Efeze 2:2 - Mbeti ti Nzapa - Tënë so amu fini

² Ala yeke sara ye ando tongana ti azo ti dunia so; ala yeke ma gi yanga ti makonzi ti asioni yingo so ayeke na popo ti nduzu na sese, yingo so laa ayeke sara kua na be ti azo so ake ti ma yanga ti Nzapa.

Efeze 2:2 Iomraidhean Croise

Mbeti ti Job 1:16

Tënë angba ngbango na yanga ti lo, mbeni watokua nde asi si lo tene: “Wâ ti bekpa alondo na yayu, aga ati na ndö ti ataba nga na azo ti kua ti mo. Wâ ni agbi ala kue. Gi mbi oko laa mbi ngba na fini si mbi ga ti tene tënë ni na mo.”

Mbeti ti Job 1:19

Mbeni ngangu pupu alondo na benyama aga apika da ni mbage na mbage kue. Da ni ati na ndö ti amolenge ni si ala kui. Gi mbi oko laa mbi ngba na fini si mbi ga ti tene tënë ni na mo.”

Mbeti ti Job 1:7

KOTA GBIA ahunda Satan, atene: “Mo londo na ndo wa?” Satan akiri tënë: “Mbi fono, mbi baa ndö ti sese si mbi ga so.”

Mbeti ti Job 31:7

Tongana mbi zia nzoni lege so lo suru, tongana be ti mbi amu peko ti ye so le ti mbi abaa na nzara ni, tongana maboko ti mbi andu mbeni ye ti sioni,

Abia (Psaumes) 17:14

KOTA GBIA, na maboko ti mo wani, ayeke nzoni mo tumba ala na popo ti azo, mo zi ala na ndö ti sese so! Ye so alingbi na ala na ndö ti dunia so laa! Ayeke nzoni ala nyon sengo ye so mo bata ndali ti ala; ala nyon ni asi ya ti ala. Ayeke nzoni amolenge ti ala anyon alingbi na ala, tanga ni angba ndali ti atara ti ala.

Ésaïe 30:1

Mawa na amolenge ti ngangu li! So tënë ti yanga ti *KOTA GBIA laa. Ala yeke leke apialo so alondo na mbi pepe; ala yeke sara *ambuki kirikiri so be ti mbi aye tënë ni pepe. Ala yeke sara si siokpari aga na ndö ti tere, na ndö ti tere.

Ésaïe 57:4

Zo wa laa ala yeke he lo so, zo wa? Zo wa laa ala zi yanga ti ala kota na tere ti lo, zo wa? Zo wa laa ala sigigi na menga ti ala na lo, zo wa? Ala yeke amolenge ti ngangu li pepe? Ala yeke azo ti mara ti tenengo mvene pepe?

Jérémie 23:10

“Kodro so asi singo na azo ti sarango aye ti ndumba. Sese ni ayeke na mua ndali ti adengo ba, ndo ti tengo pere ti anyama ahole kasakasa. Azo ni ayeke kpe gi na peko ti ye ti sioni; be ti ala awoko pepe na sarango ye so akpa pepe.

Osée 10:9

Ti londo na sioni ye so mo sara na Gibea ngbii asi fadeso, mo Israel, mo sara siokpari awe; ni laa mo ngba gi ngbango daa so! Ayeke na legeni titene bira alondo na tere ti azo ti sioni so gi na Gibea pepe?

Awayango-sandaga 11:16

*naamo, shuete, muete, na mara ti andeke nde nde ti gbungo kondo,

Matthieu 11:19

*Molenge ti Zo aga, lo yeke te, lo yeke nyon, me azo atene: ‘Ala baa, koli so ayeke gbongo ti kobe si lo yeke nyon samba mingi! Lo ye tënë ti azo ti rongo nginza ti lapo na ti azo ti siokpari!’ Me ndara so alondo na Nzapa, zo ayeke hinga atene, ayeke mbirimbiri ndara gi na lege ti ye so ndara ni asara.”

Matthieu 13:22

Ambeni zo ayeke tongana sese so aki ayeke daa si ale ti kobe atuku daa: ala ma tënë ni, me gingo be ti ala na ndö ti aye ti sese so na nzara ti mosoro akanga ndö ti tënë ni si ale pepe.

