Jérémie 10:10 - Mbeti ti Nzapa - Tënë so amu fini

¹⁰ Me KOTA GBIA ayeke taa Nzapa, lo yeke Nzapa so ayeke na fini, lo yeke gbia kpu na kpu. Tongana lo sara ngonzo, sese ayeke yingi; tongana le ti lo abe na ngonzo, amara nde alingbi ti kanga be ti ala pepe.

Jérémie 10:10 Iomraidhean Croise

Tongo nda ti aye 21:33

Abraham alu keke ti tamaris na kodro ti Bersheba, lo sambela Nzapa so ayeke kpu na kpu si lo iri lo na iri ti KOTA GBIA.

1 Agbia 18:39

So azo ti Israel abaa ye ni so, ala ti akpo li ti ala na sese si ala tene: “KOTA GBIA laa ayeke taa Nzapa! KOTA GBIA ayeke taa Nzapa!”

1 Agbia 8:60

Tongaso si fade amara ti ndö ti sese kue ahinga atene, KOTA GBIA oko laa ayeke Nzapa, mbeni Nzapa nde ayeke daa pepe.

1 Mbai 29:11

KOTA GBIA, mo yeke kota, mo yeke ngangu, mo lingbi na gonda, iri ti mo awu mingi, mo yeke gbia! Biani, aye so kue ayeke na yayu nga na ndö ti sese ayeke ti mo. KOTA GBIA, lengo-gbia ayeke ti mo si mo yeke na li ti aye kue.

2 Mbai 15:3

Aninga mingi so azo ti Israel ayeke na taa Nzapa pepe, ala yeke na wayango-sandaga pepe ti fa ye na ala, *Ndia ayeke daa pepe.

Mbeti ti Job 9:6

Lo yeke sara si gunda ti sese ayingi, agere ti sese ni ayeke do dongo.

Abia (Psaumes) 10:16

KOTA GBIA ayeke gbia kpu na kpu; amara nde angba na ya ti kodro ti lo mbeni pepe.

Abia (Psaumes) 100:3

Ayeke nzoni ala hinga atene, KOTA GBIA ayeke Nzapa. Lo laa lo sara e si e yeke azo ti lo. E yeke azo ti lo, e yeke tongana ataba ti lo so lo yeke bata ala.

Abia (Psaumes) 100:5

Biani, KOTA GBIA ayeke nzoni, nzoni be ti lo angba kpu na kpu; lo ngba ti sara ye alingbi na tënë ti yanga ti lo ngu na ngu.

Abia (Psaumes) 104:32

Lo baa sese si sese ado; lo ndu ahoto, guru ti wâ asigigi daa.

Abia (Psaumes) 114:7

Mo sese, do na gbe ti Kota Gbia, do na gbe ti Nzapa ti Jacob.

Abia (Psaumes) 145:13

Lengo-gbia ti mo ayeke ngba lakue lakue, komandema ti mo ayeke na ndö ti azo ti angoi kue. Nzapa ayeke sara ye alingbi na atënë ti yanga ti lo kue, aye so kue lo yeke sara afa so lo yeke sara nzoni be.

Abia (Psaumes) 146:6

KOTA GBIA asara yayu na sese, kota ngu-ingo na aye so kue ayeke na ya ni; lo yeke bata tënë ti yanga ti lo kpu na kpu.

Abia (Psaumes) 18:7

Na ya ti ye ti ngangu so asi na mbi, mbi iri KOTA GBIA titene lo mu na mbi maboko, mbi dekongo na Nzapa ti mbi. Kâ na ya ti kota da ti lo, lo ma go ti mbi; so mbi dekongo na lo, dekongo ni asi na mê ti lo.

Abia (Psaumes) 29:10

KOTA GBIA aduti gbia na ndö ti ngu so asuku amu ndo kue; KOTA GBIA aduti gbia kpu na kpu.

