Aggée 1:11 - Mbeti ti Nzapa - Tënë so amu fini

¹¹ Mbi sara si buru aga na ya ti kodro ni: ndo ahole na li ti ahoto, na ya ti ayaka ti *ble, ayaka ti *vinye, ayaka ti olive nga na tanga ti ayaka ti kobe kue. Azo na anyama abaa pasi mingi ndali ti buru ni si peko ti akua ti maboko ti ala kue angba senge.”

Aggée 1:11 Iomraidhean Croise

1 Agbia 17:1

Élie, zo ti kete kodro ti Tishebe, na sese ti Galaad atene na gbia Akab, atene: “*KOTA GBIA, Nzapa ti Israel ayeke na fini! Lo so mbi yeke sara na lo, mbi tene na mo: ‘Na ya ti angu so ayeke ga, ngu-Nzapa ayeke pika oko pepe, ataa ngu ti pere ayeke duti daa pepe, gi tongana mbi mu yanga si!’ ”

2 Agbia 8:1

Wali so lani Élisée azingo molenge ti lo na kuâ so, Élisée atene lani na lo: “Londo, mo na asewa ti mo, ala gue, aduti na ndo so ala lingbi ti duti daa. Biani, *KOTA GBIA aleke na be ti lo ti tokua kota nzara na ya ti kodro ni; kota nzara ni ayeke ninga ande ngu mbarambara.”

Mbeti ti Job 34:29

Me tongana Nzapa akanga maboko aduti, zo wa laa ayeke fâ ngbanga na li ti lo? Tongana lo honde le ti lo, zo wa laa alingbi ti baa lo, zo wa? Andaa lo yeke bata kodro nga na azo.

Jérémie 14:2

“Kodro ti Juda ayeke na mua, agbata ti lo ayeke ti tingo. Azo ni ayeke sara mua, ala duti na sese. Demango tere ti Jérusalem ague ngbii asi na yayu.

Abia ti demango tere 1:21

KOTA GBIA, so mbi ngba ti dema, azo ama mbi; me mbeni zo ti de be ti mbi ayeke daa pepe. Ye ti mawa so asi na mbi azia ngia na be ti awato ti mbi. Andaa mo laa mo sara ye ni. Lango so mo tene tënë ni ando so, KOTA GBIA, mo sara si lango ni so alingbi si. Ayeke nzoni awato ti mbi aga nga tongana mbi!

Amos 5:8

Lo so lo sara bongbi ti atongoro, Pleyade na Orion, lo sara si ndo so avuko pitipiti aga lumiere ti ndaperere; lo sara si kota lâ avuko si aga bi. Lo iri ngu ti kota ngu-ingo ti ga si lo tuku ni na ndö ti sese: iri ti lo ayeke KOTA GBIA.

Amos 7:4

Ye so Kota Gbia NZAPA akiri afa na mbi si mbi baa ni ayeke so: Kota Gbia NZAPA airi wâ ti fâ ngbanga; wâ ni ahole angu ti gbe ti sese kue si agbi sese ti Israel kue.

Amos 9:6

Lo so lo leke ndo ti dutingo ti lo na yayu kâ, lo gbara le ti nduzu na ndö ti sese; lo so lo iri angu ti kota ngu-ingo ti ga si lo tuku ni na ndö ti sese, iri ti lo ayeke *KOTA GBIA.

Aggée 2:17

Mbi pika ala si akua ti maboko ti ala kue abuba; mbi sara si akobe ti yaka ti ala ahole si afun, *pembe ti bekpa ati na ndö ti akobe ni si abuba ni. Me ala kiri na mbage ti mbi pepe; so tënë ti yanga ti KOTA GBIA laa.

Aggée 2:19

Ale ti kobe angba na ya ti agogoro ti ala? Ataa keke ti vinye, keke ti fige, keke ti grenade nga na keke ti olive ale oko pepe. Ti londo laso ti gue na ni, mbi yeke sara tufa na ndö ti ala.”

Malashii 3:11

Fade mbi yeke kanga lege na akete nyama so ayeke te akobe ti yaka ti ala titene anyama ni abuba akobe ti ala pepe; mbi yeke kanga lege si akeke ti *vinye ti ala so ayeke le pepe so, akiri ale. Tënë so KOTA GBIA so ayeke na ndö ti dunia kue atene laa.

Malashii 3:9

Deba ayeke na li ti ala, ngbanga ti so ala, amara kue, ala nzi mbi.

Ndia ti fani use ni 28:22

Fade KOTA GBIA ayeke sara si ala nge ngengo na nduzu; lo yeke tokua kobela ti wâ, kobela ti sukungo tere; aye ayeke gbi tere ti ala. Lo yeke tokua sioni buru; akobela ayeke sara gere ti akobe ti ala na yaka si akobe ni ayeke fun si ahole. Asioni ye so ayeke si ngbii ala hunzi kue.