Matthieu 13:38

yaka ni ayeke dunia so; anzoni le ti kobe ni ayeke azo so aga azo ti kodro-gbia ti Nzapa; asioni pere ni ayeke azo ti Sioni wato;

Marc 4:19

me be ti ala agi ala mingi na ndö ti aye ti dunia so; amosoro ahanda ala, nzara ti aye kue asara ala. Aye so kue akanga ndö ti tënë ni si ale pepe.

Nzoni Tënë so Luc asu na mbeti 16:8

Kota zo ni agonda ndombe ti nzi so, ngbanga ti so lo sara ye ti lo na kode. Taa-tënë, azo ti dunia so ayeke sara ye na kode na amba ti ala, ahon azo ti Nzapa so ayeke na ya ti lumiere.”

Nzoni Tënë so Luc asu na mbeti 22:31

Jésus atene: “Simon, Simon, Satan ahunda ti yengere ala tongana ti so zo ayeke yengere ale ti kobe.

Jean 12:31

Fadeso, ngbonga ti fango ngbanga na li ti azo ti dunia so alingbi awe; fade a yeke bi gbia ti dunia so na gigi.

Jean 13:2

So ala yeke te kobe ti lakui, Zabolo azia na be ti Judas, molenge ti Iskariote ti ka Jésus.

Jean 13:27

So Judas amu mapa ni, Satan ali na ya ti lo. Jésus atene na lo: “Ye so mo ye ti sara, sara ni hio!”

Jean 14:30

Ti fadeso, mbi yeke kiri ti tene tënë na ala mingi pepe, ndali ti so gbia ti dunia so ayeke ga. Lo yeke na ngangu na ndö ti mbi pepe,

Jean 15:19

Tongana ala yeke fade azo ti dunia so, ka dunia ni aye ala ndali ti so ala yeke ti lo. Me mbi soro ala na popo ti azo ti dunia si ala yeke azo ti dunia mbeni pepe. Ndani laa dunia ni ake ala.

Jean 16:11

Azo ni ayeke handa tere ti ala na ndö ti tënë ti fango ngbanga ti Nzapa, ndali ti so a fâ ngbanga na li ti gbia ti dunia so awe.

Jean 7:7

Azo ti dunia alingbi ti ke ala pepe; me azo ni ake mbi, ngbanga ti so mbi tene tënë na ndö ti ala, mbi tene: aye so ala ayeke sara ayeke sioni.

Jean 8:23

Jésus akiri tënë na ala, atene: “Ala yeke azo ti sese so, me mbi, mbi yeke zo ti yayu. Ala yeke azo ti dunia so, me mbi, mbi yeke zo ti dunia so pepe.

Jean 8:44

Babâ ti ala ayeke Zabolo, ala ye ti sara gi ye so be ti lo aye; kua ti lo ngbene ye na tongo nda ni laa. Lo gi lege laoko ti tene taa-tënë pepe, ngbanga ti so taa-tënë ayeke na ya ti fini ti lo pepe. Mvene ayeke ye ti tere ti lo, ngbanga ti so lo yeke zo ti mvene si lo yeke babâ ti mvene.

Awatokua 19:35

Wakuasu ti gbata ni awara lege ti sara si gba ti azo ni akai, lo tene: “A-ita ti mbi, azo ti Efeze, azo kue ahinga atene, gbata ti Efeze laa ayeke gbata ti Artemis, kota nzapa-wali nga na yanda ti lo so alondo na yayu ati na sese!

Awatokua 5:3

Pierre atene na lo: “Ananias, ngbanga ti nyen si mo yeda titene Satan ali be ti mo? Yaka so mo ka so, mo gbanzi mbage ti nginza ni si mo tene mvene na Yingo-Vuru.

Rome 12:2

Ala mu lege ti dutingo ti azo ti dunia so pepe, me ala zia Nzapa asanze fini ti ala, lo mu na ala fini gbungo-li. Tongaso, fade ala lingbi ti hinga ye so Nzapa aye: ye so ayeke nzoni, ye so anzere na be ti lo, ye so ayeke nzoni kue.

1 Korente 5:10

Tënë so mbi tene lani so abaa pepe azo ti dunia so, so ti tene azo ti gingo awali wala akoli kirikiri, azo so kota nzara ti warango ye ayeke na be ti ala, azo ti nzi, wala azo ti vorongo anzapa nde. Tongaso pepe, alingbi fade titene ala sigigi na popo ti azo ti dunia so!

