Jérémie 15:6 - Mbeti ti Nzapa - Tënë so amu fini

⁶ So tënë ti yanga ti KOTA GBIA laa: Mo laa mo zia mbi, mo zia peko ti mo na mbi. Nilaa mbi yoro maboko ti mbi ti fâ mo. Mbi baa mawa ti mo alingbi awe.

Jérémie 15:6 Iomraidhean Croise

Ésaïe 1:4

Ae! Ala azo ti mara ti sarango siokpari, ala azo ti fango zo, ala *ahale ti sioni, ala amolenge ti kirikiri! Ala zia *KOTA GBIA awe; ala ke Nzapa ti Israel, lo so lo yeke nde si lo yeke nzoni kue; ala zia peko ti ala na lo.

Ésaïe 28:13

Ndani laa, fade KOTA GBIA ayeke tene na ala gi oko tënë so: “BA-BA, BABA, MA-MA, MAMA, GE, KÂ, GE, KÂ.” Tongaso, tongana ala yeke tambula, ala yeke ti na mbage ti peko ti ala si bio ti ala ayeke kungbi. Ala yeke ti na ya ti kuku si a yeke gbu ala.

Ésaïe 31:3

Azo ti Ezipte ayeke gi asenge zo, ala yeke anzapa pepe; ambarata ti ala ayeke gi anyama, ala yeke yingo pepe. Tongana *KOTA GBIA ayoro maboko ti lo, zo so aye fade ti mu maboko na mba ti lo ayeke pika gere ti lo ti ti, zo so ahunda fade titene mba ti lo amu maboko na lo, lo yeke ti; ala use kue ayeke kui.

Jérémie 1:16

Mbi yeke fâ ngbanga na li ti azo ti Juda ndali ti asioni sarango ye ti ala. Biani, ala zia mbi awe, ala zö dukani na anzapa nde, ala kuku ti voro ye so maboko ti ala wani asara.

Jérémie 13:14

Mbi yeke pika ala na tere ti tere titene ya ti ala akungbi, mbi yeke pika ababâ na amolenge na tere ti tere; so tënë ti yanga ti KOTA GBIA laa. Mbi yeke zia zo oko pepe, mbi yeke sara nzoni be na zo oko pepe, mbi yeke baa mawa ti zo oko pepe. Mbeni ye oko ayeke kanga lege na mbi pepe ti fâ ala kue ti hunzi ala.’ ”

Jérémie 2:13

Azo ti mbi asara asioni ye use: ala do mbi azia, mbi so mbi yeke li ti ngu so ayeke mu fini na zo; ala gue ti zi du ti ngu ndali ti ala wani; andaa du ti ngu ni akoro korongo; du ni alingbi ti bata ngu pepe.”

Jérémie 2:17

Ye so kue asi na mo gi ndali ti mo wani pepe? Ye ni asi ndali ti so mo zia KOTA GBIA, Nzapa ti mo na ndembe so lo yeke fa lege na mo.

Jérémie 2:19

Fade sioni ti mo wani ayeke kiri na li ti mo. Mo zia mbi awe; fade mo yeke wara ye ti peko ni! Tongaso si mo hinga, mo tene, ziango KOTA GBIA Nzapa ti mo, ayeke sioni si ayeke ye ti vundu mingi; tongana mo kpe mbeto ti mbi pepe, so ayeke ye ti vundu mingi!” So tënë ti yanga ti KOTA GBIA so ayeke na ndö ti dunia kue laa.

Jérémie 20:9

Tongana mbi tene: “Awe! Mbi yeke kiri ti di iri ti lo na yanga ti mbi pepe, mbi yeke kiri ti fa tënë na iri ti lo pepe”; na ya ti be ti mbi kâ, tënë ni ayeke gbi tongana wâ. Mbi yeke sara ngangu ti mingo ni, me mbi ha gbaa.

Jérémie 44:22

KOTA GBIA akanga be ti lo gbaa na asioni sarango ye ti ala nga na asioni sarango ye ti ala so zo alingbi ti baa na le ti lo fani use pepe so. Ndani laa kodro ti ala aga ndo ti gba ti atêne, aga ngonda si zo ayeke daa mbeni pepe, aga tapande ndali ti azo so ayeke deba amba ti ala; ye ni laa a yeke baa ni laso so.

Jérémie 6:11

Ti mbi, ngonzo ti mo, KOTA GBIA, asi be ti mbi singo. Mbi kanga be ti mbi gbaa. “Ayeke nzoni mo tuku ngonzo ni na ndö ti amolenge so ayeke na ndö ti alege; mo tuku ni na ndö ti bongbi ti amaseka. Akoli na awali, akangba na azo so ate gigi mingi, fade a yeke mu ala kue ti hon na ala.

