Jérémie 18:8 - Mbeti ti Nzapa - Tënë so amu fini

⁸ Me tongana azo ti mara ni azia lege ti sioni so ala sara si azia ngonzo na be ti mbi so, sioni ye so mbi leke na be ti mbi ti sara na ala, mbi yeke zia lege ni.

Jérémie 18:8 Iomraidhean Croise

2 Mbai 12:6

Amakonzi ti azo ti Israel na gbia asara tere ti ala kete si ala tene: “KOTA GBIA ayeke mbirimbiri!”

Abia (Psaumes) 106:45

lo dabe ti lo na tënë ti mbuki ti lo na ala; ndali ti kota nzoni be ti lo, lo zia lege ti ye so lo ye ti sara na ala.

Abia (Psaumes) 135:14

Biani, KOTA GBIA ayeke fâ ngbanga ti azo ti lo na legeni, lo yeke baa mawa ti azo ti kua ti lo.

Abia (Psaumes) 90:13

*KOTA GBIA, ngonzo ti mo ayeke ngba ngbii asi lawa? Kiri na mbage ti e, baa mawa ti e, azo ti kua ti mo!

Sigingo 32:12

Tongana mo sara tongaso, fade azo ti Ezipte ayeke tene: ‘Na lege ti sioni be laa KOTA GBIA asara si azo ti Israel asigigi na kodro ti Ezipte; lo ye ti fâ ala na ndö ti hoto, ti hunzi ala na ndö ti sese so!’ KOTA GBIA, kai sioni ngonzo ti mo, zia ti sara sioni na azo ti mo.

Sigingo 32:14

Tongaso KOTA GBIA azia ti sara sioni so lo ye fade ti sara na azo ti lo.

Jérémie 12:16

Tongana azo ni amanda lege ti dutingo ni tongana ti azo ti mbi, tongana azo ni adeba na iri ti mbi, atene: ‘KOTA GBIA ayeke na fini!’, tongana ti so a fa na ala ti deba na iri ti *Baal, fade azo ni ayeke wara ndo ti duti daa na popo ti azo ti mbi.

Jérémie 15:6

So tënë ti yanga ti KOTA GBIA laa: Mo laa mo zia mbi, mo zia peko ti mo na mbi. Nilaa mbi yoro maboko ti mbi ti fâ mo. Mbi baa mawa ti mo alingbi awe.

Jérémie 26:13

Ti fadeso, ala sara si lege ti dutingo ti ala na sarango ye ti ala akiri aga nzoni; ala ma yanga ti KOTA GBIA Nzapa ti ala! Tongaso, sioni kpale so lo tene tënë ti tokuango ni na ndö ti ala, lo yeke zia lege ni.

Jérémie 26:19

Gbia Ezekias na azo ti Juda afâ wayanga-Nzapa Mishe ndali ni? Oko pepe, me ala kpe mbeto ti KOTA GBIA, nilaa ala sara kue ti de be ti lo. Tongaso, sioni kpale so KOTA GBIA atene tënë ti tokuango ni na ndö ti ala, lo zia lege ni. Ti e, tongana e fâ ngbanga fadeso na li ti koli so, andaa e sara sioni mingi na e wani.”

Jérémie 26:3

E hinga pepe, fade ala yeke ma si zo oko oko ayeke zia sioni lege ti sarango ye ti lo. Tongaso si sioni kpale so mbi ye ti tokua na ndö ti ala ndali ti asioni sarango ye ti ala, fade mbi yeke zia lege ni.

Jérémie 36:3

E hinga pepe, fade azo ti Juda ayeke ma nda ti asioni ye so mbi ye ti tokua na ndö ti ala si zo oko oko alingbi ti zia sioni lege ti sarango ye ti lo. Tongaso, fade mbi yeke zi sioni ti ala nga na siokpari ti ala na li ti ala.”

Jérémie 42:10

‘Tongana ala yeda ti ngba na ya ti kodro so, fade mbi yeke kiri ti leke ala na nduzu, mbi yeke kiri ti kungbi ala na sese pepe; mbi yeke kiri ti lu ala tongana ti so a yeke lu keke, mbi yeke kiri ti gboto ala pepe. Fade mbi yeke zia lege ti sioni ye so mbi sara na ala.