1 Korente 6:11

Ambeni zo na popo ti ala ayeke ando tongaso. Me Nzapa *asukula asioni ti ala awe, lo sara si ala ga nzoni kue si lo zia ala nde; lo sara si ala ga mbirimbiri na le ti lo na iri ti *Kota Gbia Jésus Christ nga na lege ti Yingo ti Nzapa ti e.

2 Korente 4:4

azo so ake ti ma na be. Sioni nzapa ti sese so akanga lege ti hingango ndo ti ala titene ala baa zango ti Nzoni Tënë pepe. Andaa Nzoni Tënë ni ayeke fa gonda ti Christ, lo so lo yeke limo ti Nzapa.

Galasii 1:4

Jésus aka tere ti lo ndali ti siokpari ti e, ti zi e na ya ti ngoi ti sioni so e yeke daa laso; lo sara tongana ti so be ti Nzapa Babâ ti e aye.

Efeze 1:21

Kâ, Christ ayeke na ndö ti ayingo so ayeke na komandema, ala so ayeke na ngangu nga na ala so ayeke amakonzi. Lo yeke na ndö ti aye so kue e yeke ma iri ni na dunia ti laso nga na dunia so ayeke ga.

Efeze 2:11

Azuife ayeke azo so afâ *ganza; ganza ni ayeke ye so maboko ti zo laa asara, ala ye titene azo airi ala “aganza”. Ala so a du ala amara nde, ala yeke fâ ganza pepe si azuife ayeke iri ala “apopö.” Ayeke nzoni ala dabe ti ala na lege ti dutingo ti ala ti kozoni:

Efeze 2:13

Ando, ala so ayeke yongoro na Nzapa, fadeso, na lege ti gango so ala ga oko na Christ, ala ga nduru na Nzapa, ngbanga ti so mene ti Christ atuku ndali ti ala.

Efeze 2:3

E nga kue, e yeke ando tongana ala: e yeke sara aye na lege ti asioni nzara ti be ti e, e yeke sara ye so be ti e aye na ye so anzere na be ti e. E nga, ngonzo ti Nzapa alingbi ti ti na li ti e tongana tanga ti azo kue ndali ti so a du e zo.

Efeze 4:17

Tongaso, na iri ti *Kota Gbia, mbi yeke tene tënë so biani na ala: ala kiri asara ye tongana ti azo ti amara nde pepe, ngbanga ti so atënë ti be ti azo ti amara nde ayeke buba ye.

Efeze 4:22

Tongaso, alingbi ala zia ngbene lege ti dutingo ti ala. Ando, anzara ti be ti ala ayeke handa ala si ayeke buba ala. Alingbi ala zia ngbene dutingo ti ala ti zo tongana ti so zo ayeke zi gbagba bongo na tere ti lo.

Efeze 5:6

Ala zia mbeni zo ahanda ala na asenge senge tënë pepe. Asioni ye tongaso asara si ngonzo ti Nzapa ayeke ga na ndö ti azo so ake yanga ti lo.

Efeze 5:8

Ando, ala yeke na ya ti vukongo ndo. Ndali ti so ala ga oko na *Kota Gbia, fadeso ala yeke na ya ti lumiere. Ayeke nzoni sarango ye ti ala ayeke tongana ti azo so ayeke na ya ti lumiere.

Efeze 6:12

Biani, e yeke tiri bira ni na azo pepe, me na ayingo so ayeke na komandema, ala so ayeke na ngangu na ndö ti dunia so ayeke na ya ti vukongo ndo, so ti tene asioni yingo so ayeke na le ti nduzu.

Kolose 1:21

Ala, azo ti Nzapa, ala yeke ando azo so akangbi na lo, ala yeke awato ti lo ndali ti sioni tënë ti be ti ala nga na aye ti kirikiri so ala sara.

2 Timothée 4:10

Demas azia mbi, ahon awe, ngbanga ti so nzara ti aye ti gigi so agbu lo; lo gue na Tesalonike. Kresan ague na Galasii, Tite ague na Dalmasii.

Jacques 1:27

Mbirimbiri vorongo Nzapa so sioni ye oko ayeke daa pepe, ayeke mungo maboko na anyindu nga na awali-mua so ayeke baa pasi; mbirimbiri vorongo Nzapa ayeke nga ti ke sarango aye ti potopoto ti dunia so.

