Jérémie 14:2 - Mbeti ti Nzapa - Tënë so amu fini

² “Kodro ti Juda ayeke na mua, agbata ti lo ayeke ti tingo. Azo ni ayeke sara mua, ala duti na sese. Demango tere ti Jérusalem ague ngbii asi na yayu.

Jérémie 14:2 Iomraidhean Croise

Mbeti ti Job 34:28

Ala pusu azo ti mawa ti dekongo na Nzapa. Andaa lo ma dekongo ti azo so amba ti ala asara ngangu na ala.

Abia (Psaumes) 144:14

Ayeke nzoni abagara ti e adu gbani gbani, ala kui pepe si ala du amolenge na kuâ ni pepe! Ayeke nzoni zo akiri ama dekongo ti mbeto pepe na ndö ti abalabala ti e!

Sigingo 2:24

Nzapa ama demango tere ti ala si lo dabe ti lo na tënë ti mbuki ti lo na Abraham, na Isaac nga na Jacob.

Ésaïe 15:5

Mbi dema na vundu ndali ti Moab. Azo ni akpe ngbii asi na Soar nga na Eglat-Selisia. Ala yeke toto si ala yeke ma hoto ti Luhit. Na lege ti guengo na Horonaim, ala yeke dekongo, atene: “Ye kue abuba awe!”

Ésaïe 24:11

Na ndö ti alege, azo ayeke toto tere ti ala, ngbanga ti so vin atia, ngia kue ahunzi awe, nzerengo tere ahon na ya ti kodro ni.

Ésaïe 24:4

Sese ayeke na mua, abuba kue. Dunia ati biani biani si ayeke buba. Le ti nduzu na sese ati legeoko.

Ésaïe 24:7

Fini vin ayeke na mua, keke ti *vinye ahole kue; azo so kue be ti ala ayeke lani na ngia, ala yeke dema fadeso.

Ésaïe 3:26

Na ya ti gbata ni kue, gi demango tere na totongo akuâ. Gbata ni aga tongana wali so aye ti lo kue agirisa si lo yeke duti na sese.

Ésaïe 33:9

Sese ni ayeke na mua, ayeke hole holengo. Agbako ti Liban ahole kue si kamene ahon ndö ti ala. Lando ti Saron ahole kasakasa. Ahoto ti Bashan na ti Karmel, akeke ayeke daa mbeni pepe.

Ésaïe 5:7

Andaa yaka ti vinye ti *KOTA GBIA, lo so lo yeke na ndö ti dunia kue, ayeke azo ti Israel. Azo ti mara ti Juda laa ayeke ye so lo lu si lo ye ni mingi. Lo ku fade titene azo ni afâ ngbanga na legeni, me ala fâ ngbanga ti mbana kirikiri. Lo ku fade titene azo ni asara ye alingbi na ndia, me gi dekongo ti azo ti mawa laa mo yeke ma.

Jérémie 11:11

“Ndani laa, tënë so KOTA GBIA atene ayeke so: ‘Fade mbi yeke sara si mbeni kota kpale aga na ndö ti ala; kota kpale so ala lingbi ti sigigi na ya ni pepe. Ala yeke dekongo ti iri mbi, me mbi yeke ma ala pepe.

Jérémie 12:11

Biani, ala sara si yaka ni aga ngonda. Na le ti mbi, yaka ni ayeke na mua; kodro ni kue aga ngonda, me tënë ni agbu be ti zo oko pepe.”

Jérémie 12:4

Kodro ni ayeke ngba na mua ngbii asi lawa? Apere ti ayaka kue ayeke ngba ti hole ngbii asi lawa? Ndali ti sioni ti azo ti kodro ni, anyama na andeke ayeke kui kue. Azo ni ayeke tene: “Jérémie ayeke hunzi kozo ti e.”

Jérémie 18:22

Ndali ti so ala sara kuku ti gbu na mbi si ala honde mbeni kamba titene agbu gere ti mbi, ayeke nzoni dekongo ti ala alondo na ya ti ada ti ala asigigi, na ndembe so mo yeke tokua awato ti ga na ndö ti ala gi hio tongaso.

