1 Pierre 2:1 - Mbeti ti Nzapa - Tënë so amu fini

¹ Ala zia lege ti sarango amara ti asioni kue nga na sarango ye ti mayere. Tënë ti yanga ti ala ague nde na sarango ye ti ala pepe, ala zia lege ti kota be na ti dikongo asioni tënë na iri ti azo.

1 Pierre 2:1 Iomraidhean Croise

Mbeti ti Job 36:13

Âdu ti azo ti sioni, ala ngba ti sara ngonzo; tongana Nzapa akanga ala na zingiri, ala yeke dekongo na lo pepe titene lo mu maboko na ala.

Abia (Psaumes) 32:2

Ti lo nzoni, zo so *KOTA GBIA adiko sioni ti lo na li ti lo pepe, so tënë ti handango zo ayeke na be ti lo pepe!

Abia (Psaumes) 34:13

Zo wa laa aye tënë ti gigi ti lo, zo wa? Zo wa laa aye nga ti duti nzoni, zo wa?

Abia (Psaumes) 37:1

Bia ti David. Ngonzo ti wâ agbu mo na tere ti azo ti sioni pepe, be asara mo ndali ti warango ye ti azo ti kirikiri pepe.

Abia (Psaumes) 73:3

Biani, mbi baa aye ti azo ti baba ayeke ga nzoni si mbi sara kota be na tere ti azo ti sioni so.

Amato 14:30

Be so ayeke na siriri ayeke mu nzoni tere na zo; me sarango mbanda ayeke tongana mbeni sioni kobela so ayeke te zo na ya ti bio.

Amato 24:1

Sara kota be na tere ti azo ti sioni pepe; mo gi lege ti sara kamarade na ala pepe.

Amato 24:19

Azo ti sarango sioni, mo sara ngonzo na tere ti ala pepe; mo sara kota be na tere ti azo ti sioni pepe.

Amato 3:31

Azo ti sarango ngangu na amba ti ala, mo sara kota be na tere ti ala pepe; mo manda lege ti sarango ye ti ala pepe.

Ésaïe 2:20

Na lango ni so, azo ayeke mu ayanda ti ala ti wen ti nginza na ti lôro so ala yeke kuku ti voro ni so, ti bi ni na akolofia nga na anyama-ti-ngia.

Ésaïe 30:22

Anzapa ti mo so a leke na keke si a zia wen ti nginza na tere ni, ayanda ti mo so a kporo lôro si a zia na tere ni, fade mo yeke baa ni tongana ye so ayeke sioni. Mo yeke tuku ni tongana fungo ye si mo yeke tene: “Ala hon kâ!”

Matthieu 15:7

Ala, azo so tënë ti yanga ti ala ayeke nde na sarango ye ti ala so! Ésaïe atene peko ti tënë ti yanga ti Nzapa na ndö ti ala na legeni, lo tene:

Matthieu 23:28

Ala nga, ala yeke tongaso. Na le ti azo, ala kpa azo ti mbirimbiri, me be ti ala ayeke nde si siokpari asi singo daa.

Matthieu 24:51

Fade makonzi ni ayeke tumba lo na kua si ayeke sara na lo ye so a yeke sara na azo so tënë ti yanga ti ala ayeke nde na sarango ye ti ala; kâ, gi toto na tengo pembe.”

Matthieu 7:5

Mo so tënë ti yanga ti mo ayeke nde na sarango ye ti mo so, ayeke nzoni mo zi kota keke so ayeke na le ti mo so kozoni si. Na pekoni mo baa ndo nzoni ti zi pere so ayeke na le ti ita ti mo!

Marc 12:15

Me Jésus ahinga atene, tënë ti yanga ti afarizien ayeke nde na sarango ye ti ala. Tongaso lo tene na ala: “Ngbanga ti nyen ala ye ti sara si mbi ti na ya ti gbanda ti ala? Ala ga na mbi mbeni le ti nginza, mbi baa.”

Nzoni Tënë so Luc asu na mbeti 11:44

Mawa na ala, ngbanga ti so ala yeke tongana adu ti kuâ so azo abaa ni pepe, ala hinga pepe si ala yeke tambula na ndö ni!”

Nzoni Tënë so Luc asu na mbeti 12:1

Na ndembe ni so, azo abongbi gbani gbani, ala yeke pete tere na popo ti ala si Jésus ato nda ti tene tënë na adisiple ti lo, lo tene: “Ala sara hange na mama ti mapa ti *afarizien, so ti tene azo so tënë ti yanga ti ala ayeke nde na sarango ye ti ala so.

Nzoni Tënë so Luc asu na mbeti 6:42

Tongana nyen laa mo yeke tene na mba ti mo, mo tene: ‘Ita, ku mbi zi pere so ayeke na le ti mo’ si ti mo, mo yeke baa kota keke so ayeke na le ti mo so pepe? Mo so tënë ti yanga ti mo ayeke nde na sarango ye ti mo so, ayeke nzoni mo zi kota keke so ayeke na le ti mo so kozoni si na pekoni, mo baa ndo nzoni ti zi pere so ayeke na le ti mba ti mo.”

Jean 1:47

Jésus abaa Natanael so ayeke ga na mbage ti lo si lo tene: “Baa, so mbirimbiri zo ti Israel laa. Lo hinga ti tene mvene pepe.”