Abia (Psaumes) 31:5

Fade mo yeke sara si mbi sigigi na ya ti gbanda so azo aleke ti gbu na mbi. Biani, mo laa mo yeke ngangu gbagba ti mbi.

Abia (Psaumes) 42:2

Tongana ti so tagba ayeke gi ngu so ayeke sua titene lo nyon, mbi nga, mbi yeke gi Nzapa ti mbi legeoko tongaso.

Abia (Psaumes) 68:11

Na ndo so laa azo ti mo asara kodro daa; mo Nzapa so mo yeke nzoni mingi laa, mo leke ni ndali ti azo ti mawa.

Abia (Psaumes) 68:8

Nzapa, lani mo hon na dawa ti azo ti mo, lani mo tambula ti gue na benyama. Luti kete

Abia (Psaumes) 74:12

Nzapa, mo yeke gbia ti mbi ngbene ye giriri; mo laa mo zi azo ti kodro so na ya ti pasi.

Abia (Psaumes) 76:7

Nzapa ti Jacob, tongana mo suku na ala, azo ti kpengo na mbarata nga na ambarata ni aluti kpoo.

Abia (Psaumes) 76:8

Mo laa mo yeke zia kota mbeto na be ti zo! Tongana ngonzo ti mo alondo, zo wa laa alingbi ti luti na le ti mo, zo wa?

Abia (Psaumes) 77:18

Mbinda atuku gba ti ngu. Na le ti nduzu, bekpa atoto si ale ti kokora ti mo ahon na ndo kue.

Abia (Psaumes) 84:2

*KOTA GBIA, mo so mo yeke na ndö ti dunia kue, mbi ye tënë ti da ti mo mingi!

Abia (Psaumes) 9:8

Me KOTA GBIA aduti na ndö ti mbata ti lo ti gbia kpu na kpu. Lo sara si mbata ti lo ti gbia akpengba si lo duti ti fâ ngbanga.

Abia (Psaumes) 90:11

Zo wa laa alingbi ti hinga ngangu ti ngonzo ti mo? Zo so akpe mbeto ti mo laa ahinga ngonzo ti mo nzoni mingi!

Abia (Psaumes) 90:2

Kozoni si ahoto abaa gigi, kozoni si mo sara sese na dunia, mo yeke Nzapa ngbene ye kpu na kpu, lakue lakue!

Abia (Psaumes) 93:2

KOTA GBIA, ngbene ye giriri, a zia mbata ti mo ti gbia aluti ngangu, mo yeke daa ngu na ngu.

Abia (Psaumes) 97:4

Awâ ti bekpa ti lo aza na ndö ti dunia kue, azo ti sese abaa ni si tere ti ala ado.

Ésaïe 37:17

KOTA GBIA, dingi mê ti mo, mo ma si! KOTA GBIA, zi le ti mo, mo baa ye si! Mo ma atënë so Senakerib atokua ni ti zonga Nzapa so ayeke na fini so!

Ésaïe 37:4

Gbia ti Asirii atokua makonzi ti aturugu ti lo ti zonga Nzapa so ayeke na fini. E hinga pepe, wala KOTA GBIA, Nzapa ti mo ama tënë ti zonga ni si lo pika lo ndali ti asioni tënë so lo tene so! Ti mo Ésaïe, sambela Nzapa ndali ti tanga ti azo so angba na fini so.’ ”

Ésaïe 40:15

Na le ti lo, amara nde ayeke tongana kete kete ngu so alondo na ya ti tawa si ati! Ala yeke tongana le ti fuku ti sese so a zia na ndö ti kilo. Azo so ayeke na yongoro ndo ayeke tongana kete le ti fuku ti sese so ane pepe.

Ésaïe 40:28

Mo hinga pepe? Mo ma tënë ni pepe? KOTA GBIA ayeke Nzapa so angba lakue lakue; lo laa lo sara sese, alondo na mbeni yanga ni asi na mbeni yanga ni. Ngangu atia ti lo laoko pepe, lo woko laoko pepe. Hingango ye ti lo, zo oko alingbi ti gi nda ni pepe.