Jérémie 4:28

Ndani laa, fade sese ayeke mua si le ti nduzu, yongoro na nduzu kâ ayeke vuko. Mbi tene tënë so awe, awe! Be ti mbi ayeke so daa pepe; mbi yeke kiri na ndö ni mbeni pepe.”

Jérémie 46:12

Amara nde ama tënë ti ye ti kamene so asi na mo, ngbanga ti so demango tere ti mo amu ndo kue. Ngangu zo ti bira ati na ndö ti mbeni ngangu zo ti bira; ala use kue ati legeoko gburrr.

Jérémie 8:21

Kota ka so azo ti mbi awara azia nga ka na be ti mbi. Vundu agbu mbi mingi si be ti mbi afun kue.

Abia ti demango tere 2:8

KOTA GBIA aleke na be ti lo ti kungbi kota gbagba ti bira ti azo ti Sion kue na sese. Lo gboto kamba na sese ti haka na ni; maboko ti lo ayeke ngba daa ngbii lo kungbi ni kue na sese si. Lo sara si ngangu gbagba ni na senge gbagba ni ati kue awe; so mawa! Ala use kue abuba gi legeoko.

Abia ti demango tere 2:9

Ayanga ti gbagba ti gbata ti Sion ati, alango na gbe ti akungbingo gbagba ni. Angbongboro wen ti yanga ti gbagba ni so, lo de ya ni nduru nduru. A gbu gbia ti gbata ni na agbenyogbia ti lo si a gue na ala na popo ti amara nde. Tënë ti yanga ti Nzapa ayeke daa mbeni pepe; ataa azo ti tenengo peko ti yanga ti lo kue, lo kiri lo tene tënë na ala na lege ti mbeni ye tongana bango-li pepe.

Abia ti demango tere 5:10

E yeke nyon gi pupu si e duti na ni. Nilaa, poro ti tere ti e ahole holengo mo baa mo tene, e hon na ya ti wâ ti fur.

Osée 4:3

Ndani laa fade ndo ayeke hole kue na ya ti kodro ni, azo ti kodro ni kue ayeke nge ngengo, ala, na anyama ti ngonda na andeke ti nduzu; ataa asusu ti kota ngu-ingo ayeke hunzi kue.

Joël 1:10

Ayaka abuba kue awe, sese ayeke na mawa. *Ble abuba kue awe, fini vin ayeke daa mbeni pepe, nzoni mafuta ahunzi awe.

Joël 1:11

Azo ti fango yaka, be ti ala awoko kue awe; azo ti fango yaka ti vinye, ala dema tere, ngbanga ti so ble na *orze atia awe, akobe ti yaka abuba awe.

Joël 1:14

Ala mu yanga titene azo azia mbeni lango nde ti ke kobe ti sambela Nzapa; ala iri azo ti bongbi ti voro Nzapa; ala bongbi *akangba na azo ti kodro kue na ya ti da ti *KOTA GBIA, Nzapa ti ala, ala dekongo na lo.

Joël 2:6

Na singo ti ala, kota mbeto ayeke gbu azo; le ti ala kue asanze na mbeto.

Aggée 1:11

Mbi sara si buru aga na ya ti kodro ni: ndo ahole na li ti ahoto, na ya ti ayaka ti *ble, ayaka ti *vinye, ayaka ti olive nga na tanga ti ayaka ti kobe kue. Azo na anyama abaa pasi mingi ndali ti buru ni si peko ti akua ti maboko ti ala kue angba senge.”

Zakarii 7:13

Nilaa KOTA GBIA so ayeke na ndö ti dunia kue, atene: “So lani mbi iri ala si ala ke ti ma so, mbi nga, ala iri mbi si mbi ke ti ma ala.

1 Samuel 5:12

Azo so akui pepe so, Nzapa azia kobela ti sukungo ye na tere ti ala, ala yeke dekongo na mawa si dekongo ni ague ngbii asi na yayu.

1 Samuel 9:16

“Kekereke gi na oko ngbonga so, fade mbi yeke tokua na mo mbeni zo ti mara ti Benjamin titene mo tuku mafuta na li ti lo si lo ga makonzi ti azo ti Israel, azo ti mbi. Lo laa lo yeke zi azo ti mbi na maboko ti azo ti Filistii. Biani, mbi baa mawa ti azo ti mbi si mbi ma toto ti ala.”