Daniel 9:9 - Mbeti ti Nzapa - Tënë so amu fini

⁹ KOTA GBIA Nzapa ti e, ataa so e sara ngangu li na mo, me ndali ti nzoni be ti mo, mo yeke zi siokpari na li ti e.

Daniel 9:9 Iomraidhean Croise

2 Samuel 24:14

David akiri tënë na Gad, atene: “Mbi yeke na ya ti ye ti ngangu mingi! Mbi gbu gere ti mo, zia e ti na maboko ti KOTA GBIA, ngbanga ti so nzoni be ti lo ayeke kota; me mbi ye ti ti na maboko ti azo pepe.”

1 Agbia 8:30

Ma vorongo tere ti mbi, zo ti kua ti mo na vorongo tere ti azo ti Israel, azo ti mo so ayeke na ndo so si ala yeke sambela mo. KOTA GBIA, mo so mo yeke na yayu kâ, ma sambela ti e, mo zi nga tënë na li ti e.

Néhémie 9:31

Me na lege ti kota nzoni be ti mo, mo fâ ala kue ti hunzi ala pepe, mo zia ala pepe, ngbanga ti so mo yeke Nzapa so ayeke sara nzoni be na zo si ayeke baa mawa ti zo.

Abia (Psaumes) 130:4

Me mo laa mo yeke zi tënë na li ti azo, tongaso si azo akpe mbeto ti mo.

Abia (Psaumes) 130:7

Azo ti Israel, ala zia be ti ala ti ku KOTA GBIA, ngbanga ti so lo yeke na nzoni be; lege so lo yeke soo na azo ayeke gbani gbani.

Abia (Psaumes) 62:12

Fani mingi mbi ma Nzapa atene: “Ngangu ayeke ti mbi Nzapa.”

Abia (Psaumes) 86:15

Me mo Kota Gbia, mo yeke Nzapa so mo yeke baa mawa ti zo si mo yeke sara nzoni be na zo; mo yeke sara ngonzo hio hio pepe, nzoni be ti mo asi singo si mo yeke bata tënë ti yanga ti mo lakue.

Abia (Psaumes) 86:5

Kota Gbia, mo yeke nzoni, mo yeke zi tënë na li ti zo, mo yeke sara nzoni be mingi na azo so kue ayeke iri mo.

Ésaïe 55:7

Alingbi zo ti sioni azia lege ti sioni ti lo; zo ti sarango sioni azia asioni tënë ti be ti lo. Ayeke nzoni ala kiri na KOTA GBIA si fade lo baa mawa ti ala. Ayeke nzoni lo kiri na Nzapa ti e si lo zi tënë na li ti ala biani biani.

Ésaïe 63:7

Fade mbi yeke dabe ti azo na nzoni be ti *KOTA GBIA, mbi yeke fa nda ni so azo alingbi ti sepela lo: anzoni ye so kue lo sara na e, akota nzoni ye so lo sara na azo ti Israel, aye so kue lo sara na lege ti ndoye, na lege ti kota nzoni be ti lo.

Jérémie 14:7

“Tongana asioni ti e ayeke bi tënë na li ti e, ayeke nzoni KOTA GBIA, mo sara mbeni ye ndali ti iri ti mo. Biani, e zia mo fani mingi; e sara sioni so ake mo.

Ezekiel 20:13

Me na benyama, azo ti Israel atomboka na tere ti mbi; ala sara ye alingbi na andia ti mbi pepe nga na lege ti asarango ye so mbi fa na ala. Andaa aye ni ayeke sara titene zo aduti na fini tongana lo sara ye alingbi na ni. Ala sara si lango ti wungo tere aga sioni ahon ndoni. Tongaso mbi tene: Mbi yeke kiri ti tuku ngonzo ti mbi ti wâ na ndö ti ala na benyama si mbi yeke fâ ala ti hunzi ala.

Daniel 9:5

E sara siokpari, e sara kirikiri; e sara sioni, e sara ngangu li na mo si e zia lege ti andia ti mo na akpengba tënë ti mo.

Daniel 9:6

Azo ti kua ti mo so ayeke awayanga-Nzapa atene peko ti tënë ti yanga ti mo na agbia ti e, na amakonzi ti e, na akotara ti e nga na azo ti kodro kue; me e ke ti ma ala.

Daniel 9:7

KOTA GBIA, mo yeke ti mo mbirimbiri, me ti e, gi kamene laa ayeke na le ti e. Ye ni laa e yeke baa laso na tere ti azo ti Juda nga na tere ti azo ti Jérusalem, na azo ti Israel kue, ataa ala so ayeke nduru wala ala so ayeke na yongoro ndo. Biani, azo ti mara ti e akangbi kirikiri na ando nde nde so mo tumba ala daa ndali ti so ala sara sioni so ake mo.

Daniel 9:8

KOTA GBIA, kamene ayeke na le ti e, e na agbia ti e, na amakonzi ti e na akotara ti e, ngbanga ti so e sara siokpari so ake mo.

Jonas 4:2

Lo sambela *KOTA GBIA, lo tene: “Âa! KOTA GBIA, tënë so lani mbi tene na be ti mbi na ndembe so mbi yeke na kodro ti mbi so, ni laa asi so pepe? Mbi hinga lani mbi tene, mo yeke Nzapa so mo yeke sara nzoni be na zo si mo yeke baa mawa ti lo; mo yeke sara ngonzo hio hio pepe si nzoni be ti mo asi singo. Mo yeke lakue nduru ti zia lege ti sioni so mo ye ti sara na zo. Ndani laa, mbi londo lani ti kpe hio ti gue na Tarsis.