Efeze 1:5 - Mbeti ti Nzapa - Tënë so amu fini

⁵ Nzapa aleke na be ti lo kozoni ti sara si e ga amolenge ti lo na lege ti Jésus Christ. Na lege ti nzoni be ti lo, ye so lo ye ti sara laa.

Efeze 1:5 Iomraidhean Croise

Jérémie 3:19

“Mbi tene na be ti mbi, mbi tene: Ae, mbi ye fade ti zia mo na kota ndo na popo ti amolenge ti mbi! Mbi ye fade ti mu na mo pendere kodro so ayeke pendere mingi ahon akodro ti dunia kue! Mbi ye fade ti mu kodro ni titene aga ye ti mo. Mbi tene nga na be ti mbi, mbi tene: Fade mo yeke di iri ti mbi ‘Babâ’, mo yeke kiri ti zia peko ti mo na mbi pepe.

Jérémie 3:4

Ti fadeso, kamene asara mo pepe ti iri mbi: “Babâ ti mbi, mo so mbi mu be ti mbi na mo na ndembe so mbi de molenge!

Matthieu 1:25

Me Joseph na Marie aduti koli na wali pepe ngbii asi na ngoi so Marie adu molenge ti lo. Joseph adi iri ti lo Jésus.

Matthieu 11:26

Biani Babâ, ye ni ayeke tongaso, ngbanga ti so mo yeda.

Nzoni Tënë so Luc asu na mbeti 10:21

Gi na ndembe ni so, be ti Jésus asi na ngia ti Yingo-Vuru si lo tene: “Mbi gonda mo Babâ, mo so mo yeke *Kota Gbia ti yayu na ti sese, ndali ti so mo honde aye so na azo ti ndara nga na azo ti hingango ye si mo sigigi na nda ni na akete molenge. Biani Babâ, ye ni ayeke tongaso, ngbanga ti so mo yeda.

Nzoni Tënë so Luc asu na mbeti 11:32

Na lango ti fango ngbanga, fade azo ti Ninive ayeke londo ti luti na le ti azo ti fadeso ti fâ ngbanga na li ti ala, ngbanga ti so azo ti Ninive akiri na lege ti Nzapa. Na ndembe so azo ti Ninive ama tënë so Jonas afa, ala zia ngbene lege ti sarango ye ti ala. Mbeni zo ayeke ge so ayeke kota ahon Jonas!”

Nzoni Tënë so Luc asu na mbeti 12:32

“Ala azo so ayeke tongana bongbi ti akete taba, ala sara mbeto pepe, ngbanga ti so a nzere na Babâ ti ala ti mu Kodro-gbia ni na ala!

Jean 1:12

Me azo so kue ayamba lo si ama na be na lo, lo mu na ala lege ti ga amolenge ti Nzapa.

Jean 11:52

Lo yeke kui gi ngbanga ti mara so oko pepe, me lo yeke kui nga ti bongbi amolenge ti Nzapa so ayeke na ando nde nde si ala ga tere oko.

Jean 20:17

Jésus atene na lo: “Zia ti gbu mbi, ngbanga ti so mbi de ti gue na Babâ pepe. Me mo gue, mo baa a-ita ti mbi, mo tene na ala, mo tene: ‘Mbi yeke gue na Babâ ti mbi so ayeke nga Babâ ti ala; lo yeke Nzapa ti mbi na Nzapa ti ala nga.’ ”

Awatokua 13:48

So azo ti amara nde ama tënë so, be ti ala asi na ngia si ala gonda tënë ti Kota Gbia. Ala so a soro ala ti wara fini so angba lakue lakue, ala ma na be.

Rome 8:23

Gi aye ti dunia oko pepe si ayeke dema: e so e wara Yingo tongana kozo nzoni ye so Nzapa amu na e, e nga, e yeke dema na ya ti be ti e ti ku titene Nzapa asara si e ga amolenge ti lo, so ti tene lo zi e na gbe ti ngbaa, e na tere ti e kue.

1 Korente 1:1

Mbi Paul, Nzapa airi mbi tongana ti so be ti lo aye titene mbi ga *watokua ti Jésus Christ; mbi na ita Sostene laa e tokua mbeti so

1 Korente 1:21

Biani, azo ti dunia so, na ndara ti ala wani alingbi ti hinga Nzapa pepe, ataa na ndo so lo fa ndara ti lo daa. Ndani laa, lo leke na be ti lo ti soo azo so ama na be gi na lege ti tënë so e yeke fa si akpa buba tënë so.

2 Korente 6:18

Kota Gbia so ngangu ti lo ahon angangu kue atene: “Mbi yeke duti Babâ ti ala si ala yeke duti amolenge ti mbi ti koli na ti wali.”

Galasii 3:26

Biani, ala kue aga amolenge ti Nzapa na lege so ala ma na be na Jésus Christ.

Efeze 1:11

Na lege ti gango so e ga oko na Christ, Nzapa asoro e kozoni titene e ga azo ti lo alingbi na ye so lo leke na be ti lo, lo sara ye so kue tongana ti so be ti lo aye.

Efeze 1:9

Ye so lo leke na be ti lo si angba na hondengo ni, lo sara si e hinga ni: so ti tene, ye so lo leke kozoni na lege ti nzoni be ti lo ti sara ni na lege ti Christ.

Filipe 2:13

Biani, Nzapa laa ayeke zia nzara ti sarango ye na be ti ala si lo yeke mu na ala lege ti sarango ni alingbi na ye so lo leke na be ti lo.

Kolose 1:19

Biani, Nzapa ayeda ti duti kue kue kue na ya ti Molenge ti lo.

2 Tesalonike 1:11

Ndani laa e yeke sambela lakue ndali ti ala titene Nzapa ti e asara si ala lingbi na iringo so lo iri ala. E hunda titene na lege ti ngangu ti lo, ala sara aye ti nzoni so kue ala yeke na nzara ti sarango ni si kua so ala yeke sara na lege ti mabe asi na ndani.

Ahebro 2:4

Nzapa nga afa atene, tënë ni ayeke taa-tënë na lege ti aye ti kpene nde nde na aye ti dongo be nga na amatabisi ti Yingo-Vuru so lo kangbi na azo tongana ti so be ti lo aye.

1 Jean 3:1

Ala baa yengo so Babâ aye na e! Lo ye e ahon ndoni, ndani laa, a yeke iri e amolenge ti Nzapa. Biani, e yeke amolenge ti lo! Me azo ti dunia so ahinga e pepe, ngbanga ti so ala hinga Nzapa pepe.

Aye so Nzapa afa 21:7

Zo so aso benda, fade mbi yeke mu aye so na lo; mbi yeke duti Nzapa ti lo si lo yeke duti molenge ti mbi.