Jacques 1:7

Mara ti zo tongaso, ayeke nzoni lo hinga lo tene, lo lingbi ti wara mbeni ye oko pepe na maboko ti *Kota Gbia.

Jacques 4:4

Ala so ado lege ti Nzapa azia so! Ala hinga pepe? Zo so aye tënë ti aye ti dunia so, andaa lo ke Nzapa awe; zo so aye tënë ti aye ti dunia so, andaa lo ga wato ti Nzapa awe.

1 Pierre 1:14

Ala sara ye tongana amolenge so ayeke ma ndo. Ala sara ye pepe na lege ti anzara ti be ti ala so ala yeke na ni ando, na ngoi so ala de ti hinga ndo pepe so.

1 Pierre 4:3

Ando, ala mu ngoi mingi ti sarango na aye tongana ti azo so ahinga Nzapa pepe. Ala yeke sara aye ti ndumba, ala yeke sara nzara ti aye ti amba ti ala, ala yeke angbaa ti samba, ala yeke sara matanga ti te, ti nyon butuma, ala yeke voro anzapa nde, ye so akpa titene zo asara ni pepe.

2 Pierre 2:14

Le ti ala ayeke za na nzara ti gingo awali; nzara ti sarango siokpari ayeke hunzi na be ti ala oko pepe. Ala yeke handa azo so be ti ala ade ti kpengba pepe; nzara ti warango ye ti ala ahon ti azo kue. Ala yeke azo so a deba ala awe!

1 Jean 3:10

Ye so ayeke fa atene, zo ayeke molenge ti Nzapa wala molenge ti Zabolo ayeke so: zo so ayeke sara ye ti mbirimbiri pepe, wala lo ye ita ti lo pepe, lo yeke zo ti Nzapa pepe.

1 Jean 3:8

Zo so ayeke sara siokpari, lo yeke zo ti Zabolo, ngbanga ti so Zabolo ayeke sara siokpari, ngbene ye na tongo nda ni. Molenge ti Nzapa aga mbirimbiri ti buba aye so Zabolo ayeke sara.

1 Jean 4:4

Ti ala amolenge ti mbi, ala yeke azo ti Nzapa. Ala hon ndö ti awayanga-nzapa ti mvene so awe, ngbanga ti so Yingo so ayeke na ya ti ala ayeke ngangu ahon lo so ayeke na dunia so.

1 Jean 5:19

E hinga so, e yeke azo ti Nzapa, me dunia kue ayeke na gbe ti komandema ti Sioni wato.

1 Jean 5:4

Zo so kue ayeke molenge ti Nzapa ahon ndö ti dunia so na ngangu awe. Na lege ti mabe laa e yeke hon ndö ti dunia so na ngangu.

Aye so Nzapa afa 12:9

A bi sioni nyama ni na gigi. Lo yeke ngbene ngbo so azo airi lo atene, Zabolo wala Satan, wala zo ti handango azo ti dunia kue. A bi lo na ndö ti sese, lo na a-ange ti lo.

Aye so Nzapa afa 13:14

Lo handa azo ti ndö ti sese na lege ti aye ti kpene so lo sara na dawa ti nyama ti kota ngu-ingo; lo sara ni na ngangu so a mu na lo. Lo tene na azo ti leke mbeni limo ndali ti nyama ti kota ngu-ingo so awara ka ti yongoro zeme si lo ngba na fini so.

Aye so Nzapa afa 13:8

Fade azo ti ndö ti sese kue ayeke voro nyama ni. Azo so ayeke voro lo ayeke azo so, ngbene ye so dunia abaa gigi, iri ti ala ayeke na ya ti mbeti pepe, mbeti so a su iri ti azo so ayeke na taa fini daa, mbeti ti Molenge ti Taba so a fâ lo so.

Aye so Nzapa afa 16:17

Mbarambara ange ni atuku ye ti ya ti kopo ti lo na ya ti pupu. Mbeni kota go alondo na mbage ti mbata ti gbia so ayeke na ya ti kota da ti Nzapa si atene: “Awe!”

Aye so Nzapa afa 20:2

Lo gbu sioni nyama so akpa ngunde, so ti tene ngbene ngbo so ayeke Zabolo wala Satan, lo kanga lo na zingiri ni ndali ti ngu saki oko.