Ésaïe 57:15

Nzapa so ayeke na nduzu mingi, yongoro kâ, lo so ndo ti lo ayeke kpu na kpu, lo so iri ti lo ayeke nde si ayeke nzoni kue, tënë so lo tene ayeke so: “Mbi Nzapa so mbi yeke nde si mbi yeke nzoni kue, mbi yeke na nduzu mingi. Me mbi yeke na azo so a nika ala awe nga na azo so asara tere ti ala kete. Mbi yeke mu ngangu na be ti azo so asara tere ti ala kete; mbi yeke kiri fini na azo so a nika ala awe.

Ésaïe 65:16

Na ya ti kodro, zo so aye ti sara tufa na ndö ti mbeni zo, lo yeke sara ni na iri ti Nzapa so ayeke bata tënë ti yanga ti lo. Zo so aye ti deba yanga ti lo, lo yeke deba yanga ti lo ni na iri ti Nzapa so ayeke bata tënë ti yanga ti lo.” *KOTA GBIA atene: “Aye ti vundu so ahon awe, fade azo ayeke girisa ni; aye ti vundu ni ayeke hon yongoro na le ti mbi.

Jérémie 23:36

Me alingbi ala kiri atene pepe: ‘Nengo kungba so KOTA GBIA azia na ndö ti zo tongaso laa’. Tënë ti KOTA GBIA alingbi ti duti mbeni nengo kungba na ndö ti zo? Oko pepe! Me tongana ala tene tënë tongaso, andaa ala yeke ba ya ti tënë ti Nzapa so ayeke na fini, KOTA GBIA so ayeke na ndö ti dunia kue, Nzapa ti e.

Jérémie 4:2

Tongana mo deba yanga ti mo na lege ti taa-tënë nga na lege ti tënë so ayeke na legeni si ayeke mbirimbiri, mo tene: ‘KOTA GBIA ayeke na fini’, fade amara nde ayeke sara tufa na ndö ti ala wani na lege ti lo si ala yeke pika kate ti ala ndali ni.

Jérémie 4:24

Mbi baa ahoto: ala yeke yingi si akete hoto kue ayeke do.

Jérémie 50:46

Gi so azo ama tënë ti mungo Babilone awe, sese ayingi, azo ayeke ma dekongo ni na popo ti amara nde.

Jérémie 51:29

Sese ayingi; sese ni ado na mbeto na ndembe so ye so KOTA GBIA aleke na be ti lo ti sara na Babilone, ye ni asi alingbi na ni: lo sara si kodro ni aga ngonda, zo ayeke daa mbeni pepe.

Daniel 4:3

Nilaa mbi mu yanga titene a iri azo ti nganga so kue ayeke na Babilone, aga na ala na le ti mbi titene ala fa na mbi nda ti bango-li ni.

Daniel 4:34

Ndani laa, fadeso mbi Nabukodonosor, mbi sepela, mbi ya iri si mbi gonda gbia so ayeke na yayu! Aye so kue lo yeke sara ayeke na legeni; asarango ye ti lo kue ayeke mbirimbiri. Lo yeke na ngangu ti sara si azo ti baba aga akete zo.”

Daniel 6:26

Na pekoni gbia Darius asara mbeti si lo tokua na azo nde nde kue, azo ti amara nde nde kue na azo ti ayanga ti kodro nde nde kue so asara kodro na ndö ti sese kue; lo tene: “Ayeke nzoni siriri asi ala singo!

Daniel 6:27

“Mbi mu yanga na ala kue, mbi tene: Na ya ti kodro so kue ayeke na gbe ti komandema ti mbi, alingbi azo kue akpe mbeto ti Nzapa ti Daniel si ane lo. Biani, lo yeke Nzapa so ayeke na fini, lo ngba lakue lakue. Lengo-gbia ti lo ayeke ngba kpu na kpu, fade ngoi ti lo ti duti gbia ayeke hunzi laoko pepe.

