Jérémie 2:7 - Mbeti ti Nzapa - Tënë so amu fini

⁷ Mbi sara si ala li na ya ti kodro so kobe ayeke du daa gbani gbani titene ala te anzerengo le ti kobe ni si ala wara anzoni ye ti kodro ni. Me so ala li na ya ti kodro ti mbi ni, ala sara si aga *sioni. Ala sara si ye so ayeke ti mbi aga ye ti sioni so zo alingbi ti baa na le fani use pepe.

Jérémie 2:7 Iomraidhean Croise

Néhémie 9:25

Ala mu agbata so ngangu gbagba ayeke na tere ni, asese so ayeke du akobe mingi, ada so asi singo na mara ti amosoro nde nde, adu ti ngu so a zi ni awe, ayaka ti *vinye na ti olive nga na gba ti akeke so ayeke le mingi. Ndali ti nzoni be ti mo, ala te ye, ya ti ala asi, ala kono, ala duti na ngia.

Néhémie 9:26

Me akotara ti e asara ngangu li na mo, ala tomboka na tere ti mo, ala bi atënë ti ndia ti mo na peko ti ala; ala fâ awayanga ti mo so ayeke mu wango na ala titene ala kiri na mbage ti mo. Na sarango ye tongaso, ala zonga mo mingi.

Ésaïe 19:25

KOTA GBIA so ayeke na ndö ti dunia kue ayeke sara tufa ni, atene: “Mbi sara tufa na ndö ti Ezipte, azo ti mbi, na ndö ti Asirii so mbi sara na maboko ti mbi wani nga na ndö ti Israel, ye so aga ye ti mbi.”

Jérémie 16:18

Mbi yeke mu na ala kozoni futa fani use alingbi na sioni nga na siokpari ti ala, ngbanga ti so ala sara si kodro ti mbi aga sioni. Ye so aga ti mbi, ala sara si asi singo na afungo nzapa ti ala so ayeke na fini pepe so; ala sara si ye ti mbi ni asi singo na asioni nzapa ti ala so zo alingbi ti baa na le ti lo fani use pepe so.”

Jérémie 3:1

*KOTA GBIA atene: Tongana koli atumba wali ti lo si wali ni ague, amu mbeni koli nde, fade kozo koli ni alingbi ti kiri na tere ti wali ni? Oko pepe! Kodro so azo ni ayeke sara mara ti aye tongaso ayeke ga sioni ahon ndoni pepe? Ti mo Israel, mo sara ye ti ndumba na gba ti andeko. Na pekoni mo tene, mo ye ti kiri na tere ti mbi? So tënë ti yanga ti KOTA GBIA laa.

Jérémie 3:2

Mu le ti mo na nduzu, mo baa ndo kâ na li ti ahoto! Ndo wa laa mo lango na koli daa pepe? Mo duti na yanga ti alege ti ku andeko ti mo tongana *azaragina so aduti na benyama ti ku azo so ayeke hon na lege. Mo sara si kodro ni aga sioni awe na lege ti sarango aye ti ndumba nga na sarango ye ti kirikiri ti mo.

Jérémie 3:9

Lo sara aye ti ndumba ni na ayanda so a sara na têne nga na keke si na lege ti sarango ye ti kirikiri ti lo, lo sara si kodro ni kue aga sioni.

Jérémie 32:23

Ala ga si ala mu kodro ni titene aga ti ala. Ye oko, ala ma tënë ti mo pepe, ala bata lege ti andia ti mo pepe, ala ke ti sara ye so mo mu yanga na ala ti sarango ni. Nilaa mo tokua akpale so kue na ndö ti ala laso.

Jérémie 32:30

“Biani, so tënë ti yanga ti KOTA GBIA laa: Ti londo na ngoi so ala ga mara ngbii asi laso, azo ti Israel na azo ti Juda asara gi ye so ayeke sioni na le ti mbi. Ye so kue azo ti Israel asara azia gi ngonzo na be ti mbi.