Jérémie 6:12

Fade ada ti ala ayeke ga ti ambeni zo nde; ayaka ti ala na awali ti ala ayeke ga ti ambeni zo nde; so tënë ti yanga ti KOTA GBIA laa. Biani, fade mbi yeke yoro maboko ti mbi ti pika azo ti kodro ni,

Jérémie 6:19

Ala ma si, ala azo ti sese kue: mbi yeke sara titene kota kpale ati na ndö ti azo ni, so ayeke futa ti asioni gbungo-li ti ala laa. Ala dingi mê ti ala ti ma atënë ti mbi pepe; ala baa atënë ti ndia ti mbi tongana mbumbuse ye.

Jérémie 7:16

“Jérémie, mbi ye titene mo sambela ndali ti azo so pepe. Mo toto wala mo voro tere ti mo na mbi ndali ti ala pepe; mo ngba ti sambela mbi ndali ti ala pepe, ngbanga ti so fade mbi yeke ma mo pepe.

Jérémie 7:24

Me ala ke ti ma tënë ni; ala dingi mê ti ala kete pepe ti ma ni; ala sara gi ye so sioni be ti ala afa. Titene ala baa ndo na mbage ti mbi, ala zia gi peko ti ala na mbi.

Jérémie 8:5

Biani, azo ti Jérusalem agirisa lege awe; ngbanga ti nyen si ala ngba ngbango na ndö ti sioni lege so ala mu ni so? Ala gbu tënë ti anzapa ti mvene ti ala ni ngangu; ala ke ti kiri na mbi.

Jérémie 8:9

So ye ti kamene ti nyen na azo ti ndara! Li ti ala aga kirikiri awe; ala ti na ya ti gbanda ti ala wani. So ala baa tënë ti KOTA GBIA tongana buba ye na le ti ala so, ndara ti nyen laa ala yeke na ni?

Ezekiel 14:9

“Tongana mbeni wayanga-Nzapa azia lege si azo ahanda lo si lo kiri tënë lo wani, mbi KOTA GBIA laa, mbi handa wayanga-Nzapa so. Mbi yeke yoro maboko ti mbi ti pika lo si mbi yeke zi lo na popo ti azo ti Israel, azo ti mbi.

Ezekiel 25:7

Ndali ni, fade mbi yeke yoro maboko ti pika ala, mbi yeke zia ala na maboko ti amara nde ti nzi aye ti ala kue, mbi yeke zi ala na popo ti azo, mbi yeke buba kodro ti ala biani biani si kodro ni akiri ti ngba pepe. Tongaso, fade ala yeke hinga atene, mbi laa mbi yeke KOTA GBIA.”

Ezekiel 35:3

Mo tene na ala, mo tene: Tënë so Kota Gbia NZAPA atene ayeke so: Mbi yeke ga na tere ti ala! Mbi yeke yoro maboko ti mbi ti pika mo, hoto ti Seir; mbi yeke sara si mo ga benyama biani biani.

Osée 11:7

Azo ti mbi aleke be ti ala ti ke mbi biani biani; a iri ala titene ala londo na nduzu, me zo oko na popo ti ala alondo pepe.

Osée 13:14

Mbi KOTA GBIA, azo tongaso, mbi lingbi ti gboto ala na ndo ti akuâ ti sigigi na ala? Mbi lingbi ti soo ala na kuâ? Kuâ, ye so mo yeke fâ azo na ni so ayeke na ndo wa? Ndo ti akuâ, ngangu so mo yeke hunzi azo na ni so ayeke na ndo wa? Fade mbi yeke baa mawa ti Efraim oko pepe.

Osée 4:16

Biani, Israel asara ngangu li tongana mama ti bagara so ake ti tambula. Fadeso, KOTA GBIA alingbi ti sara na azo ti lo tongana ti akete taba so a zia ala na ndo ti tengo pere?

Sofonii 1:4

“Fade mbi yeke yoro maboko ti mbi ti pika azo ti Juda nga na azo so kue alango na Jérusalem. Mbi yeke sara si aye so azo ayeke voro na *Baal angba na ya ti kodro ni oko pepe; ataa awayango-sandaga so ayeke sara kua na lo, azo ayeke girisa iri ti ala.

Zakarii 7:11

Me azo ni ake ti ma tënë ni; ala sara ngangu li, ala kanga mê ti ala titene ala ma ndo pepe.