Jérémie 2:34 - Mbeti ti Nzapa - Tënë so amu fini

³⁴ Na tere ti bongo ti mo, gi mene ti azo ti mawa na ti azo so tënë ayeke na li ti ala pepe. Andaa laoko mo wara ala na fango yanga ti da ti mo pepe!

Jérémie 2:34 Iomraidhean Croise

2 Agbia 21:16

Na ndö ni kue, Manase afâ gba ti azo so asara sioni oko pepe si mene ti azo ni amu ya ti gbata ti Jérusalem kue. Siokpari ti fango azo ni aga na ndö ti siokpari so lo sara ti pusu azo ti Juda ti sara ye so ayeke sioni na le ti KOTA GBIA.

2 Agbia 24:4

nga ndali ti azo so asara sioni pepe si Manase afâ ala senge senge; mene ti ala atuku si amu ya ti gbata ti Jérusalem kue. KOTA GBIA ake ti zi tënë ni na li ti lo.

Sigingo 22:1

“Tongana a wara mbeni zo ti nzi so ayeke koro dere ti da ti nzi ye na bi, tongana a pika lo si a fâ lo, fade a yeke baa zo ti fango zo ti nzi ni tongana zo ti fango zo pepe.

Sigingo 22:2

Me tongana lo fâ zo ti nzi ni na kota lâ, fade a yeke baa lo tongana zo ti fango zo. Alingbi zo ti nzi afuta nginza so alingbi ndali ye so lo nzi. Tongana lo yeke na ye ti futa na ni pepe, fade a yeke ka lo na ngbaa.

Ésaïe 57:5

Nzara ti tere ti ala ayeke gbi ala tongana wâ nduru na tere ti akota keke, na gbe ti afini keke so kue kugbe ni ayeke gbani gbani. Ala yeke fâ amolenge ti mu na *sandaga na tere ti ngu nga na popo ti atêne so asuru.

Ésaïe 59:3

Biani, ya ti maboko ti ala asi singo na mene, ali ti maboko ti ala aga sioni ndali ti sioni ti ala; yanga ti ala ayeke tene atënë ti mvene, menga ti ala ayeke diko atënë ti kirikiri.

Ésaïe 59:7

Ala yeke mu loro ti sara sioni, ala yeke kpe ti gue ti tuku mene ti zo so asara sioni pepe. Gbungo-li ti ala ayeke gi ti sara sioni; na ndö ti alege so kue ala yeke hon daa, gi sarango ngangu na zo nga na bubango ye.

Jérémie 19:4

Biani, azo ti Juda ado mbi, azia awe; ala buba ndo so kue awe, zo alingbi ti hinga ni mbeni pepe: na ndo ni so, ala zö dukani na ambeni nzapa nde. Ataa ala wani, ataa akotara ti ala, ataa agbia ti Juda ahinga anzapa ni so kozoni pepe. Ala sara si ndo ni asi singo na mene ti azo so tënë ayeke na li ti ala pepe.

Jérémie 2:33

“Mo hinga kode ti tumbango peko ti andeko! Ti si na nda ti ye ti mo ni, mo gue daa ngbii ti sara sioni ahon ndoni si aga ye ti tere ti mo.

Jérémie 6:15

Kamene alingbi fade ti gbu le ti ala ndali ti asioni ye so ala sara si zo alingbi ti baa na le ti lo fani use pepe; me kamene agbu le ti ala oko pepe. Ala hinga atene, so sioni ye laa ala yeke sara so pepe. Ndani laa KOTA GBIA atene: Ala yeke ti legeoko na tanga ti azo so ayeke ti. Na ndembe so mbi yeke ga na tere ti azo ni, ala nga, ala yeke ti.

Jérémie 7:31

Na popo-hoto ti Hinom, ala leke ndo na li ti hoto so ala di iri ni Tofet. Kâ, ala yeke gbi na wâ amolenge ti ala ti koli na ti wali ti mu na *sandaga. Andaa, so ayeke mbeni ye so mbi mu yanga laoko pepe titene ala sara ni; mbeni tënë tongaso aga na li ti mbi laoko pepe.

Jérémie 7:6

tongana mbeni wande, wala nyindu, wala wali-mua ayeke na popo ti ala, ala sara ngangu na ala pepe; azo so tënë ayeke na li ti ala pepe, ala tuku mene ti ala na ndo so pepe; ala mu peko ti anzapa nde pepe, ngbanga ti ala wara kpale.

Jérémie 8:12

Kamene alingbi fade ti gbu le ti ala ndali ti asioni ye so ala yeke sara si zo alingbi ti baa na le ti lo fani use pepe; me kamene agbu le ti ala oko pepe. Ala hinga atene, so sioni ye laa ala yeke sara so pepe. Ndani laa KOTA GBIA atene: Ala yeke ti legeoko na tanga ti azo so ayeke ti. Na ndembe so mbi yeke ga na tere ti azo ni, ala nga, ala yeke ti.”

Abia ti demango tere 1:9

Sioni ti lo avuko yanga ti bongo ti lo. Ye ni so asi fade na lo so, lo gbu li ti lo na ndö ni kozoni pepe. Gbata ti Jérusalem ati ngangu; mbeni zo ti de be ti lo ayeke daa pepe. Lo tene: “KOTA GBIA, baa mbi ga buba ahon ndoni! Mo baa, wato ayeke hon ndö ti mbi.”

Abia ti demango tere 4:14

Tongana awaziba, ala yeke fono gi kirikiri na ndö ti alege. Mene so atuku asara si ala ga *sioni; a ke na zo ti ndu bongo ti ala.

Ezekiel 20:31

Ti fadeso, ala ngba ti ga *sioni na lege ti amatabisi ti ala, na lege ti amolenge ti ala so ala yeke gbi na wâ ti mu na sandaga na ayanda. Ala azo ti Israel, na sarango ye tongaso, fade mbi yeke yeda titene ala ga ti hunda mbi na mbeni tënë? Fini ti mbi! So tënë ti yanga ti mbi, Kota Gbia NZAPA laa. Fade mbi yeke yeda pepe titene ala hunda mbi na mbeni tënë!

Ezekiel 22:25

Awayanga-Nzapa ti gbata ti ala ayeke ma tere na hondengo ni. Ala yeke tongana bamara so atoto si ayeke suru ya ti nyama so lo gbu. Awayanga-Nzapa ni ayeke fâ azo, ala yeke nzi amosoro na anzoni ye ti azo; ala sara si awali mingi aga awali-mua na ya ti gbata ni.

Ezekiel 23:45

Me fade akoli ti mbirimbiri laa ayeke fâ ngbanga na li ti awali so, tongana ti so a yeke fâ ngbanga na li ti awali so alango na akoli nde nga na awali so atuku mene. Biani, ala lango na akoli nde si maboko ti ala atuku mene.

Ezekiel 24:7

Biani, mene so Jérusalem atuku angba taa na ya ti gbata ni. Lo tuku ni na ndö ti têne so ndö ni ayeke senge; lo tuku ni na ndö ti sese pepe, wala lo tuku fuku ti sese na ndö ni pepe.

Ezekiel 9:9

KOTA GBIA akiri tënë na mbi, atene: “Sioni ti azo ti Israel na ti azo ti Juda ayeke kota ahon ndoni; mene asi singo na ya ti kodro ni, sarango ngangu na azo asi singo na ya ti gbata ni. Biani, azo ni ayeke tene: ‘KOTA GBIA ado kodro ni azia awe, lo lingbi ti baa e oko pepe.’