Ezekiel 20:24

Mbi deba yanga ti mbi na ala, ngbanga ti so ala sara ye pepe alingbi na lege ti asarango ye so mbi fa, ala baa andia ti mbi tongana mbumbuse ye, ala sara si lango ti wungo tere aga sioni, le ti ala angba gi na peko ti ayanda ti ababâ ti ala.

Ezekiel 20:28

Mbi sara si ala li na kodro so mbi yoro lani maboko ti mbi na nduzu, mbi deba yanga ti mbi ti mu na ala. Na ya ti kodro ni, le ti ala agi ndo so akete hoto kue ayeke daa nga na akeke so gba ti akugbe ayeke daa. Kâ laa, ala mu asandaga ti ala, ala mu amatabisi ti ala ti gingo na yanga ti mbi, ala mu asandaga so fion ni afun nzoni nga na sandaga ti samba.

Ezekiel 20:6

Na lango ni so, mbi yoro maboko ti mbi na nduzu, mbi deba yanga ti mbi na ala, mbi tene: fade mbi yeke sara si ala sigigi na sese ti Ezipte ti gue na mbeni kodro so mbi *bembe ni ando ndali ti ala; kodro ni ayeke pendere ahon akodro kue, *kodro so ngu ti me ti bagara na mafuta ti wotoro asi singo daa.

Ezekiel 23:35

Ndani laa, tënë so mbi Kota Gbia NZAPA, mbi tene ayeke so: Jérusalem, be ti mo agirisa na mbi awe, mo zia peko ti mo na mbi awe. Fadeso, mo yeke wara futa ti peko ti sarango ye ti potopoto ti mo nga na ti ye ti ndumba ti mo.”

Ezekiel 36:17

“*Molenge ti zo, na ndembe so azo ti Israel aduti ando na sese ti ala, ala sara si sese ni aga *sioni na lege ti dutingo ti ala nga na asarango ye ti ala. Lege ti dutingo ti ala ayeke *sioni na le ti mbi tongana wali so aga *sioni na ngoi ti bango ya ti lo.

Osée 9:3

Fade azo ti Efraim ayeke ngba na ya ti kodro ti *KOTA GBIA pepe; ala yeke kiri na sese ti Ezipte si na sese ti Asirii, ala yeke te kobe so ayeke *sioni.

Mishe 2:10

Ala londo, ala hon kâ! Ndo ti wungo tere ti ala ayeke ge mbeni pepe! Ndali ti siokpari ti ala, sese ti ala aga *sioni awe, ala yeke baa ande pasi, pasi ni ayeke duti ngangu mingi.”

Wungo ti azo 13:27

Ala tene na Moïse: “E gue, e si na kodro so mo tokua e daa. Biani, kodro ni ayeke *kodro so ngu ti me ti bagara na mafuta ti wotoro asi singo daa. Ala baa, ambeni le ti keke ti kodro ni laa.

Ndia ti fani use ni 21:23

Tongana ye ni ayeke tongaso, alingbi kuâ ti lo angba na ya ti keke ni na bi ngbii asi na ndaperere pepe. Alingbi ala lu kuâ ni gi na oko lango ni so, ngbanga ti so kuâ ti zo so a kanga ni na ya ti keke, ayeke sara si deba ti Nzapa aga na ndö ti azo. Fade ala yeke sara si kodro so KOTA GBIA Nzapa ti ala amu na ala aga *sioni pepe.

Ndia ti fani use ni 32:9

Me azo ti Israel ayeke azo so aga ti KOTA GBIA, *ahale ti Jacob aga ye ti lo.

Ndia ti fani use ni 6:18

Ala sara ye so ayeke mbirimbiri, ye so ayeke nzoni na le ti KOTA GBIA; tongaso si fade ala yeke baa nzoni si ala lingbi ti gue ti mu nzoni sese so KOTA GBIA adeba yanga ti lo lani ti mu na akotara ti ala.