Daniel 7:14

A mu na lo ngangu ti sara komandema, a mu na lo gonda si a mu lo gbia. Tongaso amara nde nde na azo ti ayanga ti kodro nde nde kue asara kua na lo. Ngangu ti lo ti sara komandema angba lakue lakue, fade ayeke hunzi pepe. Mbeni ye ti buba lengo-gbia ti lo ayeke daa laoko pepe.

Joël 2:11

Na dawa ti aturugu ti lo, KOTA GBIA asara si azo ama go ti lo. Aturugu so ayeke ma yanga ti lo ayeke gbani gbani si ala yeke na ngangu. Biani, lango ti KOTA GBIA ayeke kota lango mingi, lango so ayeke zia kota mbeto na be ti zo. Zo wa laa alingbi ti kanga be ti lo na ni, zo wa?

Mishe 1:4

Ahoto aga tongana potopoto na gbe ti gere ti lo, apopo-hoto ayeke suru si aga tongana puru ti wotoro na le ti wâ, wala tongana ngu so atuku na ndö ti hoto si ayeke zu na gbeni.

Nahum 1:5

Akota hoto ayeke yingi na dawa ti lo si akete hoto aga tongana ngu. Na dawa ti lo, sese ayingi si dunia na azo ni kue ado.

Nahum 1:6

Tongana lo sara ngonzo, zo wa laa ayeke luti na le ti lo, zo wa? Tongana ngonzo ti lo alondo tongana wâ, zo wa laa ayeke ngba na fini, zo wa? Ngonzo ti lo ayeke gbi ye kue tongana ti so kota wâ ayeke gbi ye kue; ya ti akota têne ayeke suru na dawa ti lo.

Habakuk 3:10

Akota hoto abaa mo, ala yeke do na mbeto; kota ngu-Nzapa apika, amu ndo kue; kota ngu-ingo atoto, lo tuku *amapo ti lo kâ na nduzu.

Habakuk 3:6

Tongana lo luti, sese ayeke yingi. Tongana lo baa ndo, amara ayeke do na mbeto. Ahoto ti giriri, ya ni asungba, akete hoto ti giriri ayeke kungbi, ati na sese, akete hoto ni ayeke ando lege so lo yeke tambula daa.

Malashii 3:2

Zo wa laa alingbi ande ti kanga be ti lo na lango ti gango ti lo, zo wa? Zo wa laa alingbi ti ngba na nduzu na ndembe ti singo ti lo, zo wa? Biani, lo yeke tongana wâ ti matawa wala tongana mokpakpa ti zo ti sukulango bongo.

Matthieu 16:16

Simon Pierre akiri tënë: “Mo yeke *Mesii, Molenge ti Nzapa so ayeke na fini.”

Matthieu 26:63

Me Jésus azi yanga oko pepe. Kota wayango-sandaga atene na lo: “Mbi hunda na mo ti deba yanga ti mo, na iri ti Nzapa so ayeke na fini, mo tene na e: Mo yeke *Mesii, Molenge ti Nzapa?”

Jean 17:3

Fini so angba lakue lakue ayeke titene azo ahinga mo, mo so mo yeke oko taa Nzapa si ala hinga nga Jésus Christ, lo so mo tokua lo.

Awatokua 14:15

“Azo! Ala yeke sara ye so ngbanga ti nyen? E yeke gi azo tongana ala! E ga ge ti fa Nzoni Tënë titene ala zia lege ti abuba ye so ala yeke voro so, ala mu be ti ala na Nzapa so ayeke na fini, lo so asara yayu, na sese na kota ngu-ingo na aye so kue ayeke na ya ni.

