Jérémie 16:12 - Mbeti ti Nzapa - Tënë so amu fini

¹² Ti ala, ala sara sioni mingi ahon akotara ti ala; zo oko oko ayeke ngba ti sara sioni ye so be ti lo afa na lo, me lo ke ti ma mbi.

Jérémie 16:12 Iomraidhean Croise

Tongo nda ti aye 6:5

KOTA GBIA abaa so sioni ti zo ahon ndoni na ndö ti sese. Ti londo na ndaperere ngbii asi na lakui, be ti lo aye gi ti sara sioni.

Tongo nda ti aye 8:21

KOTA GBIA ama nzoni fion ti sandaga ni, anzere na lo si lo tene na be ti lo, lo tene: “Mbi yeke kiri ti deba sese ndali ti zo pepe. Biani, ti londo na ndembe so zo ade maseka, be ti lo aye ti sara gi ye ti sioni. Tongaso mbi yeke kiri ti buba aye so ayeke na fini so tongana ti so mbi sara so pepe.

Zo ti bongbingo azo 8:12

Zo ti siokpari alingbi ti sara sioni fani ngbangbo oko, ataa so kue lango ti fini ti lo angba ti gue yongoro. Me mbi hinga, mbi tene: “Azo so akpe mbeto ti Nzapa, fade ala yeke duti nzoni.

Zo ti bongbingo azo 9:3

Na ndö ti sese so, mbeni sioni ye ayeke so: gi oko ye ayeke si na azo kue. Ndani laa be ti azo asi singo na aye ti sioni. So ala de na fini, ala sara ye tongana azo ti buba. Me na ndani, ala yeke gue na ndo ti akuâ.

Jérémie 13:10

Ala yeke mara ti asioni zo so ake ti ma tënë ti mbi. Ala ngba ti sara gi ye so be ti ala afa na ala; ala mu peko ti anzapa nde ti sara na ala, ti kuku ti kpo li ti ala na sese na dawa ti ala. Ayeke nzoni ala ga tongana kamba ti ndö ti bongo so mbeni ye ti sara na ni ayeke daa pepe!

Jérémie 17:9

“Be ti zo ayeke handa zo ahon tanga ti aye kue; zo alingbi ti kai kobela ni pepe. Zo wa laa alingbi ti hinga be ti zo?”

Jérémie 18:12

Me ala tene: “Ngbanga ti e ayeke daa pepe! E yeke ngba ti sara ye so aga na li ti e. Zo oko oko ayeke ngba ti sara sioni ye so be ti lo afa na lo.”

Jérémie 22:28

Azo ayeke hunda ndo, atene: “Koli so, Konia so, lo yeke mbeni ta so ya ni afâ awe? So ti tene mbeni ta so zo alingbi ti sara na kua pepe? Lo ga mbeni ta so zo aye ni mbeni pepe? Ngbanga ti nyen si a tumba lo, lo na amolenge ti lo si a bi ala na ya ti mbeni kodro so ala hinga ni pepe so?”

Jérémie 7:24

Me ala ke ti ma tënë ni; ala dingi mê ti ala kete pepe ti ma ni; ala sara gi ye so sioni be ti ala afa. Titene ala baa ndo na mbage ti mbi, ala zia gi peko ti ala na mbi.

Jérémie 7:26

Me ala ma mbi pepe; ala dingi mê ti ala kete pepe ti ma mbi; ala sara ngangu li ahon ndoni, ala sara sioni ahon akotara ti ala.

Jérémie 9:14

Ndani laa, tënë so KOTA GBIA so ayeke na ndö ti dunia kue, Nzapa ti Israel, atene ayeke so: Mbi yeke mu na azo ti kodro ni sengo kugbe titene aga kobe ti ala ti tengo ni, mbi yeke mu na ala ngu so sioni yoro ayeke na ya ni titene ala nyon.

Abia ti demango tere 5:7

Akotara ti e asara ando siokpari, ala yeke daa mbeni pepe; me e laa e yo ngbanga ti asioni ti ala ni.

Ezekiel 20:30

Ndani laa, mo tene na azo ti Israel, mo tene: Tënë so Kota Gbia NZAPA atene ayeke so: Ye ni nyen! Ala ga *sioni tongana akotara ti ala, ala sara ye ti ndumba na vorongo ayanda ti ala so zo alingbi ti baa na le ti lo fani use pepe so!

Amos 2:4

Tënë so KOTA GBIA atene ayeke so: “Mbi yeke na tënë na azo ti Juda ndali ti asioni ye ota, wala osio so ala sara: ala baa ndia ti mbi KOTA GBIA tongana mbumbuse ye, ala ke ti sara ye alingbi na ambela ti mbi; ala mu peko ti anzapa ti mvene tongana ti so akotara ti ala asara ando. Ndani laa, ngbanga so mbi fâ na li ti ala, mbi yeke kiri na ndö ni oko pepe.

Malashii 3:7

Tongana ti so akotara ti ala asara ando, ala nga, ala zia lege ti aye so mbi fa na ala; ala sara ye alingbi na ni pepe. Ala kiri na mbage ti mbi si fade mbi kiri na mbage ti ala. Tënë so KOTA GBIA so ayeke na ndö ti dunia kue atene laa. Ala hunda ndo, atene: ‘E yeke sara tongana nyen ti kiri na mbage ti mo?’

Marc 7:21

Biani, asioni tënë ti be alondo na ya ti zo, na be ti lo si afa na lo lege ti sarango asioni ye: sarango ye ti ndumba, nzi, fango zo,

Ndia ti fani use ni 29:19

Fade KOTA GBIA ayeke zi tënë ni na li ti lo pepe. Ngonzo na mbanda ti KOTA GBIA ayeke londo tongana menga ti wâ na tere ti zo ni. Adengo ba so kue a su tënë ni na ya ti mbeti so, lo yeke sara titene ati na ndö ti zo ni; lo yeke zi iri ti zo ni na ndö ti sese.

Ndia ti fani use ni 9:27

Ayeke nzoni mo dabe ti mo na azo ti kua ti mo Abraham, Isaac na Jacob. Mo baa ndo na ngangu li ti azo so pepe; mo baa ndo na sioni ye ti ala nga na siokpari ti ala pepe.

2 Timothée 3:13

Ti azo ti sioni na azo ti handango amba ti ala, fade ala yeke ngba ti sara sioni ti gue na ni; ala yeke handa azo si azo ayeke handa nga ala.

Ahebro 3:12

A-ita, le ti ala akpengba! Mbeni zo oko na popo ti ala asara sioni be wala adekite pepe, tongaso si lo zia lege ti Nzapa pepe, lo so lo yeke na fini.

Awafango-ngbanga 2:19

Me tongana wafango-ngbanga ni akui awe, ala kiri asara ye ti sioni mingi ahon ti akotara ti ala. Ala yeke gue na peko ti ambeni nzapa nde ti sara na ala, ala yeke kuku akpo li ti ala na sese na dawa ti anzapa ni. Ala zia asioni sarango ye ti ala wala ngangu li ti ala oko pepe.

1 Samuel 15:23

Kengo yanga ayeke sioni tongana bingo zeke; sarango ngangu li ayeke sioni tongana sambelango anzapa nde. So mo ke yanga ti KOTA GBIA so, lo nga lo ke mo awe. Mo yeke gbia mbeni pepe.”