Jérémie 1:5 - Mbeti ti Nzapa - Tënë so amu fini

⁵ “Kozo titene mbi sara mo na ya ti mama ti mo, mbi hinga mo. Kozo titene mo sigigi na ya ti mama ti mo, mbi zia mo nde ndali ti mbi. Mbi zia mo nde titene mo duti zo ti tenengo peko ti atënë ti yanga ti mbi na amara nde.”

Jérémie 1:5 Iomraidhean Croise

Abia (Psaumes) 139:15

Na ndembe so mo yeke sara mbi na hondengo ni si mo yeke tengbi aye ti tere ti mbi daa oko na oko yongoro na gbe ti sese kâ, abio ti mbi ahonde na le ti mo pepe.

Abia (Psaumes) 139:16

Ataa so tere ti mbi ade ti ga tere ti zo biani pepe, mo baa mbi awe. A su wungo ti alango ti mbi na ya ti mbeti ti mo, alango so mo diko ndali ti mbi, ataa so mbeni oko ade ti to nda ni pepe.

Sigingo 33:12

Moïse atene na KOTA GBIA: “KOTA GBIA, ma si! Mo wani laa mo tene na mbi, mo tene: ‘Mo mu azo so mo gue na ala’. Me mo fa na mbi zo so alingbi ti mu maboko na mbi pepe. Lani mo laa mo tene na mbi, mo tene: ‘Mbi hinga mo na iri ti mo’; mo tene nga: ‘Mbi yeke baa mo na nzoni le.’

Sigingo 33:17

KOTA GBIA atene na Moïse: “Ye so mo hunda so, fade mbi yeke sara ni, ngbanga ti so mbi baa mo na nzoni le si mbi hinga mo na iri ti mo.”

Ésaïe 44:2

*KOTA GBIA so asara mo, lo so lo leke mo gi so mo de na ya ti mama ti mo, lo so lo yeke mu maboko na mo, tënë so lo tene ayeke so: Jacob, zo ti kua ti mbi, sara mbeto pepe, mo Yeshurun so mbi soro mo.

Ésaïe 49:1

Ala so ayeke lango na yongoro ndo, ala ma mbi! Ala so ayeke na yongoro ndo, ala dingi mê ti ala, ala ma! Kozo titene a du mbi, *KOTA GBIA airi mbi; gi so mbi de na ya ti mama ti mbi, lo di iri ti mbi.

Ésaïe 49:5

Me fadeso, KOTA GBIA atene tënë awe, lo so mbi de na ya ti mama ti mbi si lo leke mbi titene mbi ga zo ti kua ti lo. Lo ye titene mbi mu *ahale ti Jacob, mbi ga na ala na mbage ti lo, mbi bongbi azo ti Israel na tere ti lo. Mbi ne mingi na le ti KOTA GBIA, Nzapa ti mbi ayeke ngangu ti mbi.

Jérémie 1:10

Hinga, mo tene, laso mbi mu na mo kua ti sara ndali ti amara nga ndali ti akodro-gbia: mo yeke gboto aye si mo yeke de aye na sese; mo yeke buba aye si mo yeke kungbi aye na sese; mo yeke leke aye na nduzu si mo yeke lu aye.”

Jérémie 1:4

Tënë ti KOTA GBIA asi na mbi, atene:

Jérémie 20:15

Deba aga na ndö ti zo so amu tënë ni si atene na babâ ti mbi, atene: “A du molenge-koli na mo!” Zo ni laa asara si be ti babâ ti mbi asi singo na ngia!

Jérémie 25:13

Akpale so kue mbi tene tënë ni si a su tënë ni na ya ti buku so, fade mbi yeke sara si akpale ni ati na ndö ti kodro so. Jérémie atene tënë ni na peko ti yanga ti mbi na tere ti amara so kue awe.

Jérémie 36:2

“Mu mbeni *rulo so a sara na poro ti nyama, mo su na le ni atënë so kue mbi tene na mo na tere ti akodro ti Israel, ti Juda nga na ti amara kue, ti londo na ngoi ti Yosias ngbii asi laso.

Jérémie 50:34

Me wagbungo-koko ti ala ayeke ngangu; iri ti lo ayeke ‘KOTA GBIA so ayeke na ndö ti dunia kue’. Fade lo yeke gbu koko ti ala ngangu ti sara si sese ni awara siriri si azo ti Babilone ado na mbeto.”

Nzoni Tënë so Luc asu na mbeti 1:15

Biani, fade lo yeke ga kota na le ti Kota Gbia; lo yeke nyon vin wala samba pepe; Yingo-Vuru ayeke si lo gi na ya ti mama ti lo.

Nzoni Tënë so Luc asu na mbeti 1:41

So Élisabeth ama barango ndo ti Marie, molenge so ayeke na ya ti lo ado tere ti lo si Yingo-Vuru asi Élisabeth.

Nzoni Tënë so Luc asu na mbeti 1:76

Me ti mo, kete molenge, fade azo ayeke iri mo wayanga-Nzapa ti lo so lo yeke na yayu kâ na ndö ti aye kue, ngbanga ti so fade mo yeke tambula na dawa ti Kota Gbia ti leke lege ti lo.

Jean 10:36

Me ti mbi, Babâ ti mbi azia mbi nde si lo tokua mbi na ndö ti dunia so. Ngbanga ti nyen laa ala tene: ‘Mo yeke zonga Nzapa!’ Ngbanga ti so mbi tene: ‘Mbi yeke Molenge ti Nzapa’ so?

Rome 1:1

Mbi Paul, zo ti kua ti Jésus Christ, mbi yeke *watokua so Nzapa airi mbi si lo zia mbi nde titene mbi fa Nzoni Tënë ti lo na azo.

Rome 8:29

Biani, azo so Nzapa asoro ala kozoni, lo leke na be ti lo kozoni ti sara si ala ga tongana Molenge ti lo, tongaso si Molenge ni aga yaya ti a-ita mingi.

1 Korente 8:3

Me tongana zo aye Nzapa, Nzapa ahinga lo awe.

Efeze 1:22

Nzapa azia ye kue na gbe ti Christ; lo so lo yeke na ndö ti aye kue, lo zia lo kota makonzi na li ti *Eglize.