Ezekiel 18:21

“Tongana zo ti sioni azia lege ti asiokpari so kue lo sara, tongana lo bata atënë ti ndia ti mbi kue si lo sara ye na lege ti ndia nga na lege ti ye ti mbirimbiri, biani, fade lo yeke ngba na fini, lo yeke kui pepe.

Ezekiel 33:11

Tene na ala, mo tene: Fini ti mbi! So tënë ti yanga ti Kota Gbia NZAPA laa. Mbi yeke wara ngia ndali ti kuâ ti zo ti sioni? Ye so anzere na be ti mbi ayeke titene zo ti sioni azia sioni lege ti sarango ye ti lo si lo duti na fini. Ala azo ti Israel, ala zia sioni lege ti sarango ye ti ala, ala zia ni! Ala ye ti kui ngbanga ti nyen?

Ezekiel 33:12

“Ti mo, molenge ti zo, kiri mo tene na azo ti mara ti mo, mo tene: ‘Tongana zo ti mbirimbiri ato nda ti sara sioni ye, mbirimbiri so lo sara kozo so alingbi ti soo lo pepe. Tongana zo ti sioni azia lege ti sioni sarango ye ti lo, sioni so lo sara kozo so, lo yeke kui ndali ni pepe. Me zo ti mbirimbiri alingbi ti duti na fini pepe ndali ti sarango ye ti mbirimbiri ti lo, na lango so lo sara siokpari.

Ezekiel 33:13

Tongana mbi tene na zo ti mbirimbiri, mbi tene: Fade mo yeke duti na fini biani! Me tongana lo baa ti lo, lo tene, sarango ye ti mbirimbiri so lo sara so alingbi awe si lo to nda ti sara sioni ye, a yeke kiri ti dabe na nzoni sarango ye ti lo ti kozo so pepe. Fade lo yeke kui ndali ti sioni so lo sara.

Ezekiel 33:14

Tongana mbi tene na zo ti sioni, mbi tene: Fade mo yeke kui biani! Me tongana lo zia siokpari si lo sara ye so ayeke na legeni nga na ye so ayeke mbirimbiri,

Osée 11:8

“Efraim, mbi lingbi ti sara na mo tongana nyen? Israel, mbi lingbi ti ka mo tongana nyen? Mbi lingbi ti sara na mo ye so mbi sara ando na agbata ti Adma na ti Seboim so tongana nyen? Be ti mbi ado si mawa ti mo agbu be ti mbi mingi.

Amos 5:15

Ala ke ye ti sioni, ala ye ye ti nzoni. Na le ti ngbanga, ala kiri afâ ngbanga na lege ti ndia; e hinga pepe, fade KOTA GBIA, Nzapa so ayeke na ndö ti dunia kue ayeke baa mawa ti tanga ti azo ti sewa ti Joseph.

Jonas 4:2

Lo sambela *KOTA GBIA, lo tene: “Âa! KOTA GBIA, tënë so lani mbi tene na be ti mbi na ndembe so mbi yeke na kodro ti mbi so, ni laa asi so pepe? Mbi hinga lani mbi tene, mo yeke Nzapa so mo yeke sara nzoni be na zo si mo yeke baa mawa ti lo; mo yeke sara ngonzo hio hio pepe si nzoni be ti mo asi singo. Mo yeke lakue nduru ti zia lege ti sioni so mo ye ti sara na zo. Ndani laa, mbi londo lani ti kpe hio ti gue na Tarsis.

Ndia ti fani use ni 32:36

Biani, fade KOTA GBIA ayeke fâ ngbanga ti azo ti lo, lo yeke baa mawa ti azo ti kua ti lo na ndembe so lo yeke baa so ngangu ti ala ahunzi awe, mbeni zo ti mu maboko na ala ayeke daa pepe, ngbaa, wala zo so asigigi na gbe ti ngbaa ayeke daa mbeni pepe.

Awafango-ngbanga 2:18

Lakue tongana KOTA GBIA amu mbeni wafango-ngbanga na ala, KOTA GBIA ayeke na lo; wafango-ngbanga ni ayeke zi azo ti Israel na maboko ti awato ti ala na ngoi so kue wafango-ngbanga ni angba na fini. KOTA GBIA ayeke baa mawa ti ala tongana ala yeke dema tere ndali ti pasi so ala yeke baa na gbe ti azo so ayeke sara sana na ala.