Filipe 2:13 - Mbeti ti Nzapa - Tënë so amu fini

¹³ Biani, Nzapa laa ayeke zia nzara ti sarango ye na be ti ala si lo yeke mu na ala lege ti sarango ni alingbi na ye so lo leke na be ti lo.

Filipe 2:13 Iomraidhean Croise

1 Agbia 8:58

Ayeke nzoni lo sara si be ti e angba na mbage ti lo, tongaso si e sara ye na lege so be ti lo aye, e sara ye alingbi na atënë ti ndia ti lo, ambela ti lo nga na andia so lo mu ando na akotara ti e.

2 Mbai 30:12

Na sese ti Juda nga, Nzapa asara si be ti azo ni aga oko, ala yeda ti ma yanga so gbia na amakonzi ti lo amu, alingbi na tënë ti KOTA GBIA.

Esdras 1:1

Na kozo ngu so Sirus ayeke gbia ti Perse, *KOTA GBIA aye ti sara si tënë ti lo so lo zia ando na yanga ti Jérémie ti tene, aga taa-tënë. Nilaa KOTA GBIA azia na be ti Sirus ti mu yanga titene a to mbela na tënë ti Sirus na ya ti kodro ti lo kue; a su nga atënë ni na mbeti, atene:

Esdras 1:5

Tongaso azo so ayeke na li ti asewa ti mara ti Juda na ti Benjamin, awayango-sandaga na azo ti mara ti Lévi alondo ti gue ti leke kota da ti KOTA GBIA so ayeke na Jérusalem. Ala na azo so kue Nzapa azia na be ti ala nzara ti sarango da ni laa ague.

Esdras 7:27

Esdras atene: “Mbi mu singila na *KOTA GBIA, Nzapa ti akotara ti e! Lo laa lo zia na be ti gbia titene lo ne kota da ti Nzapa ti Jérusalem.

Néhémie 2:4

Gbia atene na mbi: “Mo ye nyen?” Mbi sambela Nzapa ti yayu.

Mbeti ti Job 33:29

Baa, ye so kue Nzapa ayeke sara ndali ti zo laa; lo yeke sara ni fani mingi.

Abia (Psaumes) 110:3

Na lango so mo bongbi aturugu ti mo ti gue na bira, azo ti mo, na be ti ala wani, amu peko ti mo. Na ndö ti ahoto so ayeke nde si ayeke nzoni kue, amaseka ayeke ga na mbage ti mo; ala kpa ngu ti pere ti kota ndaperere.

Abia (Psaumes) 119:36

Sara si mbi gi ti wara ye gi ndali ti mbi wani pepe, me mbi gi lege ti sara aye so mo hunda.

Abia (Psaumes) 141:4

Sara si be ti mbi ague na lege ti sioni pepe, sara si mbi sara aye ti sioni pepe legeoko na azo ti sarango sioni. Ayeke nzoni anzerengo kobe ti ala andu yanga ti mbi pepe.

Amato 21:1

Tënë ti be ti gbia ayeke na ya ti maboko ti KOTA GBIA tongana kete ngu so ayeke sua. KOTA GBIA ayeke hon na atënë ti be ni na ndo so kue be ti lo wani aye.

Ésaïe 26:12

KOTA GBIA, mo yeke mu na e siriri, aye so kue e yeke sara, mo laa mo yeke sara ni ndali ti e.

Jérémie 31:33

So tënë ti yanga ti KOTA GBIA laa: Na peko ti alango ni so, mbuki so mbi na azo ti Israel e yeke sara ni ayeke so: mbi yeke su andia ti mbi taa na ya ti be ti ala, mbi yeke su ni na ndö ti be ti ala; mbi yeke duti Nzapa ti ala si ala yeke duti azo ti mbi.

Jérémie 32:38

Ala yeke kiri ti duti azo ti mbi si mbi yeke duti Nzapa ti ala.

Nzoni Tënë so Luc asu na mbeti 12:32

“Ala azo so ayeke tongana bongbi ti akete taba, ala sara mbeto pepe, ngbanga ti so a nzere na Babâ ti ala ti mu Kodro-gbia ni na ala!

Nzoni Tënë so Luc asu na mbeti 2:14

“E gonda Nzapa so ayeke na yayu kâ na ndö ti aye kue, siriri na ndö ti sese na popo ti azo so lo ye ala!”

Jean 3:27

Jean akiri tënë na ala: “Tongana Nzapa amu ye na zo pepe, zo ni alingbi ti wara ni pepe.

Jean 6:45

Awayanga-Nzapa asu na mbeti, atene: ‘Fade Nzapa ayeke fa ye na azo kue.’ Zo so ama tënë ti Babâ si lo yeda ti manda ye so Babâ afa na lo, zo tongaso laa ayeke ga na mbi;

Jean 6:65

Lo kiri lo tene: “Ndani laa, mbi tene na ala, tongana Babâ amu lege na mbeni zo pepe, zo ni alingbi ti ga na mbi pepe.”