Ndia ti fani use ni 32:4

Nzapa ayeke Kota Têne ti batango e. Aye so kue lo sara ayeke nzoni kue, lege ti sarango aye ti lo kue ayeke mbirimbiri. Lo yeke Nzapa so ayeke sara ye alingbi na tënë ti yanga ti lo, lo yeke sara ye ti kirikiri pepe, lo yeke lakue mbirimbiri, lo yeke fâ ngbanga na legeni.

Ndia ti fani use ni 5:26

Zo wa laa ama laoko go ti Nzapa so ayeke na fini, lo tene tënë na zo ni na ya ti wâ tongana ti e so si lo ngba na fini?

1 Tesalonike 1:9

Azo kue ayeke tene tënë ti yambango so ala yamba lani na e na ndembe so e si na ndo ti ala. Azo atene nga tënë ti ziango so ala zia lege ti anzapa nde ti kiri na mbage ti Nzapa titene ala sara kua na lo, lo so lo yeke na fini si lo yeke taa Nzapa.

1 Timothée 1:17

Ayeke nzoni azo ane Kota Gbia, ala gonda lo lakue lakue, lo yeke oko Nzapa, zo abaa lo pepe, lo yeke na fini lakue lakue, lo yeke Kota Gbia kpu na kpu! Amen.

1 Timothée 6:17

Mo mu yanga na azo ti mosoro ti dunia so titene ala pika kate ti ala pepe. Amosoro so ayeke ninga pepe, ala zia be ti ala na ndö ni pepe, me ala zia be ti ala na ndö ti Nzapa. Lo laa lo yeke mu na e anzoni ye ahon ndoni si e wara lege ti duti nzoni.

Ahebro 10:31

Titene zo ati na gbe ti ngbanga ti Nzapa so ayeke na fini, so ayeke ye ti ngangu mingi!

Josué 3:10

Na pekoni lo kiri lo tene: “Ye so ala yeke hinga atene, Nzapa so ayeke na fini ayeke na popo ti ala ayeke so: lo yeke tumba biani biani na dawa ti ala azo ti Kanaan, azo ti mara ti Het, ti Hivi, ti Perizi, ti Girgashi, ti Amori na azo ti mara ti Yebus.

1 Jean 5:20

E hinga so, Molenge ti Nzapa aga awe, lo mu na e lege ti hingango ndo si e hinga taa Nzapa. E na taa Nzapa, e ga oko na lege ti Molenge ti lo Jésus Christ. Lo laa lo yeke taa Nzapa, lo yeke fini so angba lakue lakue.

Aye so Nzapa afa 20:11

Na pekoni, mbi kiri mbi baa mbeni kota vuru mbata ti gbia. Mbi baa nga lo so ayeke duti na ndö ni so. Sese na yayu alondo na dawa ti lo, akpe ahon, a kiri a baa ala mbeni pepe.

Awafango-ngbanga 5:4

KOTA GBIA, so mo londo na kodro ti Edom, so mo ye ti zu na hoto ti Seir, sese ayingi, ngu alondo na ya ti ambinda atuku na sese, ngu-Nzapa alondo na yayu apika mingi.

1 Samuel 17:26

David ahunda azo so ayeke luti nduru na tere ti lo so, atene: “Zo so ayeke fâ zo ti Filistii so si ayeke zi kamene na le ti azo ti Israel, fade a yeke sara nyen na lo? Zo ti Filistii so ahinga Nzapa pepe so, lo yeke zo wa si lo yeke gi yanga ti aturugu ti Nzapa so ayeke na fini so?”

1 Samuel 17:36

Lege so mbi zo ti gbe ti mo, mbi fâ bamara, mbi fâ nga urse laa. Zo ti Filistii so ahinga Nzapa pepe so, fade mbi yeke sara na lo tongana ti so mbi sara na anyama use so, ngbanga ti so lo gi yanga ti aturugu ti Nzapa, Nzapa so ayeke na fini.”