GBIA.”

Ezekiel 14:13

“*Molenge ti zo, tongana azo ti mbeni kodro asara siokpari so ake mbi si ala sara ye so ayeke sioni mingi, fade mbi yeke yoro maboko ti mbi ti pika ala, mbi yeke buba akobe ti ala so ala bata, mbi yeke tokua kota nzara na tere ti ala, mbi yeke fâ azo na anyama kue ti kodro ni ti hunzi ala.

Ezekiel 14:17

“Wala tongana mbi sara si bira aga na ya ti kodro ni, mbi yeke mu yanga na aturugu ti buba kodro ni nga ti fâ azo na anyama kue ti hunzi ala.

Ezekiel 14:19

“Wala tongana mbi tokua sioni kobela ti bubango kodro na tere ti azo ni, tongana mbi tuku ngonzo ti mbi ti wâ na ndö ti ala na lege ti sioni kobela ni so ayeke fâ azo na anyama ahunzi ala,

Ezekiel 14:21

Biani, tënë so Kota Gbia NZAPA atene ayeke so: “Mbi tokua asioni kpale ti mbi osio na ndö ti Jérusalem: bira, kota nzara, asioni nyama na sioni kobela ti bubango kodro. Mbi tokua ni ti fâ azo na anyama kue ti hunzi ala.

Ezekiel 33:27

“Mo tene na ala, mo tene: Tënë so Kota Gbia NZAPA atene ayeke so: ‘Fini ti mbi! Azo so angba na ya ti gbata so abuba awe so, fade ala yeke kui kuâ ti yongoro zeme; azo so ayeke na ya ti ngonda, mbi yeke mu ala na anyama ti ngonda titene ate ala; azo so ahonde tere ti ala na ndö ti ahoto nga na ya ti adu ti têne, sioni kobela ti bubango kodro ayeke fâ ala.

Ezekiel 33:29

Na ndembe so mbi yeke sara titene kodro ni aga benyama biani ndali ti asioni sarango ye ti azo ti Israel so zo alingbi ti baa na le ti lo fani use pepe, fade azo ayeke hinga atene, mbi laa mbi yeke KOTA GBIA.

Ezekiel 7:15

“Na ndö ti alege, gi bira na bira, na ya ti ada, gi kobela ti bubango kodro na kota nzara. Na ya ti ayaka, azo ayeke kui na ya ti bira, na ya ti agbata, kota nzara na sioni kobela ti bubango kodro ayeke fâ azo.

Osée 4:3

Ndani laa fade ndo ayeke hole kue na ya ti kodro ni, azo ti kodro ni kue ayeke nge ngengo, ala, na anyama ti ngonda na andeke ti nduzu; ataa asusu ti kota ngu-ingo ayeke hunzi kue.

Mishe 3:12

Ndani laa, ndali ti ala, fade Sion ayeke ga tongana yaka so a de ni awe, Jérusalem ayeke ti kue na sese si hoto so kota da ti Nzapa ayeke daa, ndö ni ayeke ga ngonda.

Sofonii 1:3

Fade mbi yeke hunzi azo na anyama kue, andeke ti le ti nduzu na asusu ti kota ngu-ingo kue; mbi yeke hunzi asioni zo nga na aye so kue ayeke sara si ala yeke ti so. Mbi yeke hunzi azo kue kue kue na ndö ti sese.” So tënë ti yanga ti KOTA GBIA laa.

Nzoni Tënë so Luc asu na mbeti 21:24

Fade a yeke fâ azo ni na yongoro zeme, a yeke gbu ala ti gue na ala na ya ti akodro kue. Amara kue ayeke buba gbata ti Jérusalem kue ngbii ngoi ti ala ahunzi si.”