Awatokua 11:21

Ngangu ti Kota Gbia ayeke na ala, nilaa azo mingi ama na be si ala kiri na mbage ti Kota Gbia.

Rome 12:3

Nzapa asara nzoni be na mbi. Ndani laa mbi tene na ala oko oko kue, mbi tene: ala baa tere ti ala wani tongana akota zo pepe; me ala baa tere ti ala tongana asenge zo, alingbi na mabe so Nzapa amu na zo oko oko.

Rome 9:11

Andaa ye so Nzapa aleke na be ti lo ayeke ti soro zo: lo yeke soro zo ndali ti sarango ye ti lo pepe, me tongana ti so be ti lo aye; lo laa lo yeke iri zo. Titene Nzapa abata tënë ti yanga ti lo, lo tene na Rébecca: “Fade kozo molenge ti mo ayeke sara kua na gbe ti ngambe ni.” Nzapa atene tënë ni kozo titene Rébecca adu amolenge ni, andaa ala de ti sara nzoni wala sioni pepe.

Rome 9:16

Nzapa ayeke sara nzoni be na zo ndali ti ye so zo ni wani aye pepe wala ndali ti ngangu so zo ni ayeke sara pepe, me Nzapa ayeke sara nzoni be na zo ndali ti so lo baa mawa ti lo.

1 Korente 12:6

Akua ayeke nde nde, me gi oko Nzapa so laa ayeke mu ngangu na azo kue ti sara akua ni kue.

1 Korente 15:10

Me ndali ti nzoni be ti Nzapa, mbi ga zo so ala yeke baa lo laso so; nzoni be so Nzapa asara na mbi, peko ni angba senge pepe. Mbi sara kua ahon atanga ti awatokua kue, andaa mbi laa mbi sara kua ni pepe, me Nzapa so ayeke na mbi laa asara kua ni na lege ti nzoni be ti lo.

2 Korente 3:5

E baa tere ti e pepe, e tene, e lingbi ti sara kua ni na ngangu ti e wani, me e lingbi ti sara kua ni na ngangu so alondo na Nzapa.

Efeze 1:11

Na lege ti gango so e ga oko na Christ, Nzapa asoro e kozoni titene e ga azo ti lo alingbi na ye so lo leke na be ti lo, lo sara ye so kue tongana ti so be ti lo aye.

Efeze 1:5

Nzapa aleke na be ti lo kozoni ti sara si e ga amolenge ti lo na lege ti Jésus Christ. Na lege ti nzoni be ti lo, ye so lo ye ti sara laa.

Efeze 1:9

Ye so lo leke na be ti lo si angba na hondengo ni, lo sara si e hinga ni: so ti tene, ye so lo leke kozoni na lege ti nzoni be ti lo ti sara ni na lege ti Christ.

Efeze 2:8

Biani, ndali ti nzoni be ti Nzapa si ala soo kuâ, na lege ti mabe, mbeni ye so ala sara titene ala soo kuâ ndali ni ayeke daa pepe. Songo kuâ ayeke nzoni ye so lo mu na ala senge senge.

2 Tesalonike 1:11

Ndani laa e yeke sambela lakue ndali ti ala titene Nzapa ti e asara si ala lingbi na iringo so lo iri ala. E hunda titene na lege ti ngangu ti lo, ala sara aye ti nzoni so kue ala yeke na nzara ti sarango ni si kua so ala yeke sara na lege ti mabe asi na ndani.

2 Timothée 1:9

Nzapa asoo e na kuâ, lo iri e ti ga azo so lo zia e nde ndali ti lo si e yeke nzoni kue. Mbeni ye ti nzoni so e sara titene lo soo e si lo iri e ndali ni ayeke daa pepe, me lo sara ni ndali ti so lo leke na be ti lo wani awe na lege ti nzoni be ti lo. Kozoni titene aye kue abaa gigi, Nzapa aleke na be ti lo ti sara nzoni be na e na lege ti Jésus Christ.

Ahebro 13:21

Ayeke nzoni Nzapa asara si ala ga azo so alingbi ti sara ye so kue ayeke nzoni nga na ye so be ti lo aye! Ayeke nzoni, na lege ti Jésus Christ, Nzapa asara si e sara ye so anzere na be ti lo! Gonda ayeke ti lo kpu na kpu! Amen.

1 Pierre 1:3

E gonda Nzapa, Babâ ti *Kota Gbia ti e Jésus Christ! Lo baa mawa ti e mingi si lo sara titene a kiri a du e mbeni na lege ti zingongo so lo zingo Jésus Christ na kuâ. Tongaso, e zia be ti e ti ku ye so ayeke sara titene zo aduti na fini.