Rome 1:29

Asioni ye nde nde asi singo na be ti ala: ye so ayeke mbirimbiri pepe, sioni be, nzara ti warango ye mingi; ala yeke azo ti sioni be, kota be ahon ndö ti ala, ala yeke azo ti fango zo, azo ti papa, azo ti mvene, azo ti mbana, azo ti dungo mvene na iri ti amba ti ala,

1 Korente 14:20

A-ita, ayeke nzoni gbungo-li ti ala ayeke tongana ti amolenge pepe. Tongana ayeke tënë ti sarango sioni, ala ga tongana akete molenge so ahinga ti sara sioni pepe; me ayeke nzoni gbungo-li ti ala ayeke tongana ti akota zo.

1 Korente 5:8

Tongaso, e sara matanga ti Pake ni na ngbene mama ti mapa pepe, so ti tene na asiokpari na aye ti sioni; me e sara matanga ni na mapa so asara na mama ni pepe, so ti tene na vurungo be nga na tenengo taa-tënë.

2 Korente 12:20

Mbeto asara mbi titene tongana mbi si na ala kâ, mbi baa dutingo ti ala ayeke nde na ti so be ti mbi aye si ala nga, ala baa dutingo ti mbi ayeke nde na ti so be ti ala aye. Mbeto asara mbi titene aye tongaso aduti na popo ti ala: papa, kota be, ngonzo, kangbingo tere, zongango zo na asioni tënë, fonongo na iri ti zo, baba, sarango aye ti wusuwusu.

Efeze 4:31

Batango zo na be, songo be, ngonzo, dekongo na li ti zo, zongango zo, sarango sioni na zo, alingbi aye tongaso ayeke na popo ti ala mbeni pepe.

1 Tesalonike 2:3

Tënë so e yeke fa na azo aluti na ndö ti tënë ti mvene pepe, aluti nga na ndö ti sioni tënë ti be ti zo wala tënë ti handango zo pepe.

1 Timothée 3:11

Alingbi awali ni nga ayeke azo so ane tere ti ala, ala yeke tene sioni tënë na iri ti zo pepe, ala yeke sara ye ahon ndoni pepe, me na legeni; azo alingbi ti zia be na ndö ti ala na ya ti aye kue.

Tite 2:3

Mo tene nga na ambakoro-wali titene ala duti tongana azo so aduti nde ndali ti Nzapa: alingbi ala tene sioni tënë na iri ti zo pepe, ala yeke angbaa ti samba pepe, ala fa na azo ye so ayeke nzoni,

Ahebro 12:1

So gba ti azo so asara ando ye na lege ti mabe ti ala ayeke ngoro e, ayeke nzoni e nga, e zi na ndö ti e akungba so kue ayeke sara si e tambula gbaa so, e zia nga lege ti siokpari so ayeke gbu e hio hio na ya ti gbanda ti lo. E kpe loro ti mandako so e yeke na ya ni so ngangu, e zia lege ni pepe.

Jacques 1:21

Ndani laa, ala zia lege ti sarango aye ti potopoto kue nga na lege ti sarango sioni ye kue. Ala yeda na nzoni be na tënë so Nzapa alu na ya ti be ti ala, tënë ni alingbi ti soo ala.

Jacques 3:14

Me tongana ala yeke sara sioni kota be ti gbugburungo na kota ndo, ala pika kate ti ala ndali ti ndara ti ala ni pepe. Tongana ala yeke sara ye tongaso, andaa ala yeke tene mvene ti buba lege ti taa-tënë.

Jacques 4:11

A-ita, ala tene sioni tënë na iri ti amba ti ala pepe! Zo so atene sioni tënë na iri ti mba ti lo wala lo fâ ngbanga na li ti lo, andaa lo tene sioni tënë na ndö ti ndia, lo fâ nga ngbanga na li ti ndia awe. Tongana mo fâ ngbanga na li ti ndia, andaa ye so ndia ahunda na mo ti sarango ni, mo yeke sara ni pepe, me mo ga zo ti fango ngbanga na li ti ndia awe.

Jacques 4:5

Tënë so Mbeti ti Nzapa atene: “Yingo so Nzapa azia na ya ti e, lo ye ni ngangu mingi”, ala baa ni tongana senge senge tënë pepe.

Jacques 5:9

A-ita, ala dema na iri ti amba ti ala pepe, tongaso si Nzapa afâ ngbanga na li ti ala pepe. Ala baa, wafango-ngbanga ayeke luti na yanga ti da!

1 Pierre 2:16

Ala sara ye tongana azo so asigigi na gbe ti ngbaa; me alingbi sigingo ti ala na gbe ti ngbaa ni aga mbeni ye ti kanga ndö ti sarango sioni ye pepe, me ala sara ye tongana angbaa ti Nzapa.

1 Pierre 2:22

Christ asara siokpari pepe; tënë ti mvene asigigi na yanga ti lo laoko pepe.

1 Pierre 3:10

Biani, Mbeti ti Nzapa atene: “Zo so aye tënë ti gigi ti lo si lo ye nga ti duti nzoni, alingbi lo bata yanga ti lo na sioni tënë, lo bata yanga ti lo na atënë ti mvene;

1 Pierre 4:2

Tongaso, ngoi so angba na ala ti duti na fini na sese so, ala sara ye na lege ti nzara ti be ti ala pepe, me na lege so be ti Nzapa aye.

1 Pierre 4:4

Fadeso, li ti azo ni akpe, ngbanga ti so ala, a-ita, ala yeke sara mbeni pepe asioni sarango ye ti kirikiri so ala na azo ni abongbi ando si ayeke sara ni. Tongaso, azo ni ayeke zonga ala.

Aye so Nzapa afa 14:5

Mbeni tënë ti mvene oko asigigi na yanga ti ala pepe; sioni ye oko ayeke na tere ti ala pepe.